Brgy. Kaparangan BHERT

04/07/2025

04/07/2025

ALAM NIYO BA?
Ngayong July 2025 ang ika-51 anibersaryo ng selebrasyon ng National Nutriton Month na may temang "Food at Nutrition Security, Maging Priority: Sapat na Pagkain, Karapatan Natin!", at ito'y umiikot pa rin sa tema ng 2023-2028 na "Sa PPAN: Sama-sama sa Nutrisyong Sapat Para sa Lahat!".

Kasama ang buong Pamahalaang Panlalawigan ng Bataan, nakikiisa ang Bataan Provincial Health Office sa pagdiriwang na ito. Gayundin, hinihikayat ang lahat na makiisa sa mga programa at mga polisiyang ipinatutupad upang makamit ang seguridad sa masustansyang pagkain at tuluyang mapababa ang malnutrisyon dito sa Lalawigan ng Bataan.

Tandaan, ang laban sa malnutrisyon ay makakamit kung ang lahat ng sektor ng pamayanan ay sasali sa epektibong pagpapatupad ng mga programa't polisiya para sa pagkamit ng sapat na produksyon ng masusustansyang pagkain.

Dapat din nating isaalang-alang na hindi basta "pagkain" lang ang isa sa mga pangunahing pangangailangan ng tao kundi dapat ay "masustansyang pagkain". Karapatan din ng isang tao na makatiyak sa access ng sapat na suplay ng masustansyang pagkain at malinis na tubig.

Suportahan ang mga ipinatutupad na ordinansa dito sa Bataan, sama-sama nating gawing prayoridad ang seguridad sa masustansyang pagkain para sa mas matatag na pamilyang Bataeño.

04/07/2025

ALAM NIYO BA?
Hindi lamang sa taong gumagamit may epekto ang ipinagbabawal na gamot. Malaki rin ang naidudulot na negatibong epekto nito sa pamilya at komunidad. Ayon sa World Health Organization (WHO), ang iligal na paggawa, pagbebenta, at paggamit nito ay konektado sa mga krimen gaya ng human trafficking, online scamming, lalo't pati na sa kondisyon sa kalusugan na kadalasang nauuwi sa malulubhang karamdaman at kamatayan.

Kaakibat nito ay nais bigyang-diin ng Provincial Health Office ang pag-asa para sa mga indibidwal na nasa madilim na mundo ng droga. Ipinapaalala na hindi pa huli ang lahat, mayroon pang oras at pagkakataon para umahon mula sa inyong pagkakalunod sa paggamit ng iligal na droga. Maaari kayong magtungo sa pinakamalapit na RHU sa inyong lugar dahil ang lokal na pamahalaan dito sa Bataan ay mayroong programang 'Community-Based Drug Rehabilitation Program' (CBDRP) na naglalayong magbigay ng suporta at tulong para sa mas epektibong pagtigil ng bisyo.

Tandaan, kapalit ng panandaliang libang na dulot ng droga ay ang pagkasira ng inyong mental at pisikal na kalusugan, pagkawasak ng pamilya, at pagkasira ng inyong maayos na estado sa lipunan. Bukod pa rito ay mataas din ang tyansang ikaw ay makulong, at magdulot ng pagkabaliw o kamatayan.

Iwasan ang droga, maging matalino sa inyong pipiliing landas. Kailanman ay hindi nakapagbigay ng magandang buhay ang droga kaninuman. Sama-sama tayo sa pagpili ng mas maliwanag na kinabukasan.

04/07/2025

ALAM NIYO BA?
Mahalaga ding bigyan-pansin ang kalusugan ni kuya, tatay, at ni lolo.

Ayon sa datos, mas marami pa rin ang bilang ng mga kalalakihang mayroong unhealthy lifestyle, sanhi kung bakit sila ay lapitin sa sakit. Kaya't ngayong Men's Health Month, nais ipaalala ng Bataan Provincial Health Office na huwag baliwalain ang kalusugan ng mga kalalakihan, magtungo sa pinakamalapit na primary care facility sa inyong lugar.

