16/11/2025
🦷MÅNADENS PASIENT - BORR🦷
Borr vart funnen i ein silo i Sogndal som liten kattunge – og vart adoptert saman med systera si, Tirill. Begge to bur no hos ein av klinikkassistentane våre – og lever det aller beste kattelivet 😻😻.
Då Borr nyleg plutseleg byrja å leggje att smular i matskåla og miste litt matlyst, var ikkje eigaren sein med å tinge time til undersøking hjå oss. Ved vanleg inspeksjon av munnhola såg vi ingenting dramatisk – kun litt irritasjon i tannkjøtet ved to tenner. Men då vi tok tannrøntgen, viste det seg at begge desse tennene hadde tannresorpsjon (TR, også kjend som FORL – feline odontoclastic resorptive lesions) – ein smertefull tannsjukdom hos katt, der kroppen sjølv bryt ned tanna. På røntgen ser slike tenner ofte mølletne ut 😿. Årsaka er ikkje heilt kjend, men både immunreaksjonar, genetikk og betennelse kan spele inn. Dette er faktisk ein av dei vanlegaste tannsjukdomane hjå katt; rundt ein tredel av alle kattar får TR i løpet av livet 🙀.
To av tennene til Borr måtte fjernast, og sidan har han vore sitt gamle, fornøgde eg att – matglad og smulefri.
Vi tilrår årleg helsesjekk av alle kattar – gjerne kombinert med vaksinering. Om vi ser teikn til irritasjon i tannkjøtet, tilrår vi ein ny time med tannrøntgen. Det er ofte den einaste måten å oppdage tannresorpsjon tidleg – før katten får vondt. Borr kjem no inn til tannrøntgen kvar sjette månad, slik at vi kan følgje med og fange opp eventuelle nye forandringar i god tid.
Takk til Borr og matmor for å minne oss på kor viktig det er å ta endringar i kattens åtferd på alvor – og for å vise kor viktig det er med jamlege tannsjekkar ❤️.
