https://www.facebook.com/108247498309115/

عمر الأمل متلازمة أبرت - Apert Syndrome

Home
Palestine
Jericho
عمر الأمل متلازمة أبرت - Apert Syndrome

عموره الامل

15/11/2025

كيمو حبيبي 🥰🥰🥰🥰
كريم من الاردن عنده متلازمه ابرت اخيرا بلش عمليات الايدين ياعمري الاشي متعب لكن يستحق بنحبك كتير وبنستدعيلك دائما 🥹🥹🥹🥹

11/11/2025

الشعور صعب لما يصير عمورتي اكتر من أربع سنين
ونفسي أسمع كلمة ماما🥹
نفسي نحكي سوا
واسمع قصصك الهبلة وكلامك الملخبط.

أحياناً بسرح مع حالي
وبعمل محادثة بينا في خيالي
كأنك بتحكيلي وتضحكني من قلبك

يا رب أشوفك بخير دايما
تكبر وتضحك وتملي الدنيا كلام وحكايات
وتصير من خيره الناس يا عمورتيي🥰🥰🥰🥰

01/11/2025

اللهم تمِّم شفاء عمر، وبارك له في صحته وعافيته، واحفظه لي من كل أذى. الحمد لله الذي بنعمته تتم الصالحات

08/10/2025

عادي انو يتخلى عني عمر ويترك ايدي اول ميشوف بنت الجيران🤣🤣🤣🤣🤣

12/09/2025

إحنا كأهالي أطفال عندهم اطفال حالات خاصه ومتلازمات مثل أبرت وداون وغيرها أو تأخر إدراكي باريحا عايشين معاناة كبيرة، لأنه مافي مراكز متخصصة تدعم أطفالنا وتساعدهم يطوروا مهاراتهم. أطفالنا بحاجة لعلاج نطق، علاج وظيفي، وتأهيل فردي زي باقي الأطفال بمدن ثانية، لكن للأسف باريحا محرومة من هاي الخدمات.

أنا شخصيًا كنت أضطر أروح على مركز الأميرة بسمة بالقدس لعلاج ابني، ومع كل الظروف صار المشوار أصعب وأثقل من قبل. حتى رام الله مشوارها مرهق جدًا، ومش كل الأهالي قادرين يلتزموا بالذهاب بشكل متواصل. وحتى لو في قدرة مالية بالبداية، مع الوقت بصير استنزاف كبير جدًا للأهل.

غير هيك، الأهل بيتعرضوا لتعب جسدي ونفسي وصحي كبير بسبب السفر والمشوار الطويل، وهذا الأشي كمان بيأدي لإهمال باقي أفراد الأسرة من غير قصد، لأن كل التركيز والوقت بيروح على الطفل اللي بحاجة للعلاج، وهاي معاناة حقيقية بتأثر على العيلة كلها🫢🤲🏻

31/08/2025

كنت أعلّم أطفال بعمرك ل ١١سنه وكان نفسي أعلمك زيهم.. وإنت علمتني أعظم دروس الحياة حبيبي عمر مع اقتراب الروضه غصه بقلبي ماجهزتلك شنته وزي روضه واشياء الروضه بس حبك بقلبي كبير يحب تفاصيلك وضحكتك 🥰🥰

21/08/2025

عمورتي أول سنة إلك بعيد ميلادك، عملنا لك عيد ميلاد صغير. وحكينا: “إن شاء الله السنة الجاي بيكبر وبيصير يفهم ويستوعب وينبسط بعيد الميلاد، ومنسويله عيد ميلاد أحلى.”

ولما صرت يا عمورتي سنتين، برضو ما استوعبت هاي الشغلات… ما كنت فاهم شو يعني عيد ميلاد. فقلت لحالي: “رح أعمله عيد كبير لما يصير ثلاث سنين، أكيد رح يكون فاهم ومستوعب كل إشي.”

ولما صار عيد ميلادك الثالث… ما عملت.

بس هاي السنة، رابع عيد ميلاد إلك، الله يحميك ويخليك إلي، قررت ما أستنى.

ما أستنى منك تيجي تبوسني وتحكي لي “شكراً يا ماما على عيد الميلاد
ولا أبوك مستني إنك تركض عليه وتحضنه ومبسوط بالهدية

قررنا نعملك كل إشي… بس لأنك إنت.
لاني بنحبك بكل تفاصيلك حبيبي ربي يخليك ويحميك
شكرا بابا لانك بتحبني وشايفني اشي كبير مش شايف حد زييي🥰
😍😍😍😍😍انسيت احكيلكم وعمر سنتين صاحباتي عملو لعمر مفاجئه وعملوله عيد ميلاد بيجنن مع اولادهم اللي بيحبو عمر😍😍😍

05/08/2025

العملية الثامنة لعمر…
رجعنا نوقف على باب العمليات من جديد.
وما رح تكون الأخيرة… بس كل مرة الوجع بيكون أعمق، والخوف أكبر.

بس أنا تعلمت إشي كبير من عمر…
علّمني القوة، علّمني كيف أوقف على رجلي وأنا موجوعة، كيف أبتسم وأنا خايفة، كيف أتمسك بالأمل حتى لو الدنيا كلها سودة.
علشان هيك، سميته “عمر الأمل”.

كل مرة بحس إني تعبت، أني خلص… مش قادر والدنيا سوده بوجهي
بشوف عمر، وأتذكر إنه هو اللي بيعطيني القوة.
هو اللي بيخليني أؤمن إنه لسه في خير، ولسه في بكرة أحلى.

يا حبيبي يا عمر،
بس تكبر وتقرأ كل الكلام اللي كتبته عنك،
رح تفتخر بنفسك…
رح تعرف قدّيش كنت قوي،
وقدّيش أنا كنت فخورة فيك من أول لحظة بحياتك.

ربي، اشفِ عمر،
وفرح قلبي فيه،
واحفظه لي وللدنيا كلها.
واجعل كل خطوة وجع مرّ فيها، خطوة أقرب للفرح والراحة

25/07/2025

حبيبي عمر، عم يمر بأصعب المراحل في حياته.
تحديات كثيرة نزلت مرة وحدة…
تحديات في السمع في الأوعية بالرأس، وحتى احتمال يكون عنده سمات توحد.
كلام الأطباء ماكان سهل علينا بس حبنا لعموره أقوى من أي تشخيص.

عمر مش بس طفل، عمر هو نبض، هو روح، هو ضحكة البيت…
وإحنا ما بدنا غير إنه يكون بخير، ويطلع من هالمرحلة وهو أقوى، وأطيب، وأحسن الناس.
قريب عنده عملية🥲🥲

أنا بطلب منكم تدعوا لعمورتي
يا رب، اشفِ عمر، قوّيه، طمّن قلبه وقلبنا عليه، وسخّر له ناس تحبه من قلبها وتحس فيه

ادعوله، لو حتى بكلمة، لو حتى بينكم وبين ربكم…
يمكن دعوة من قلب صادق تغيّر له كل شيء. 🌟

Address

فلسطين
Jericho

Website

facebook.com

Alerts

Be the first to know and let us send you an email when عمر الأمل متلازمة أبرت - Apert Syndrome posts news and promotions. Your email address will not be used for any other purpose, and you can unsubscribe at any time.

Shortcuts

Want your practice to be the top-listed Clinic in Jericho?