Div HQs Teaching Hospital Mirpur Azad Kashmir

25/12/2025

20/12/2025

حکومت آزاد جموں و کشمیر نے ضلع میرپور میں صحت کے شعبے کو ایک بڑی سہولت فراہم کرتے ہوئے کشمیر انسٹیٹیوٹ آف یورولوجی اینڈ رینل ٹرانسپلانٹیشن سینٹر (KIUT) کے قیام کی اصولی منظوری دے دی ہے۔ اس حوالے سے محکمہ صحت آزاد حکومت ریاست جموں و کشمیر کی جانب سے باقاعدہ نوٹیفکیشن جاری کر دیا گیا ہے۔

نوٹیفکیشن کے مطابق مذکورہ ادارہ ڈویژنل ہیڈ کوارٹر ہسپتال میرپور کی نئی عمارت میں قائم کیا جائے گا، جس کا مقصد گردوں اور یورولوجی کے امراض میں مبتلا مریضوں کو جدید طبی سہولیات فراہم کرنا ہے۔ اس اقدام سے نہ صرف میرپور بلکہ پورے آزاد کشمیر کے مریض مستفید ہوں گے اور انہیں علاج کے لیے دیگر شہروں کا رخ نہیں کرنا پڑے گا۔

نوٹیفکیشن کے تحت پروفیسر ڈاکٹر اشفاق احمد، شعبہ یورولوجی ایم بی بی ایس میڈیکل کالج میرپور کو کشمیر انسٹیٹیوٹ آف یورولوجی اینڈ رینل ٹرانسپلانٹیشن سینٹر کے قیام، فنڈ ریزنگ اور دیگر انتظامی امور کے لیے فوکل پرسن نامزد کیا گیا ہے تاکہ منصوبے کو جلد از جلد عملی شکل دی جا سکے۔

اس موقع پر ڈویژنل ہیڈ کوارٹرز ٹیچنگ ہسپتال میرپور کے میڈیکل سپرنٹنڈنٹ ڈاکٹر عامر عزیز اور ڈپٹی میڈیکل سپرنٹنڈنٹ ڈاکٹر ماریہ زولفقار نے اس پیش رفت کو ضلع میرپور اور ملحقہ علاقوں کے لیے ایک سنگ میل قرار دیتے ہوئے کہا کہ جدید یورولوجی اور رینل ٹرانسپلانٹ سہولیات کی فراہمی سے عوام کو براہ راست فائدہ پہنچے گا۔

اسی موقع پر پرنسپل محترمہ بینظیر بھٹو شہید میڈیکل کالج پروفیسر ڈاکٹر فیصل بشیر نے اس فیصلے کو آزاد کشمیر کے طبی نظام کے لیے ایک اہم پیش رفت قرار دیتے ہوئے کہا کہ میڈیکل کالج اور تدریسی عملہ اس منصوبے کی کامیابی کے لیے ہر ممکن تعاون فراہم کرے گا، جبکہ یہ ادارہ مستقبل میں میڈیکل ایجوکیشن اور سپیشلائزڈ ٹریننگ کے فروغ میں بھی اہم کردار ادا کرے گا۔

انہوں نے حکومت آزاد کشمیر، وزیر صحت آزاد کشمیر، سیکرٹری صحت آزاد کشمیر اور محکمہ صحت کے اعلیٰ حکام کا شکریہ ادا کرتے ہوئے کہا کہ تمام متعلقہ ادارے باہمی تعاون سے اس منصوبے کو جلد پایۂ تکمیل تک پہنچائیں گے۔

طبی حلقوں اور عوامی سطح پر اس فیصلے کو خوش آئند قرار دیا جا رہا ہے اور توقع ظاہر کی جا رہی ہے کہ کشمیر انسٹیٹیوٹ آف یورولوجی اینڈ رینل ٹرانسپلانٹیشن سینٹر کے قیام سے آزاد کشمیر میں صحت کی سہولیات کے معیار میں نمایاں بہتری آئے گی

