09/12/2019
Recuperamos esta entrada de hai 4 anos da nosa compañeira Xulia Alonso. Tan actual hoxe coma daquela porque reflicte a política que seguía para administrar os tratamentos:
"Eu maldígote, Felix Rubial Bernárdez.
Hai xusto un ano asinabas a notificación pola que se me denegaba o acceso ao tratamento contra o virus da hepatite C que o meu médico especialista tramitara semanas atrás. A xustificación para tal negativa foi (literalmente) que “a solicitude de inicio de tratamento NON CUMPRE os requisitos para iniciar esta terapia por: segundo os datos clínicos refectidos na documentación, a función hepática do paciente se correspondería cun Child-Pugh A5”.
Ser portadora do VHC durante máis de 20 anos, unha cirrose hepática, dúas hemorraxias internas provocadas por varices esofáxicas, un infarto no bazo, unha encefalopatía hepática… non foron suficientes para “cumprir os requisitos” e poder optar á posibilidade de eliminar ese virus ca**ón do meu corpo. O criterio do meu médico especialista foi fulminado por unha subcomisión, daquelas anónima, que ti presidías como Director Xeral de Asistencia Sanitaria.
E como tal, asinaches o veredicto, Felix Rubial.
A dor, a angustia, o medo, o terror e a ira que que vivín desde ese momento, non chos perdonarei no que me quede de vida. Os meses de durísimo combate que compartín con centos de doentes a as bágoas que saíron dos nosos ollos mentres arrastrabamos o no noso ferido corpo polas rúas de todo o territorio galego berrando para reclamar o dereito constitucional á protección da nosa saúde non teñen perdón; por non falar dos mortos, que deberían pesarche na conciencia, se a tiveras.
Pero hai algo máis que perdurará no tempo como consecuencia desa sinatura túa estampada en cada ditame de denegación: a percepción xeralizada, non só entre os doentes, do sistema sanitario como un obstáculo. E iso NUNCA se producira dunha forma tan agresiva. Se hai algo que sostén a unha persoa cando se enfronta á sensación de vulnerabilidade que provoca a enfermidade é sentir que ten acceso as ferramentas necesarias para loitar contra a ela, e iso é o que a Sanidade Pública representou SEMPRE.
Podes escudarte en que as decisións se tomaron por persoas con máis xerarquía que a túa, ou que contabas co “aval” de expertas e expertos. Pero quen asinou o documento que aínda hoxe arrepía o meu corpo foches ti. É unha sinatura é algo máis que un garabato. Se non, pregúntallo aos preferentistas!
Non só contas co meu desprezo. Tamén coa miña maldición, Felix Rubial Bernárdez."