Sanayin ang sarili sa healthy lifestyle. Umiwas sa mga bisyo gaya ng paninigarilyo, va**ng, pag-inom ng alak, at palaging kumain ng sapat at may wastong nutrisyon. Ipinapaalala rin na umiwas sa mga gawaing magbibigay ng mga nakahahawang sakit gaya ng mga sexually transmitted infections.

Mahalaga rin na bigyang pansin ang inyong kalusugang pangkaisipan. Maaari kayong magtungo sa pinakamalapit na barangay health station dahil ang mga frontline healthcare workers dito sa Bataan ay dumaan sa Tulong, Alalay, at Gabay training.

Para sa mas matibay na Bataan, pahalagahan ang ating mga kuya, tatay, at lolo dahil 'Kalusugan ni Juan, Lakas ng Bayan: Sama-samang Akyson para sa Kapakanan ng mga Kalalakihan!'

20/06/2025

TINGNAN: Sa isinagawang malawakang Operation Timbang (OPT) Plus sa buong lalawigan ng Bataan, isang magandang resulta ang aming ibinabalita matapos makapagtala ang lahat ng munisipalidad at lungsod dito sa Bataan ng mababang bilang ng mga batang malnourished. Ito ay mula sa resulta ng 76,679 na mga batang 0-59 months na natimbang noong buwan ng Enero hanggang Marso o 85.4% ng estimated na bilang ng mga batang 0-59 months dito sa buong lalawigan.

Sa kabuuan, 2.07% lamang o 1,593 ang bilang ng mga batang underweight at severe underweight o 'yong mga may mabababang timbang na hindi naaayon sa kanilang edad at taas.

Gayundin, bumaba ang bilang ng mga batang stunted and severe stunted o mga bansot sa lahat ng munisipalidad at lungsod dito sa Bataan, kung saan 3.2% na lamang o 2,449 ang bilang ng mga bansot mula sa kabuuang bilang ng batang natimbang sa lalawigan.

Habang 1.54% na lamang o 1,176 ang naitalang bilang ng mga batang moderate wasted and severe wasted o mga payat at sakitin. Samantala, 2.48% naman o 1,896 ang bilang ng mga batang overweight and obese o mga batang sobra sa wastong timbang.

Ang mga resultang ito ang makapagsasabing epektibo ang mga programang pang-nutrisyon at mga inisyatibong isinasagawa dito sa Lalawigan ng Bataan. Isang magandang epekto ng pagtutulungan ng Pamahalaang Panlalawigan ng Bataan, sa pamumuno ni Gov. Joet Garcia, Bataan Provincial Health Office, sa pangunguna ni Dr. Rosanna M. Buccahan, mga ahensyang miyembro ng Provincial/Municipal/Barangay Nutrition Committe, at mga healthcare workers lalo na ang mga Barangay Nutrition Scholars (BNS).

Patuloy po nating ipamamalas ang dedikasyon para sa pagtataguyod ng tama at sapat na nutrisyon para sa lahat; at tuluyang wakasan ang malnutrisyon. Sama-sama tayo sa pagkamit ng isang malusog na komunidad para sa mas matatag na pamilyang Bataeño.

20/06/2025

PABATID: Sa kabila ng kumakalat na mga impormasyon tungkol sa rabies, nais ipabatid ng Bataan Provincial Health Office ang mga DOH-accredited Animal Bite Treatment Centers dito sa lalawigan ng Bataan:

Jose C. Payumo Jr. Memorial Hospital - San Ramon, Dinalupihan

Dinalupihan RHU III - Old San Jose, Dinalupihan

Hermosa RHU - Palihan, Hermosa

Orani District Hospital - Maria fe, Orani

Bataan General Hospital and Medical Center - Tenejero, Balanga City

Balanga City Health Center I - San Jose, Balanga City

Orion RHU - Wawa, Orion

Limay RHU - Townsite, Limay

Mariveles RHU I - Poblacion, Mariveles

Ayon sa datos, ang karaniwang pinagmumulan ng human rabies death ay kagat mula sa a*o. Dahil dito, ipinapayo ng Bataan PHO ang responsableng pangangalaga ng a*o at pusa. Ito pa rin ang pinakamabisang paraan upang masiguro na ang inyong mga alagang hayop ay hindi nagdadala ng rabies virus (lyssavirus).