18/12/2025

قائم مقام میڈیکل سپرنٹنڈنٹ ڈاکٹر ماریہ زولفقار نے ہسپتال کے گائنی اور سرجیکل ڈیپارٹمنٹس کا تفصیلی دورہ کیا۔ دورے کے دوران انہوں نے مختلف وارڈز میں زیرِ علاج مریضوں کی فرداً فرداً عیادت کی اور علاج معالجے، نرسنگ کیئر، صفائی ستھرائی، دستیاب سہولیات اور ہسپتال انتظامیہ کی جانب سے فراہم کی جانے والی سروسز کے بارے میں مریضوں اور اُن کے لواحقین سے براہِ راست دریافت کیا
مریضوں اور اُن کے اہلِ خانہ نے مجموعی طور پر ہسپتال کی کارکردگی پر اطمینان کا اظہار کرتے ہوئے بتایا کہ ڈاکٹرز اور نرسنگ اسٹاف کا رویّہ ہمدردانہ ہے اور علاج بروقت فراہم کیا جا رہا ہے۔ دستیاب ادویات کے حوالے سے مریضوں نے بتایا کہ زیادہ تر ضروری ادویات ہسپتال فارمیسی سے باقاعدگی کے ساتھ فراہم کی جا رہی ہیں
قائم مقام میڈیکل سپرنٹنڈنٹ نے اس موقع پر فارمیسی، وارڈز اور دیگر سہولیات کا بھی جائزہ لیا اور متعلقہ افسران کو ہدایت کی کہ دستیاب وسائل کو بروئے کار لاتے ہوئے تمام تر ممکنہ سہولیات فراہم کی جائیں جبکہ کسی بھی ممکنہ کمی کی صورت میں فوری اقدامات کیے جائیں۔ انہوں نے مزید کہا کہ گائنی اور سرجیکل ڈیپارٹمنٹس میں صفائی، انفیکشن کنٹرول اور مریضوں کے ریکارڈ کی درست دیکھ بھال پر خصوصی توجہ دی جائے
ڈاکٹر ماریہ زولفقار نے واضح کیا کہ مریضوں کو معیاری، بروقت اور ہمدردانہ طبی سہولیات کی فراہمی ہسپتال انتظامیہ کی اولین ترجیح ہے اور اس مقصد کے لیے اچانک اور باقاعدہ وزٹس کا سلسلہ آئندہ بھی جاری رکھا جائے گا تاکہ عوام کو بہتر سے بہتر طبی سہولیات فراہم کی جا سکیں

11/12/2025

ڈویژنل ہیڈ کوارٹرز ٹیچنگ ہسپتال میرپور کے میڈیکل سپرنٹنڈنٹ ڈاکٹر عامر عزیز نے پیڈز وارڈ کے آئی سی یو میں جاری تعمیراتی کام، الیکٹریکل فٹنگز اور دیگر سہولیات کی فراہمی کا تفصیلی جائزہ لیا۔ انہوں نے متعلقہ انجینئرنگ و ٹیکنیکل اسٹاف کو ہدایت کی کہ کام کو تیز کیا جائے تاکہ آئی سی یو کو جلد از جلد مکمل طور پر فعال کرکے بچوں کے علاج معالجے کا سلسلہ بہتر انداز میں بحال کیا جاسکے۔ دورے کے دوران ڈپٹی میڈیکل سپرنٹنڈنٹ ڈاکٹر ماریہ زوالفقار ، ایڈیشنل میڈیکل سپرنٹنڈنٹ ڈاکٹر اویس زاہد، چائلڈ سپیشلسٹ ڈاکٹر خلیل احمد ، سینئر ڈاکٹر عالیہ امتیاز انچارج IPC ، انچارج ٹراما سینٹر ڈاکٹر حاجرہ تاثیر، سینئر فیمیل میڈیکل آفیسر ڈاکٹر فوزیہ ، ڈاکٹر نابیہ چوہدری ، ڈاکٹر طاہرہ بتول سمیت دیگر ڈاکٹرز، نرسز اور عملہ بھی ہمراہ موجود تھا۔ اس موقع پر میڈیکل سپرنٹنڈنٹ ڈاکٹر عامر عزیز نے پیڈز وارڈ کے لیے مخیر حضرات کی جانب سے فراہم کردہ نیبلائزرز اور آکسیجن ماسکس باقاعدہ طور پر پیڈز ڈیپارٹمنٹ کے ڈاکٹرز اور نرسنگ اسٹاف کے حوالے کیے۔ انہوں نے مخیر حضرات کے جذبۂ خدمت، ہسپتال کے ساتھ تعاون اور بچوں کی صحت کے لیے کی گئی اس قیمتی کاوش پر دلی شکریہ ادا کرتے ہوئے کہا کہ اس مشکل معاشی دور میں مریض بچوں کے لیے ضروری آلات کی فراہمی ایک عظیم خدمت ہے۔ ہم مخیر حضرات کے اس اقدام کو قدر کی نگاہ سے دیکھتے ہیں، اللہ تعالیٰ انہیں اس نیکی کا بہترین اجر عطا فرمائے۔ انہوں نے مزید کہا کہ ہسپتال کی بہتری میں عوامی تعاون انتہائی اہمیت رکھتا ہے اور انتظامیہ ہر اُس شخص کی معاونت کا خیر مقدم کرتی ہے جو صحت کے شعبہ کی بہتری میں کردار ادا کرنا چاہتا ہو۔ ڈاکٹر عامر عزیز نے اس عزم کا اعادہ کیا کہ پیڈز آئی سی یو کی جلد تکمیل انتظامیہ کی اولین ترجیحات میں شامل ہے اور بہت جلد آئی سی یو کو جدید سہولیات کے ساتھ مکمل طور پر فعال کر دیا جائے گا، جس سے کم عمر مریضوں کو معیاری علاج میسر آئے گا۔

