10/05/2023
PAGPALANGGA SANG ISA KA ANAK SA IYA AMAY SA PIHAK SANG KAPIGADUHON
Viral karon sa social media ang ginpakigbahin sang isa ka estudyante nga si Alwen Joy Rufino sang Concepcion, Iloilo ang iya inagyan nga sa pihak sang mabudlay sini nga sitwasyon, nahimo nya pa nga hatagan sang pagkaon ang iya amay apisar nga ginakapos sa alawans.
Bangud sa sini nga post madamo ang natandog nga mga balatyagon sa diin dapat mangin kuntento kag magpasalamat kon pila man ang ginahatag nga alawans kag ulikdon ang sakripisyo nga ginahimo sang ginikanan para sa kabataan.
Ang nasambit nga post naglab ot sa 22k ka mga reactions kag 11k ka mga share.
Yari ang kabilogan nga Fb post ni Alwen Joy Rufino;
Earlier today ara ko sa bhauz sng friend ko ,nakabaton ko tawag halin kay mama nga kadtuan ko kuno si papa sa baybay kag baklan sang kan-on kag sud-an bisan utan lang kay wla pa sya kakaon.Paglantaw ko sa akon kwrta sbra nalang 150 ipaigo ko pa sa sunod adlaw pero sge lang.
Dali-dali ko bakal sa karenderya . 3 ka serve nga kan-on gn bakal ko bale 30pesos , then utan nga 30pesos man kag may sbra paman akon kwrta nagbakal ko 30pesos man nga afritada .Kag tubig nga 20 pesos.Wla ko na gn mind kun may mabilin pa sa akon nga allowance or wla na. Basta importante madul-ongan ko si papa.
Nagdali-dali ko dayun kadtu sa iya sa baybay , abtan ko siya gabantay sng amon pamboat kay dugay2 gamadlos base makapan.
Pag-abot ko gin daho ko sa iya ang gn bakal ko . Hmbl ya , baw kadamo gid sini gha haw , ti may kwrta kapa da ? OO lng ang sabat ko. Bsan wla na . Naubos ni papa Ang 2 ka serve nga kan-on kg ang utan , gutom2 gid sya sng time nga to bal an ko . Naagwanta yalang kay 50 ang gn bilin ni mama sa iya kay wla na kwrta .Samtang gakaon sya , ginahimutaran ko gid sya while gatulok siya sa lawod kag namangkot sa akon kon pila ang balaydan sa graduation.Sabat ko dako gru pa. Ang hambal ya ,pangitaan ta ina paagi.
Ngaa gn share ko ni? Kay bal-an ko damo sa aton ga rant about sa ginahatag nga allowance sang aton ginikanan. Kun gamay nga sintimo ang ginahatag ,dayun ta pudag-pudag kag mangakig sa ila. Pero wala ta ginapanumdom ang sakripisyo nga ila ginahimo mapa ayo lang ang aton kahimtangan.
SIGE LANG PA, kaya paman namun mg antos basta may pamelete lng kg bakal sud- an ah ,BAL-AN KO MAABOT GID ANG ORAS NGA KITA NAMAN ANG PABORAN SANG PANAHON 🙌
📷 Alwen Joy Rufino
By: Gabriel Cabanalan Canag Cantomayor | May 3, 2023