Bukod sa a*o't pusa, ang rabies ay maaari ring magmula sa paniki, unggoy, at tao; maaari itong maipasa sa pamamagitan ng kagat, kalmot, o pagdila sa sugat; organ transplant mula sa taong namatay sa rabies; paglanghap ng maruming hangin mula sa tinitirahan ng apektadong paniki; at pagkain ng hilaw na karne ng hayop na may rabies.

Tandaan, ang rabies ay maaaring maagapan kung makukumpleto ang bakuna laban dito, ngunit kung hindi maaagapan ay tiyak na mauuwi sa kamatayan sa oras na lumabas na ang sintomas.

Maging responsable, pabakunahan ang inyong mga alagang hayop upang rabies ay maiwasan. Sama-sama tayo sa pagkamit ng isang ligtas na komunidad na puno ng responsable at matatag na pamilyang Bataeño.

30/05/2025

ALAM NIYO BA?
Ang thyroid ay isang glandula sa ating katawan na matatagpuan sa harapang bahagi ng ating leeg. Ito ang responsable sa pagbuo ng thyroid hormones na siya namang tumutulong sa atin na gumamit ng enerhiya mula sa mga pagkaing ating kinakain; mapanatili ang tamang init o temperatura ng ating katawan; at tumutulong sa ilang bahagi ng ating katawan na gampanan nang maayos ang kanilang mga tungkulin.

Kung kaya't ngayong World Thyroid Day, kinikilala ng Bataan Provincial Health Office ang importansya ng glandulang ito at ipinapaalala sa lahat na pahalagahan at alagaan ito sa pamamagitan ng:

-Pagsunod sa '10 Kumainments' at pagkain ng masusustansyang pagkain base sa rekomendasyon ng 'Pinggang Pinoy' at alinsunod sa ASIN Law o RA 8172 (Act of Salt Iodization Nationwide), isang batas na istriktong ipinatutupad sa Lalawigan ng Bataan upang masigurong may iodine na makukuha sa mga pagkaing may asin na makatutulong naman sa pagbuo ng thyroid hormones;

-Palaging mag-ehersisyo;

-Huwag manigarilyo o gumamit v**e, at iwasan din ang pag-inom ng alak.

Ipinapayo rin na magtungo sa pinakamalapit na health center o primary care facility sa inyong lugar upang magkaroon ng pagkakataong masuri ng eksperto ang inyong thyroid gland. Tandaan, ang maagang pagtuklas ay makatutulong upang maagang maagapan at magamot ang sakit.

Sama-sama tayo sa pagkamit ng isang malusog na komunidad para sa matatag na pamilyang
Bataeño.

30/05/2025

ALAM NIYO BA?
Isa sa mga pangunahing sanhi ng pagkamatay ng tao sa buong mundo ay ang aksidente sa kalsada. Kaya't ngayong Road Safety Month, ipinapaalala ng Bataan Provincial Health Office na dagdag ingat sa lahat ng oras; maging responsableng Bataeño at sundin ang mga sumusunod:
-Sa pagtawid, tingnan ang magkabilang direksyon at tumawid lamang sa tamang tawiran

-Maglakad sa sidewalks at tingnan ang daanang nilalakaran

-Kung magbibisikleta, gamitin ang nakalaang daan para sa mga bisikleta at maging alerto

-Kung magmamaneho ng de-motor na sasakyan, laging isaalang-alang ang kondisyon ng inyong
sasakyan;

-Bago magmaneho ay i-check ang preno, ilaw, langis, tubig, baterya, gulong, gas, at makina ng
sasakyan

-Magmaneho lamang kung ikaw ay nakapasa sa paper and practical exam ng LTO at mayroon nang lisensya para magmaneho

-Sundin ang mga batas trapiko

-Huwag magmaneho ng nakainom at huwag gumamit ng kahit anong mobile device habang nagmamaneho.

Tandaan, lahat tayo ay mayroong karapatang gumamit ng mga pampublikong daan, maging responsable sa paggamit ng mga kalsada upang maiwasan ang aksidenteng magaring magdulot ng pagkakulong, malubhang kalagayang medikal, o pagkamatay.