08/12/2025

وزیراعظم آزادکشمیر راجہ فیصل ممتاز راٹھور سے ڈاکٹر عامر عزیز میڈیکل سپرنٹنڈنٹ ڈویژنل ہیڈکوارٹر ٹیچنگ ہسپتال میرپور کی ملاقات۔

ڈاکٹر عامر عزیز نے وزیراعظم آزادکشمیر کو منتخب ہونے پر مبارکباد دی۔

اس موقع پر وزیراعظم آزادکشمیر نے محمکمہ صحت کی بہتری کے حوالے سے اپنے ویژن کے حوالے سے اظہارِ خیال کیا۔

میڈیکل سپرنٹنڈنٹ ڈاکٹر عامر عزیز نے ہسپتال میں ہونے والی مختلف سرگرمیوں بالخصوص آٹومیشن کے حوالے سے بریفنگ دی۔

میڈیکل سپرنٹنڈنٹ ڈاکٹر عامر عزیز نے وزیراعظم آزادکشمیر کو ڈویژنل ہیڈکوارٹر ٹیچنگ ہسپتال میرپور کے تفصیلی دورے کی دعوت دی۔

29/11/2025

ڈویژنل ہیڈ کوارٹرز ٹیچنگ ہسپتال میرپور کے میڈیکل سپرنٹنڈنٹ ڈاکٹر عامر عزیز نے ہسپتال میں جاری ترقیاتی منصوبوں کے سلسلے میں فیز-II تعمیراتی کام کا جامع اور تفصیلی دورہ کیا۔ دورے کا مقصد ہسپتال کی مستقبل کی طبی ضروریات، بالخصوص جدید ریڈیالوجی خدمات اور آپریشن تھیٹر کی سہولیات کو مزید بہتر بنانا تھا۔ دورے کے دوران میڈیکل سپرنٹنڈنٹ ڈاکٹر عامر عزیز نے سب سے پہلے ریڈیالوجی ڈیپارٹمنٹ کے لئے مختص نئے بلاک کا معائنہ کیا۔ انہوں نے بلاک کے اسٹرکچر، کمروں کی ترتیب، وینٹیلیشن، برقی نظام اور آنے والے مہینوں میں نصب کی جانے والی جدید مشینری کے تناظر میں اہم نقاط کا جائزہ لیا۔ اس موقع پر انہوں نے فنی ماہرین سے بریفنگ لی اور بالخصوص سی ٹی سکین اور ایم آر آئی مشینوں کی تنصیب کے لئے درکار وائرنگ، پاور بیک اپ، کیبلنگ اور حفاظتی معیار کے حوالے سے تفصیلی رہنمائی فراہم کی۔ ڈاکٹر عامر عزیز نے ہدایت دیتے ہوئے کہا کہ ریڈیالوجی کا یہ بلاک ہسپتال کے لئے ایک اہم سنگِ میل ثابت ہو گا، لہٰذا تمام کام بین الاقوامی معیار کے مطابق، تکنیکی احتیاط اور مکمل پلاننگ کے ساتھ انجام دیا جائے۔ انہوں نے واضح کیا کہ مستقبل میں جدید ریڈیالوجی سروسز کی فراہمی مریضوں کے لئے بڑا فائدہ ثابت ہوگی، اس لیے منصوبے میں کسی قسم کی تاخیر یا معیار میں کمی برداشت نہیں کی جائے گی۔ بعد ازاں میڈیکل سپرنٹنڈنڈ ڈاکٹر عامر عزیز نے آپریشن تھیٹر کا دورہ کیا۔ اس دوران انہوں نے آپریشن تھیٹر سے ملحقہ ایریا میں جاری سول ورک، الیکٹریکل کام، صفائی کے نظام اور دیگر تکنیکی امور کا موقع پر جائزہ لیا۔ انہوں نے نجی کمپنی کے نمائندے کو سختی سے ہدایات جاری کرتے ہوئے کہا کہ تعمیراتی سرگرمیوں کو جلد از جلد مکمل کیا جائے تاکہ آپریشن تھیٹر کی روزمرہ کی سرگرمیوں میں کوئی خلل نہ آئے۔ انہوں نے مزید کہا کہ آپریشن تھیٹر ہسپتال کا حساس ترین یونٹ ہے لہٰذا اس سے متعلق تمام امور میں اعلیٰ ترین معیار، مکمل احتیاط اور تیز رفتار تکمیل کو یقینی بنایا جائے۔ اس موقع پر مختلف شعبوں کے سربراہان نے بھی اپنے اپنے شعبوں سے متعلق بریفنگ دی اور تعمیراتی پیش رفت پر میڈیکل سپرنٹنڈنٹ کو اعتماد میں لیا۔ انہوں نے موقع پر موجود ٹیم کو ہسپتال کی بہتری کے لئے جاری منصوبوں پر سراہا اور تمام متعلقہ محکموں کے درمیان بہتر کوآرڈینیشن کا بھی زور دیا۔ میڈیکل سپرنٹنڈنٹ ڈاکٹر عامر عزیز کے ہمراہ اس دورے میں پی اے ٹو ایم ایس عمران محمود، وارڈ سپرنٹنڈنٹ نعیم میر، انچارج ریڈیالوجی ڈیپارٹمنٹ زاہد زرین، عرفان طالب اور دیگر ٹیم بھی موجود تھی جنہوں نے اپنے اپنے شعبے سے متعلق ضروری نکات سے آگاہ کیا اور موقع پر سفارشات بھی پیش کیں۔ ڈاکٹر عامر عزیز نے آخر میں کہا کہ ہسپتال کے ترقیاتی منصوبوں کی بروقت تکمیل اور معیاری کام حکومت آزاد کشمیر کی صحت کے شعبے میں دلچسپی اور عزم کی واضح مثال ہے، اور ان منصوبوں کی تکمیل سے مریضوں کو بہتر، جدید اور معیاری سہولیات فراہم کرنے کا ہدف مزید تیزی سے حاصل ہو سکے گا۔

