26/01/2024
ကင်ဆာဆေးသွင်းကုသခြင်းရဲ့ ဘေးထွက်ဆိုးကျိုးများအကြောင်းနဲ့ မည်သို့ ပြုမူနေထိုင်ရမည်ကို တစ်ခုစီ ပြောပြပေးပါမယ်
၃/ ဆံပင်ကျွတ်ခြင်း
ကင်ဆာဆေးသွင်း ကုသခြင်း၏ လက္ခဏာဟု ဆိုပါလျှင် လူအများဆုံးသိသည်က ဆံပင်ကျွတ်ခြင်းပင် ဖြစ်ပါသည်။ အချို့ သော ကင်ဆာဆေးများသည် အနည်းငယ် (သို့) ဆံပင်လုံး၀ ကျွတ်ခြင်း မရှိသော်လည်း၊ အချို့ဆေးများမှာ ဆံပင်အားလုံးသာမက၊ မုတ်ဆိတ်မွေး၊ နှုတ်ခမ်းမွေး၊ မျက်တောင်၊ မျက်ခုံးနှင့် ချိုင်းမွေးများပါ ကျွတ်စေနိုင်ပါသည်။ ထို့ကြောင့် ကင်ဆာဆေးကြောင့် ဆံပင်ကျွတ်ခြင်းသည် သွင်းယူကုသသည့် ဆေးအမျိုးအစားနှင့် ဆေးပမာဏနှင့် ကိုယ်ခန္ဓာ၏ ဆေးအပေါ်တုန့်ပြန်မှု အပေါ်မူတည်ပါသည်။
ဆံပင်ကျွတ်ခြင်းသည် ဆေးသွင်းပြီး ရက်အနည်းငယ် အကြာတွင် စတင်တတ်ပါသည်။ ဆေးသွင်းနေစဉ်အတွင်း ဆံပင်ပြန်မပေါက်ဘဲ ဆက်လက်ကျွတ်နိုင်ပြီး အမြဲမဟုတ်ဘဲ ဆေးသွင်းပြီး ၃-၄ လ လောက်အကြာတွင် ဆံပင်များ ပြန်လည်စတင်ပေါက်လာမည် ဖြစ်သည်။
မည်သို့ ပြုမူနေထိုင် သင့်သနည်း။
(၁) အကယ်၍ သင်ဆေးသွင်း ကုသမည့် ကင်ဆာဆေးသည် ဆံပင်ကျွတ်စေမည် ဆိုပါက ဆေးသွင်းကုသမှု မစတင်မှီ ဆံပင်အတိုညှပ်သင့်ပါသည် (အကယ်၍ ဆံပင်ကို ထားနိုင်သမျှထားမည်ဟု ဆုံးဖြတ်ထားလျှင်)၊ ရှည်လျားသော ဆံပင်၏ အလေးချိန်ကြောင့် ဦးရည်ပြားမှ ဆံပင်ကို ဆွဲသလိုဖြစ်ပြီး ဆံပင်ကျွတ်ခြင်းကို ပိုမိုမြန်ဆန်စေနိုင်ပါသည်။ သို့မဟုတ် ကင်ဆာဆေး မစတင်မှီ ကတုံးတုံးထားခြင်းဖြင့် ကင်ဆာဆေးကြောင့် ဆံပင်ကျွတ်ခြင်းမှ ဖြစ်ပေါ်လာနိုင်သော စိတ်ပိုင်းဆိုင်ရာ ထိခိုက်မှု၊ စိတ်ဓာတ်ကျမှုများမှ ကာကွယ်နိုင်မည် ဖြစ်ပါသည်။
(၂) ဆံပင်အတု တပ်ခြင်း
(၃) ကင်ဆာဆေးသွင်းစဉ်တွင် အာနိသင်ပြင်းထန်သော ခေါင်းလျှော်ရည်နှင့် ဆံပင်နှင့် ပတ်သတ်သော ထုတ်ကုန်များကို မသုံးစွဲသင့်ပါ။
(၄) ဆံပင်ဖီးလျှင် ဘီးကျဲဖြင့်သာ ဖီးသင့်ပါသည်။
(၅)ဆေးသွင်းကုသစဉ်နှင့် ကုသပြီး ၃-၄ လအထိ ဆံပင်ဆေးဆိုးခြင်း မပြုလုပ်သင့်ပါ။
သူရိန်မွန် ကင်ဆာအထူးကုဆေးခန်း
☎️ 01-508049 , 09-777324744
⏱️ မနက် ၁၀ နာရီမှ ညနေ ၆နာရီထိ (တနင်္ဂနွေနေ့တိုင်းဆေးခန်းပိတ်ပါသည်)
🏥လိပ်စာ - ရွှေဂုဏ်သူအိမ်ရာ၊ အောက်ကြည့်မြင်တိုင်လမ်းမကြီး၊ ကြည့်မြင်တိုင်မြို့နယ်၊ ရန်ကုန်မြို့။
🚏ကားမှတ်တိုင် - အထက်ကြည့်မြင်တိုင် ဟုမ်းလမ်းမှတ်တိုင်
