Хөвсгөл аймгийн Нэгдсэн эмнэлэг

17/03/2026

17/03/2026

Амны хаалтаа тогтмол зүүж улаанбурхан өвчнөөс сэргийлье❗️

16/03/2026

✅ГЛАУКОМА БУЮУ НҮДНИЙ ДАРАЛТ ИХСЭХ ӨВЧИН ГЭЖ ЮУ ВЭ?

👀Нүдний даралт ихсэх өвчин буюу Глаукома нь нүдний дотоод даралт нэмэгдсэнээс харааны мэдрэл эргэж сэргэхгүйгээр гэмтэж, харааны талбай аажмаар багасдаг ноцтой өвчин юм. Энэ нь төрөлхийн, анхдагч, хоёрдогч шалтгаантай байж болох бөгөөд 40-өөс дээш насныхан урьдчилан сэргийлэх үзлэгт тогтмол хамрагдаж, эрт оношлуулах нь хараагаа хадгалах хамгийн чухал арга юм

10/03/2026

ЭМ УУХДАА ГАРГАДАГ ТҮГЭЭМЭЛ ТАВАН АЛДААГ ТАНИЛЦУУЛЖ БАЙНА.

1. Эмээ буруу зүйлээр даруулж уух
Гарт таарсан зүйлээрээ даруулж уудаг. Энэ нь эмийн үйлчилгээг сулруулдаг. Үүнд: • Кофе, хийжүүлсэн ундаа (эмийг хурдан уусгадаг) • Цай (эмийн бодисын шимэгдэх үйл ажиллагааг удаашруулдаг) • Сүү, сүүн бүтээгдэхүүн (антибиотикийн үйлчилгээг сулруулна) • Жүүс (эмийн бодисын солилцоог алдагдуулна) Эмийг даруулж уух онцын зааварчилгаа байхгүй бол тасалгааны хэмтэй цэвэр усаар даруулж ууна.
2. Хоол хүнс
Ихэнх эм хоол идсэний дараа уух заавартай байдаг. Эмийн эмчилгээний үеэр эмчлүүлэгч хоолны дэглэм баримтлах нь маш чухал, тиймээс эм ууж эхлэхээс өмнө эмийн заавартай нарийн танилцаж шаардлагатай бол хоолны дэглэмдээ өөрчлөлт оруулна. Мөн хоол идсэний дараагаар эм уух нь ходоод цочрохоос сэргийлдэг.
3. Эм уух хуваарь
Зарим нэг эм, тэр дундаа антибиотик уухдаа эмчийн зааврын дагуу цагаа маш сайн баримтлахыг шаарддаг. Цагтаа уугаагүй эм нь биед хуримтлагдах эсвэл зохих үйлчилгээг үзүүлэхгүй байх талтай.
4. Эмийн харилцан үйлчлэл
Таны ууж байгаа эм өөр бусад эмтэй зохицох эсэх талаар тусгай зааварчилгаа байхгүй ч гэлээ та нэг дор олон эм ууж хэрхэвч болохгүй. Мэргэжилтнүүд эм уухдаа хоорондын зай нь 15-30 минут байх ёстойг анхааруулж байна.
5. Эмчилгээнээс татгалзах
Бие дээрдэх анхны шинж тэмдгээс эхлээд л хүмүүс эмээ уухаа больдог. Энэ бол маш том алдаа бөгөөд өвчнийг архагшуулах талтай. Эмийг эмчийн бичиж өгсөн хугацаанд эсвэл зааварт дурдсан хугацааг дуустал ууна.