14/11/2025

ورلڈ ذیابیطس ڈے کے موقع پر کشمیر انسٹی ٹیوٹ آف کارڈیالوجی میرپور میں ایک خصوصی آگاہی سیمینار اور واک کا انعقاد کیا گیا۔ تقریب کی صدارت میڈیکل سپرنٹنڈنٹ ڈاکٹر عامر عزیز نے کی۔ اس پروگرام کا مقصد عوام میں ذیابیطس سے بچاؤ، صحت مند طرزِ زندگی اور بروقت تشخیص کی اہمیت کو اجاگر کرنا تھا۔ تقریب پاکستان سوسائٹی آف فزیشن کے زیر اہتمام منعقد ہوئی، جس میں سوسائٹی کی نمائندگی ڈاکٹر زاہد احمد خان نے کی۔ تقریب میں ڈپٹی میڈیکل سپرنٹنڈنڈٹ ڈاکٹر ماریہ ذوالفقار، ایڈیشنل میڈیکل سپرنٹنڈنٹ ڈاکٹر اویس زاہد نے خصوصی طور پر شرکت کی جبکہ ہسپتال کے ڈاکٹرز، نرسز اور پیرامیڈیکل اسٹاف نے بھی بڑی تعداد میں شرکت کی۔ سیمینار کے دوران ماہرین نے ذیابیطس کے بڑھتے ہوئے کیسز، اس کی پیچیدگیوں، دل کے امراض سے اس کے تعلق اور احتیاطی تدابیر پر تفصیلی روشنی ڈالی۔ مقررین نے کہا کہ پاکستان میں ہر 100 میں سے تقریبا 20 افراد ذیابیطس کا شکار ہیں، جو تشویشناک صورتحال ہے اور فوری توجہ کی متقاضی ہے۔ میڈیکل سپرنٹنڈنٹ ڈاکٹر عامر عزیز نے خطاب کرتے ہوئے کہا کہ ذیابیطس دل، گردوں، آنکھوں اور اعصاب کے لیے سنگین خطرہ بن سکتی ہے، اس لیے ضروری ہے کہ لوگ اپنی روزمرہ غذا میں بہتری لائیں، باقاعدہ ورزش کریں اور وقتاً فوقتاً شوگر کی اسکریننگ کرواتے رہیں۔ تقریب کے اختتام پر عوام کی آگاہی کے لیے ایک واک کا انعقاد کیا گیا۔ واک کی قیادت میڈیکل سپرنٹنڈنٹ ڈاکٹر عامر عزیز نے کی، جبکہ ڈاکٹر ماریہ ذوالفقار، ڈاکٹر اویس زاہد، ڈاکٹر زاہد احمد خان ، ڈاکٹرز، نرسز اور پیرامیڈیس نے بھی بھرپور شرکت کی۔ شرکاء نے بینرز اور پلے کارڈ اٹھا رکھے تھے جن پر ذیابیطس سے بچاؤ، صحت مند خوراک اور باقاعدہ ورزش کے پیغامات درج تھے

