25/11/2025
भारतीय वायुसेनाका पाइलट तथा टेजस जेटका उडान–प्रदर्शन विशेषज्ञ विङ कमान्डर नमंश स्याल दुबई एयरशोमा भएको दुर्घटनामा ज्यान गुमाएपछि उनकाे पत्नी अफ्सान, जो स्वयं भारतीय वायुसेनाकी पाइलट हुन्, गम्भीर शोकमा परेकी छन्। एकै पेशामा भएर आकाशलाई आफ्नै सपना बनाएका दम्पतिको जीवन यस घटनाले अचानक भत्किएको छ।
शुक्रबार स्थानीय समय अनुसार २:०८ बजे टेजस LCA Mk-1 लाइट फाइटर जेट एरियल मनुभर गर्दै गर्दा दुर्घटनामा पर्दा स्यालको मृत्यु भएको हो। विमान लूप बनाउँदै उल्टो स्थितिबाट पुनः उचाइ लिन नसकेपछि केही सेकेन्डमै जेट जमिनमा ठोक्किएको र कालो धुवाँको मुस्लो उठेको प्रत्यक्षदर्शीहरूले बताएका छन्। प्रारम्भिक मूल्यांकन अनुसार जेट पर्याप्त गति र उचाइमा नहुँदा पुनः नियन्त्रण सम्भव नभएको बताइन्छ।
हिमाचल प्रदेशका काङ्ग्रा जिल्लाका स्याल भारतीय वायुसेनाका उत्कृष्ट युवा पाइलटमध्ये एक मानिन्थे। ककपिटमा उनी शान्त, सुचिन्तित र अत्यन्तै पेशेवर पाइलटका रूपमा परिचित थिए। टेजस जेट दुबई एयरशोमा भारतको क्षमताको उच्च स्तरको प्रदर्शन गर्न पठाइएको थियो, तर यही प्रदर्शन क्रममा उनी मृत्युको चपेटामा परे।
भारतीय सञ्चारमाध्यमका अनुसार नमंश स्यालकी पत्नी अफ्सान पनि भारतीय वायुसेनाकै अफिसर तथा पाइलट हुन्। एउटै पेशा, एउटै जुनून र एउटै उडान–जीवन बाँडेका दम्पतिमा यस्तो दुर्घटनाले गम्भीर मनोवैज्ञानिक प्रभाव पारेको बताइन्छ।
दुबै आकाशमा करियर बनाएका कारण “उडान नै जीवन” मान्ने दम्पतिमध्ये अब एकजना मात्र बाँकी रहनुले यस घटनालाई अझ भावनात्मक बनाइदिएको छ।
हिमाचल प्रदेशका मुख्यमन्त्री सुखविन्दर सिंह सु्खुले सामाजिक सञ्जाल X मा लेख्दै स्याललाई श्रद्धाञ्जलि समेत दिएका छन्। उनले भने,
“दुबई एयरशोमा भएको दुर्घटनामा काङ्ग्राको बहादुर छोरा नमंश स्यालको निधन अत्यन्त पीडादायी छ। राष्ट्रले एक साहसी र कर्तव्यनिष्ठ पाइलट गुमाएको छ।”
२४ वर्षको सेवायात्रामा टेजस लडाकु विमानका केवल दुई दुर्घटना रेकर्ड भए पनि यस पटकको दुर्घटनाले भारतको स्वदेशी विमान परियोजना र सुरक्षा मूल्यांकनबारे फेरि प्रश्न उठाएको छ। भारतीय वायुसेनाले दुर्घटनाको विस्तृत अनुसन्धान सुरु गरेको बताएको छ।
दुबईको आकाशमा प्रदर्शन गरिरहेको टेजसको दुर्घटनाले केवल भारतको सैन्य क्षमता मात्र होइन, एक पाइलट दम्पतिको साझा सपना पनि भत्काइदिएको छ। अफ्सानका लागि यो क्षति व्यक्तिगत, पेशागत र जीवनभरको घाउका रूपमा रहने आकलन गरिन्छ।
