27/10/2025
“Сүрьеэгүй Завхан” – Хүүхэд бүрд сүрьеэгүй ирээдүй
Сургуулийн насны хүүхэд, өсвөр үеийнхнийг сүрьеэгээс хамгаалах зорилготой “Сүрьеэгүй Завхан” төсөл Завхан аймагт хэрэгжиж эхэллээ.
Энэхүү санаачилга нь Жонс Хопкинсийн их сургуулийн Johns Hopkins Medicine “Zero TB in Kids” төслийн хүрээнд Монгол Улсад хэрэгжиж буй анхны салбар төсөл юм. Төслийг Дилав Хутагт Сан санаачлан, Халдварт Өвчин Судлалын Үндэсний Төв, Завхан аймгийн Засаг даргын Тамгын газар, Завхан Эрүүл мэндийн газар -тай хамтран 2025 оны аравдугаар сараас хэрэгжүүлж эхэлжээ.
Төслийн хүрээнд хүүхэд, өсвөр үеийнхэн болон олон хүн төвлөрдөг сургууль, дотуур байр зэрэг “кластер бүсүүд”-эд сүрьеэгийн илрүүлэг, шинжилгээг зохион байгуулж, урьдчилан сэргийлэх эмчилгээнд хамруулах ажлыг шат дараатайгаар хэрэгжүүлэх юм. Ингэснээр аймгийн хэмжээнд сүрьеэгийн халдварын тархалтыг бууруулах, хүүхэд бүрийг эрүүл, аюулгүй орчинд өсч хүмүүжих нөхцөлийг бүрдүүлэхийг зорьж байна.
Төслийн нээлтийн хүрээнд 2025 оны аравдугаар сарын 17-нд Завхан аймгийн Улиастай сумын ерөнхий боловсролын Чандмань-Эрдэнэ сургууль дээр “Сүрьеэ өвчнийг таниулах өдөрлөг” зохион байгуулагдлаа. Өдөрлөгийн үеэр хүүхэд, эцэг эх, сурган хүмүүжүүлэгчдэд сүрьеэ өвчний талаарх зөв мэдлэг олгож, урьдчилан сэргийлэх дадал хэвшлийг төлөвшүүлэх зорилгоор сургалт, танин мэдэхүйн үйл ажиллагаа өрнүүлсэн юм.
Төслийн албан ёсны нээлт энэ сарын 29-ний өдөр Улиастай хотод болох бөгөөд аймгийн хэмжээнд сүрьеэгийн эсрэг өргөн хүрээний арга хэмжээг эхлүүлэх томоохон үйл явдал болох юм.
#сүрьеэгүйзавхан