11/11/2025

میرپور ( ) سیکریٹری صحت عامہ آزاد کشمیر بریگیڈیئر عامر رضا ٹیپو نے ڈویژنل ہیڈ کوارٹرز ٹیچنگ ہسپتال میرپور کا دورہ کیا، جہاں میڈیکل سپرنٹنڈنٹ ڈاکٹر عامر عزیز نے اپنی ٹیم کے ہمراہ پرتپاک استقبال کیا۔ سیکریٹری صحت نے سب سے پہلے شعبہ یورالوجی کی جانب سے منعقدہ ریبوٹک سرجری تربیتی ورکشاپ میں شرکت کی، جس کا انعقاد ہیڈ آف یورالوجی پروفیسر ڈاکٹر اشفاق راجہ نے کیا، جبکہ تربیت دینے والے بین الاقوامی ٹرینرز میں پروفیسر ڈاکٹر متین شریف، پروفیسر ڈاکٹر شمیم اور پروفیسر ڈاکٹر جاوید برقی شامل تھے مزید برآں سٹیج سیکریٹری کے فرائض ہیڈ آف ای این ٹی ڈیپارٹمنٹ / صدر پاکستان میڈیکل ایسوسی ایشن ڈاکٹر اعجاز احمد راجہ اور سرجن ڈاکٹر گوہر لطیف کالس نے ادا کئے ورکشاپ میں ملک بھر سے نامور پروفیسرز ، سئینر کنسلنٹنٹ یورالوجسٹ ڈاکٹرز نے خصوصی شرکت کی جن میں ڈاکٹر انصار ملک ، ڈاکٹر شہزاد ، ڈاکٹر حسان الحسن ، ڈاکٹر اسد بی بی ایچ ، ڈاکٹر ارم ، ڈاکٹر تنسیر ، ڈاکٹر ثنا شرافت اور ڈاکٹر اسد شامل تھے ۔ وزٹ کے دوران پرنسپل بے نظیر بھٹو شہید میڈیکل کالج پروفیسر ڈاکٹر فیصل بشیر ، ڈسٹرکٹ ہیلتھ آفیسر ڈاکٹر فدا حسین راجہ، ڈپٹی میڈیکل سپرنٹنڈنٹ ڈاکٹر ماریہ ذوالفقار، ایڈیشنل میڈیکل سپرنٹنڈنٹ ڈاکٹر اویس زاہد، صدر پاکستان میڈیکل ایسوسی ایشن ڈاکٹر اعجاز احمد راجہ، ہیڈ آف میڈیسن ڈیپارٹمنٹ پروفیسر ڈاکٹر طارق مسعود ، ہیڈ آف سرجری ڈیپارٹمنٹ پروفیسر ڈاکٹر زرداد احمد ، ہیڈ آف ریڈیالوجی ڈیپارٹمنٹ پروفیسر ڈاکٹر عبدلمجید خان ، ہیڈ آف پیڈز ڈیپارٹمنٹ پروفیسر ڈاکٹر صبا حیدر تارڑ ، ہیڈ آف آئی ڈیپارٹمنٹ پروفیسر ڈاکٹر وسیم احمد خان ، کنسلنٹنٹ یورالوجسٹ ڈاکٹر عمار بشیر اور دیگر سینئر ڈاکٹرز بھی موجود تھے۔