10/03/2026

БНСУ-ЫН ТЕЖОН ХОТЫН "САН" ЭМНЭЛЭГТЭЙ ХАМТРАН АЖИЛЛАНА

Бүгд Найрамдах Солонгос Улсын Тэжон хотын Сан эмнэлгийн хамтын ажиллагааны төвийн Ерөнхий менежер Ян Ён-вонгоор ахлуулсан төлөөлөгчид болон Олон улсын хүмүүнлэгийн байгууллага болох “Ротари клуб”-ын салбар “Мөрөн Хүрээ Ротари клуб”-ын гишүүд Хөвсгөл аймагт ажиллаж аймгийн болон ЭМБ-ын удирдлагуудтай уулзалт зохион байгууллаа.
Уулзалтаар хоёр улсын эрүүл мэндийн салбарын хамтын ажиллагааг өргөжүүлэх, цаашдын хамтын ажиллагааны боломжийн талаар санал солилцлоо. Төлөөлөгчид аймгийн Нэгдсэн эмнэлгийн яаралтай тусламжийн тасаг, дүрс оношлогоо, лаборатори, уламжлалт болон сэргээн засах кабинетын үйл ажиллагаатай танилцаж, эмнэлгийн тусламж үйлчилгээний нөхцөл байдал, хэрэгцээ шаардлагын талаар мэдээлэл авлаа.
Уулзалтын үр дүнд БНСУ-ын Тэжон хотын "Сан" эмнэлгийн хамтын ажиллагааны төвтэй цаашид хамтран ажиллах, эрүүл мэндийн салбарын эмч, мэргэжилтнүүдийг туршлага судлуулах, сургаж чадавхжуулах, шаардлагатай тоног төхөөрөмжөөр дэмжлэг үзүүлэх чиглэлээр хамтын ажиллагааг эхлүүлэхээр тохиролцлоо.

09/03/2026

ХҮНИЙ ЭМЗЭГ МЭДЭЭЛЭЛ ГЭЖ ЮУ ВЭ?

Хүний хувийн мэдээлэл нь тухайн иргэний нэр төр, халдашгүй байдал, аюулгүй байдлыг хамгаалах чухал ач холбогдолтой байдаг. Түүний дотроос илүү өндөр түвшний хамгаалалт шаарддаг мэдээллийг хүний эмзэг мэдээлэл гэж үздэг.
Хүний хувийн мэдээллийг хамгаалах тухай хуульд зааснаар “хүний эмзэг мэдээлэл” гэдэгт дараах мэдээллүүд хамаарна. Үүнд:
- Хүний үндэс, угсаа
- Шашин шүтлэг, итгэл үнэмшил
- Эрүүл мэндийн мэдээлэл
- Захидал харилцааны нууц
- Генетик болон биометрик мэдээлэл
- Тоон гарын үсгийн хувийн түлхүүр
- Ял эдэлж байгаа болон ял эдэлсэн эсэх талаарх мэдээлэл
- Бэлгийн болон хүйсийн чиг баримжааны талаарх мэдээллүүд багтдаг.
Эдгээр мэдээлэл нь тухайн хүний хувийн амьдрал, нэр төр, аюулгүй байдалтай шууд холбоотой тул хууль тогтоомжоор тусгайлан хамгаалдаг.
Хэрэв эмзэг мэдээлэл задрах, алдагдах, хууль бусаар ашиглагдах тохиолдолд тухайн хүнийг ялгаварлан гадуурхах, нэр хүндэд нь халдах, эсвэл бусад байдлаар хохироох эрсдэлтэй.
Иймээс иргэн бүр өөрийн эмзэг мэдээллийг хамгаалах, цахим орчинд болгоомжтой хандах, баталгаагүй эх сурвалжид хувийн мэдээллээ дамжуулахгүй байх нь чухал юм.
Хэрэв таны эмзэг мэдээлэл алдагдсан эсвэл зөвшөөрөлгүйгээр ашиглагдсан тохиолдолд холбогдох хууль, журмын дагуу хууль хяналтын байгууллагад хандаж, өөрийн эрхийг хамгаалуулах боломжтой.
Тиймээс хувийн мэдээллээ хамгаалах нь таны аюулгүй байдлыг хамгаалах чухал алхам юм.