Sama-sama tayo sa pagkamit ng isang lalawigang mayroong ligtas na mga kalsada para sa matatag
na pamilyang Bataeño.

30/05/2025

ALAM NIYO BA?
Hindi pa rin nawawala ang banta ng tigdas sa mga chikiting. Ngayong napapanahon ang sakit na ito, muling ipinapaalala ng Bataan Provincial Health Office na kumpletuhin ang bakuna ng inyong mga anak kontra tigdas, dahil ang bakuna pa rin ang pinakamabisang paraan upang maiwasan ang pagkakaroon nito.

Ang tigdas ay isang nakahahawang sakit na maaaring maipasa sa pamamagitan ng paglanghap ng hanging may dala ng virus na ito. Tandaan, ito ay hindi lang simpleng sakit dahil maaari rin itong mauwi sa kamatayan kung hindi mabibigyang pansin.

Gawing protektado at bibo ang inyong mga anak. Tanggalin ang inyong alalahanin, magtungo sa pinakamalapit na health center sa inyong lugar upang malaman ang schedule ng pagbabakuna, ito ay ligtas, mabisa, at libre. Gawing fully-immunized child ang inyong mga anak, dahil ang batang bakunado, bibo.

Sama-sama tayo sa pagkamit ng isang malusog at protektadong komunidad para sa mas matatag na pamilyang Bataeño.

30/05/2025

MULING PAALALA: Dahil sa pagbuhos ng ulan nitong mga nagdaang gabi, muling ipinapaalala ng Bataan Provincial Health Office na ugaliin ang pagsasagawa ng 'search and destroy'.

Sa kasalukuyan ay nananatili pa ring mataas ang bilang ng ka*o ng mga nagkakasakit ng dengue dito sa Central Luzon. Tandaan, hanggat mayroong mga lugar malapit sa mga kabahayan na maaaring pamugaran ng lamok ay patuloy pa ring magkakaroon ng ka*o ng dengue; kung kaya't hinihikayat ng PHO ang lahat na ugaliing suyurin at sirain ang mga pinamumugaran at pinangingitlugan ng mga ito. Protektahan ang sarili, magsuot ng mahahabang damit at gumamit ng mosquito repellent lotion.

Panatilihin ang kalinisan sa loob at labas ng inyong mga tahanan. Sama-sama tayo sa pagkamit ng masayang summer ng matatag na pamilyang Bataeño.

30/05/2025

ALAM NIYO BA?
Ang head and neck cancer ay tumutukoy sa cancer na namuo sa anumang bahagi ng ulo at leeg:
-Tenga
-Ilong, sinus, likod ng ilong
-Tonsil, lalamunan
-Gawaan ng laway
-Leeg, thyroid/goiter
-Kulani
-Balat
Dahil dito, ang head and neck cancer ang pag-apat (4th) na may pinakamaraming ka*o ng cancer sa Pilipinas.

Kung kaya't ngayong 'Head and Neck Consciousness Week', ipinapaalala ng Bataan Provincial Health Office na bigyang pansin ang anumang hindi normal na nararamdaman sa alinman sa mga nabanggit na bahagi ng ulo at leeg. Magtungo agad sa pinakamalapit na health center para malaman kung ano ang mga dapat gawin at agad itong mabigyan ng medikal na atensyon. Tandaan, madaling maiiwasan ang pagkalat at paglala ng cancer kung ito'y agad masusuri.

Importante rin na iwasan ang mga bisyo katulad ng pag-inom ng alak, paninigarilyo, at paggamit ng v**e, dahil isa ito sa mga dahilan bakit nabubuo ang cancer sa katawan.

Ugaliin ang malusog na pamumuhay. Kumain lamang ng sapat at masusustansyang pagkain alinsunod sa Pinggang Pinoy at 10 Kumainments. Sanayin ang madalas na pag-eehersisyo at paggalaw ng katawan. Makilahok sa mga aktibidad ng Pamahalaang Panlalawigan ng Bataan gaya na lamang ng Hataw Takbo Bataan. Sama-sama tayo sa pagsulong ng 'healthy lifestyle' para sa matatag na pamilyang Bataeño.