ورکشاپ میں شرکت کے بعد سیکریٹری صحت عامر رضا ٹیپو کو میڈیکل سپرنٹنڈنٹ ڈاکٹر عامر عزیز نے اپنے آفس میں ہسپتال کی طرف سے دی جانے والی سروسز اور مستقبل کے منصوبوں کے بارے میں تفصیلی بریفنگ دی۔ بعد ازاں سیکریٹری صحت نے ہسپتال کے مختلف شعبہ جات کا وزٹ کیا جن میں ایکسیڈنٹ اینڈ ایمرجنسی بلاک، بلڈ بینک اور HIMS شامل تھے اور سہولیات و انتظامی امور کا جائزہ لیا۔ سیکریٹری صحت نے پیڈز وارڈ میں نئے تعمیر ہونے والے پیڈز ICU کا افتتاح بھی کیا، جس سے بچوں کے علاج اور ایمرجنسی رسپانس کی سہولیات میں بہتری آئے گی۔ دورے کے دوران سیکریٹری صحت نے ہسپتال کے فیز ٹو تعمیراتی منصوبے کا جائزہ بھی لیا، جہاں پی ڈبلیو ڈی کی طرف سے شہزادہ اقبال نے جاری ترقیاتی کاموں، پیش رفت اور منصوبے کی تکمیل کے حوالے سے بریفنگ دی۔ دورے کا اختتام ڈائیلاسز سینٹر کے وزٹ کے ساتھ ہوا، جہاں سیکریٹری صحت نے سہولیات کا جائزہ لیا اور مزید بہتری کے لیے ہدایات جاری کیں۔سیکریٹری صحت عامہ آزاد کشمیر بریگیڈیئر عامر رضا ٹیپو نے ہسپتال انتظامیہ کی کوششوں کو سراہتے ہوئے کہا کہ ڈویژنل ہیڈ کواٹرز ٹیچنگ ہسپتال میرپور کو جدید سہولیات کے ساتھ ماڈل ہسپتال میں تبدیل کیا جا رہا ہے اور حکومت ہر ممکن تعاون جاری رکھے گی

06/11/2025

میڈیکل سپرنٹنڈنٹ ڈاکٹر عامر عزیز نے یومِ شہدائے جموں و کشمیر کے موقع پر اپنے پیغام میں کہا ہے کہ 6 نومبر 1947ء کی المناک یاد تاریخِ کشمیر کا وہ دردناک باب ہے جب جموں خطے کے ہزاروں معصوم مسلمان مرد، خواتین اور بچے اپنے ایمان، وطن اور شناخت کے دفاع میں بے دردی سے شہید کر دیے گئے۔ انہوں نے کہا کہ ان جانثاروں نے اپنی جانوں کے نذرانے پیش کر کے ایسی عظیم قربانی کی مثال قائم کی جو رہتی دنیا تک یاد رکھی جائے گی۔

