01/11/2025
धरानस्थित बीपी कोइराला स्वास्थ्य विज्ञान प्रतिष्ठानले नियम उल्लङ्घन र अनुशासनहीन कार्यको कारण पाँच कर्मचारीलाई पदमुक्त गरेको छ। साथै, केही अन्य कर्मचारीमाथि विभागीय कारबाही गरिएको छ र थप जाँचपछी अन्यमाथि पनि कारबाहीको तयारी भइरहेको बताइएको छ।
बर्खास्त गरिएका मध्ये एक जना स्त्रीरोग विशेषज्ञ चिकित्सक तथा पूर्व रजिस्ट्रार रहेका छन्, जसले काज अवधि सकिएपछि पनि हाजिरी नदिएर नियम तोडेका थिए। उनका साथमा अध्ययन बिदा स्वीकृत नगराई विदेश गएकी एक प्राध्यापकलाई पनि पदबाट हटाइएको छ।
अन्य तीन कर्मचारीहरूलाई काममा लापरबाही, प्रशासनिक नियम उल्लङ्घन र अनुशासनहीन व्यवहारको कारण अपदस्थ गरिएको छ। यस्तै, केही अधिकारीहरूलाई तह घटाउने कारबाही पनि गरिएको छ।
प्रतिष्ठानका रजिस्ट्रारका अनुसार, संस्थामा बढ्दो अनियमितता र अनुशासनहीनतालाई नियन्त्रण गर्न कडाइ गरिएको हो। उनले भने, “संस्थाको प्रतिष्ठा जोगाउन कसैसँग सम्झौता गरिँदैन।”
