Байгууллагын товч таницуулга
Сонгинохайрхан дүүргийн нэгдсэн эмнэлэг нь 1982 онд тухайн үеийн Октябрийн районы нутаг дэвсгэр авто сургуулийн баруун өмнө, мах комбинатын зүүн хэсэгт Октябрийн районы Нэгдсэн эмнэлгийн бааз дээр түшиглэн Октябрийн районы Хүүхдийн нэгдсэн эмнэлэг байгуулах шийдвэрийг Сайд нарын зөвлөлийн тогтоолын дагуу Эрүүлийг хамгаалах яам, Улаанбаатар хотын АДХГЗ гаргаж анх үүсэн байгуулагдсан билээ. Эмнэлгийн барилгыг үндсэнд нь 1982 оны 10 дугаар сарын 05-ны өдөр хүлээж авсан протоколыг гаргасан бөгөөд Октябрийн районы хүүхдийн нэгдсэн эмнэлэг нь бүрэлдэхүүндээ 120 ортой стационар, өдөрт 300 гаруй хүнд үзлэг хийх хүчин чадал бүхий поликлиник , нэгдсэн параклиник /лаборатори,эмийн сан, рентген, физик эмчилгээ зэрэг/ кабинеттай, хүүхдийн 9 нэгдсэн цэг хэсэгтэй, хүүхдийн түргэн, сургууль цэцэрлэгийн эмч нартай байв.
1991 он нийслэлийн эрүүл мэндийн байгууллагын түүхэнд онцлон тэмдэглэх үйл явдлаар нилээн дүүрэн жил байсан.
Нийслэл хотын хүн ам өссөнтэй холбогдуулан нийслэл хот дахь эрүүл мэндийн байгууллагуудын зохион байгуулалтыг боловсронгуй болгох, үйлчилгээний байгууллагын шат дамжлагыг сайжруулах зорилгоор гарсан Эрүүл мэндийн яам, Улаанбаатар хотын АДХГЗ-ны 1991 оны 03 дугаар сарын 26-ны өдрийн А/39/83 тоот тушаалаар Хүүхдийн нэгдсэн 3 дугаар эмнэлэг болгон өөрчилжээ. Нийслэлийн эрүүл мэндийн газар, Сонгинохайрхан дүүргийн Засаг даргын хамтарсан 1995 оны 02 дугаар сарын 20-ны өдрийн 14 тоот тушаалаар насанд хүрэгчдэд дотор, мэдрэлийн чиглэлээр үйлчлэх дотрын тасаг нээж ажиллуулсан.
2001 он хүртэл Хүүхдийн нэгдсэн 3-р эмнэлэг гэж нэрлэгдэж байгаад 2001 онд Эрүүл мэндийн сайд, Нийслэлийн Засаг даргын хамтарсан 98/197 тушаал, захирамжаар “Сонгинохайрхан дүүргийн нэгдсэн эмнэлэг”-ийн статустай ажиллаж байна.