ڈاکٹر عامر عزیز نے کہا کہ شہداء جموں و کشمیر کی قربانیاں ہمیں یہ سبق دیتی ہیں کہ آزادی اور عزت کبھی بغیر جدوجہد کے حاصل نہیں ہوتیں۔ ان شہداء کے خون نے تحریکِ آزادیٔ کشمیر کی بنیاد کو مضبوط کیا اور پوری ملتِ کشمیر کو بیداری، یکجہتی اور حریت کا پیغام دیا۔

انہوں نے مزید کہا کہ آزاد جموں و کشمیر، تحریکِ آزادیٔ کشمیر کا بیس کیمپ ہے، جہاں کے عوام آج بھی اپنے مظلوم بھائیوں کے ساتھ محبت، حمایت اور اخوت کے رشتے میں بندھے ہوئے ہیں۔ انہوں نے کہا کہ پاکستان اور آزاد کشمیر کا رشتہ محض جغرافیائی نہیں بلکہ ایمانی اور جذباتی ہے۔ پاکستان کشمیریوں کی سیاسی، اخلاقی اور سفارتی حمایت جاری رکھے ہوئے ہے اور کشمیری عوام پاکستان کو اپنی منزل اور تکمیلِ آزادی کی علامت سمجھتے ہیں۔

ڈاکٹر عامر عزیز نے کہا کہ آج جب ہم یومِ شہداء جموں و کشمیر مناتے ہیں تو ہمیں ان بہادر روحوں کو سلامِ عقیدت پیش کرنا چاہیے جنہوں نے ظلم و جبر کے سامنے سر نہیں جھکایا۔ ہماری ذمہ داری ہے کہ ہم ان کے مشن کو آگے بڑھائیں، اپنی نئی نسل کو ان قربانیوں سے روشناس کروائیں اور ان کے نظریے ایمان، اتحاد اور قربانی کو زندہ رکھیں۔

آخر میں میڈیکل سپرنٹنڈنٹ ڈاکٹر عامر عزیز نے گفتگو کرتے ہوئےکہا ہیکہ ڈویژنل ہیڈ کوارٹرز ٹیچنگ ہسپتال میرپور کی انتظامیہ اور عملہ اس دن کی مناسبت سے شہداء کے درجات کی بلندی کے لیے خصوصی دعائیں کرے گا۔ انہوں نے شہریوں سے بھی اپیل کی کہ وہ شہداء کے لیے دعا کریں اور ان کے مشن کی تکمیل کے لیے اپنی صفوں میں اتحاد پیدا کریں، کیونکہ شہداء کا خون ہماری آزادی کی ضمانت ہے

06/11/2025

ڈویژنل ہیڈکوارٹرز ٹیچنگ ہسپتال میرپور میں ایک پروقار تقریب کے دوران پاکستان میڈیکل ایسوسی ایشن (PMA) ضلع میرپور اور کشمیر آرفن ریلیف ٹرسٹ (KORT) کے درمیان مفاہمتی یادداشت (MoU) پر دستخط کیے گئے۔ اس معاہدے کا مقصد صحت عامہ کے فروغ، فلاحی سرگرمیوں میں باہمی تعاون، اور مستحق مریضوں کو معیاری طبی سہولیات کی فراہمی کو یقینی بنانا ہے۔

تقریب کے مہمانِ خصوصی پرنسپل ایم بی بی ایس میڈیکل کالج پروفیسر ڈاکٹر فیصل بشیر اور میڈیکل سپرنٹنڈنٹ ڈویژنل ہیڈکوارٹرز ٹیچنگ اسپتال میرپور ڈاکٹر عامر عزیز تھے۔

مفاہمتی یادداشت پر دستخط صدر پاکستان میڈیکل ایسوسی ایشن ضلع میرپور ڈاکٹر اعجاز احمد راجہ اور چیئرمین کشمیر آرفن ریلیف ٹرسٹ چوہدری اختر نے کیے۔