08/03/2026

ЭРҮҮЛ МЭНДИЙН ДЭД САЙД Г.НОМИН
Баярын өдөр үүрэгт ажлаа гүйцэтгэж байгаа Хөвсгөл аймгийн Нэгдсэн эмнэлгийн эмэгтэй алба хаагчид, эмч сувилагчид, Төрөх тасагт амаржсан эх нярайд "ОЛОН УЛСЫН ЭМЭГТЭЙЧҮҮДИЙН ЭРХИЙГ ХАМГААЛАХ ӨДӨР"-ийн баярын мэндчилгээ хүргэлээ.

06/03/2026

📢 Нээлттэй өдөрлөг – Дэлхийн Глаукомын долоо хоног 2026
Дэлхийн Глаукомын долоо хоногийг тохиолдуулан 2026 оны 3-р сарын 10-ны Мягмар гарагт 09:00–17:00 цагийн хооронд Хөвсгөл аймгийн Нэгдсэн эмнэлэгт зохион байгуулагдах нээлттэй өдөрлөгт Та бүхнийг урьж байна.
Тус өдөрлөгийг Дезерет Олон Улсын Энэрэлийн Байгууллагын хандиваар, Орбис Монгол байгууллагын хэрэгжүүлж буй “Хиймэл оюун ухаанд суурилсан глаукомын тусламж үйлчилгээ” төслийн хүрээнд зохион байгуулж байна.
Өдөрлөгийн үеэр Японы Topcon брэндийн нүдний угийн камераар зураг авч, Cybersight AI программ ашиглан глауком болон чихрийн шижингийн ретинопати өвчнийг эрт илрүүлж, үнэлгээ/оношилгоо хийнэ.
✅ Энэхүү үйлчилгээ нь цаашид ажлын өдөр бүр тогтмол үргэлжилнэ.
Та бүхнийг өргөнөөр үйлчлүүлэхийг урьж байна.

05/03/2026

✅"ХООЛНЫ ЗӨВ СОНГОЛТ-ХОДООД БАЯРЛУУЛНА" аян үргэлжилж байна.

✅ХООЛ ХҮНСНИЙ ЗОХИСТОЙ ХЭРЭГЛЭЭ ГЭЖ ЮУ ВЭ?

Хоол хүнсний зохистой хэрэглээ гэдэг хүний бие махбодын өсөлт, эрүүл мэнд, хөдөлмөрийн чадвар, өвчин эмгэгээс урьдчилан сэргийлэхэд шаардлагатай шим тэжээлийг зохистой хэмжээгээр, тэнцвэртэй, зөв горимоор хэрэглэхийг хэлнэ.
Жишээлбэл, ханасан өөх тос, элсэн чихэр , давс зэргийг их хэмжээгээр агуулсан бүтээгдэхүүнүүд нь эрүүл мэндэд сөрөг нөлөө үзүүлдэг. Түүнчлэн боловсруулсан мах болон өндөр боловсруулалттай,хүнсийг хэтрүүлэн хэрэглэх нь эрүүл мэндэд аюултай.
Шинжлэх ухааны судалгаагаар насанд хүрэгчдийн улаан махны хэт их хэрэглээ нь зүрх судасны өвчин, чихрийн шижин, зарим төрлийн хорт хавдар зэрэг олон өвчний эрсдэлийг нэмэгдүүлдэг болох нь тогтоогдсон. Мөн боловсруулсан улаан махыг бага хэмжээгээр хэрэглэсэн ч эрүүл мэндэд сөрөг үр дагавар үзүүлэх магадлалтай гэж үздэг.

03/03/2026

МЕНИНГОКОККТ ХАЛДВАРААС УРЬДЧИЛАН СЭРГИЙЛЬЕ

👉Өглөө босоод мөн орой унтахын өмнө бүлээн ус, саримс, нимбэг, царвангийн уусмалын аль нэгээр хоолойгоо тогтмол зайлаарай