24/11/2025
Isinagawa ang ika-apat na bugso (4th batch) ng School Caravan (Adolescent Health Symposium) ngayong taon sa Alimanguan National High School kanina, Nobyembre 24, 2025 na may temang "Tama at wastong Impormasyong Pagkalusugan, Susi sa Mas Responsable at Produktibong Kabataan".
Ang Health activity na ito ay taunang isinasagawa ng RHU- SAN Vicente Palawan na naglalayong makapagbigay ng tama at dagdag na kaalaman. Gayundin, itaas ang kamalayan ng mga kabataang mag-aaral partikular na pagdating sa usaping pangkalusugan na may kinalaman sa kanilang edad.
Ito ay nilahukan ng 142 Junior High School students ng nasabing paaralan. Pitumpo (70) ay mga lalaki at pitumput-dalawa (72) naman ay mga babae.
Binigyang diin sa nasabing aktibidad ang mga sumusunod:
1. Adolescent Reproductive Health
2. Adolescent Friendly Health Facility Services promotion
3. Substance Abuse among adolescents (Smoking, Alcohol and Drugs)
4. STI and HIV-AIDS Awareness & Prevention
5. Mental Health Awareness
Nagsagawa rin ng DIALOGUE sa pagitan ng San Vicente Rhu School Caravan Team at buong Faculty ng Alimanguan National High School. Ito ay sa inisyatibo ng RHU School Caravan Team kasunod nang pagpaunlak ni Ma'am Anie Pineda, School Principal. Tinalakay sa naturang Dialogue ang kasalukuyang estado ng ating bayan pagdating sa Teenage Pregnancy, STIs, HPV vaccination at promosyon ng School-based Immunization base sa mga datos na nakalap at naitala. Nagkaroon ng palitan ng mga kuru-kuro at bandang huli'y nakabuo ng mga inisyal na hakbang at estratehiya upang unti-unting mapababa ang kaso kung hindi man ito agarang masolusyunan.
Nagsilbing mga Speakers sina Nurse Joyce Llanzana-Abique, Nurse Nadine Ysabel Molo-Bacomo at Midwife Ma. Luz Agabe-Bigoy ng RHU na siyang may hawak din ng mga nasabing programa.
Sa kabuuhan ay naging maayos ang talakayan na aktibong nilahukan ng mga Junior High School Students ng nasabing paaralan. Nabigyan linaw ang kanilang mga katanungan at nakapagbahagi tayo ng mga bago at dagdag na kaalaman.
Bilang ebalwasyon sa naging impact ng isinagawang Health activity, namahagi ng mga Evaluation Forms ang organizing team sa mga kalahok. Nagkaroon din ng mga suhestiyon sa kung anong topic o usapin ang nais nilang talakayin kung sakaling maglulunsad muli nito sa susunod na taon.
Samantala, positibo ang naging Feedback ng mga mag-aaral at g**o ng nasabing paaralan. Kasunod nito, namahagi ng mga customized tote bags ang team para sa lahat ng kalahok at karagdagang customized pouch para sa mga aktibong nakilahok sa talakayan.
Sa pamunuan ng Alimanguan National High School sa pamumuno ni Ma'am Anie Pineda at sa tulong ni DepEd Nurse Kate Cris Kate Cris Talatagod - Gabo , ang RHU San Vicente School Caravan Team ay lubos pong nagpapasalamat.
Naniniwala ang RHU San Vicente na ang mga ganitong aktibidad ay magsisilbing instrumento upang mas maiparating sa publiko ang mga makabuluhan at napapanahong impormasyon, mabigyang linaw ang iba't ibang isyung pangkalusugan na kinasasangkutan ng mga kabataan ngayon at maiwasto ang mga maling paniniwalang kaugnay sa mga ito.