صدر پی ایم اے میرپور ڈاکٹر اعجاز احمد راجہ نے کہا کہ “یہ شراکت داری صحت کے شعبے میں جدت اور بہتری کے نئے در وا کرے گی اور عوامی فلاح و بہبود کے لیے ایک مضبوط بنیاد فراہم کرے گی۔”

چیئرمین کورٹ چوہدری اختر نے اپنے خطاب میں کہا کہ “پی ایم اے کے ساتھ تعاون سے ہماری فلاحی سرگرمیوں کو مزید وسعت ملے گی اور ہم زیادہ سے زیادہ ضرورت مند مریضوں تک بہتر طبی سہولیات پہنچا سکیں گے۔”

جنرل سیکریٹری پی ایم اے میرپور اور ڈائریکٹر ایڈمنسٹریشن ایم بی بی ایس میڈیکل کالج ڈاکٹر اعجاز محمود نے تقریب میں خطاب کرتے ہوئے چیئرمین کورٹ چوہدری اختر کی سماجی خدمات کو خراجِ تحسین پیش کیا اور اسپتال کے دورے کے ساتھ ساتھ مفاہمتی یادداشت پر دستخط کرنے پر ان کا شکریہ ادا کیا۔

تقریب میں وائس پرنسپل پروفیسر ڈاکٹر طارق مسعود (ہیڈ آف میڈیسن)، پروفیسر ڈاکٹر زرداد (ہیڈ آف سرجری)، ڈاکٹر عبدالمجید (ہیڈ آف ریڈیالوجی)، ڈاکٹر رضوان بوستان (سینئر چلڈ اسپیشلسٹ)، ڈاکٹر ماریہ ذوالفقار (ڈپٹی میڈیکل سپرنٹنڈنٹ)، ڈاکٹر مبشرہ اعجاز (اسسٹنٹ پروفیسر گائنی)، ڈاکٹر رضا (اسسٹنٹ پروفیسر کارڈیالوجی)، ڈاکٹر رضوانہ (سرجن)، ڈاکٹر طاہرہ (چائلڈ اسپیشلسٹ)، ڈاکٹر مریم (ڈینٹل سرجن)، چئرمین PMSA خالد شریف مبشر نعیم (وارڈ سپرنٹنڈنٹ)، چوہدری ساجد (HEF) ، نوجوان ڈاکٹروں اور انتظامی عملے نے بھی شرکت کی۔

تقریب کے بعد چیئرمین کورٹ چوہدری اختر، میڈیکل سپرنٹنڈنٹ ڈاکٹر عامر عزیز اور پی ایم اے ٹیم نے ایمرجنسی اور پیڈز ڈیپارٹمنٹ کا دورہ کیا۔ اس موقع پر کورٹ کی جانب سے ایمرجنسی وارڈ کے لیے 10 مکمل طور پر الیکٹرک بیڈز فراہم کیے گئے۔ چیئرمین کورٹ نے آپریشن تھیٹر کی اپ گریڈیشن اور ایمرجنسی میں سہولیات کے مزید فروغ میں گہری دلچسپی ظاہر کی۔

ایمرجنسی وزٹ کے دوران ڈاکٹر اویس زاہد (اے ایم ایس) اور ڈاکٹر عدنان مرغوب (فنانس سیکریٹری پی ایم اے میرپور) نے ایمرجنسی آپریشن تھیٹر کی ضروریات سے آگاہ کیا، جس پر چیئرمین کورٹ نے توسیع اور جدید آلات کی فراہمی کی یقین دہانی کرائی۔

چیئرمین کورٹ چوہدری اختر نے اسپتال میں صفائی ستھرائی، نظم و ضبط، اور ایمرجنسی سہولیات کی بہتری کے حوالے سے میڈیکل سپرنٹنڈنٹ ڈاکٹر عامر عزیز کی خدمات کو بھی سراہا۔

تقریب کا اختتام اس عزم کے ساتھ ہوا کہ پاکستان میڈیکل ایسوسی ایشن (PMA) میرپور اور کشمیر آرفن ریلیف ٹرسٹ (KORT) مستقبل میں بھی صحت عامہ کے فروغ اور فلاحی خدمات کے میدان میں اپنا تعاون جاری رکھیں گے