هم النم ، كل صح تعيش صح

18/11/2025

by Heba Rashed

15/11/2025

مرض السكر
انواعه
اسبابه

09/11/2025

مساء الخير

غدا النهاردة من نظام المتابعة مع الصفحة

فريك مع سمك بلطي مشوي
وسلطة خضار كتير

الفريك حبوب كاملة كمية اقل ممكن تشبعك اكتر من الارز الابيض
والسمك المشوي بروتين صحي

اتغديتوا ايه النهاردة؟

04/11/2025

مساء الخير

الشتا و العك

25/10/2025

النهاردة مر ٨ سنين على انشاء الجروب ده

اتمني يكون الجروب وصل معلومة مفيدة
وساعد في تغيير العادات الغذائية لعادات افضل

10/10/2025

النهاردة اليوم العالمي للصحة النفسية
ودايما اي حد بدأ يخس بيشتكي ان مووده مش تمام

طيب هل فعلا البعد عن الاكل الغير صحي ممكن يجيب اكتئاب و يبوظ الموود

النهاردة اول بوستات الفوود و الموود اللي هنتكلم فيها عن علاقة الاكل بالحالة النفسية

و عشان نجاوب علي سؤال هل الالتزام بنظام اكل صحي بيجيب اكتئاب

تعالوا نشوف العلم بيقول ايه

دراسة حديثة اتعملت علي طلاب من الجامعة في استراليا

٧٦ طالب جامعي

كلهم عندهم اكتئاب وارق

و كلهم بياكلوا اكل غير صحي ، وجبات سريعة و نشويات غير صحية و دهون غير صحية مفيش خضار او فواكه

الباحثين قسموا الطلاب مجموعتين بالتساوي

مجموعة هتكمل في نفس نظام الاكل الغير صحي

و مجموعة هتغير نظام اكلها لاكل صحي

حبوب كاملة ، بروتين صحي (سمك ، البان ، بقوليات ، دجاج ) خضار و فاكهة ،دهون صحية من زيت الزيتون ومعلقتين مكسرات كل يوم

و بعد ٣ اسابيع بس من التغيير شافوا النتيجة

المفروض لو الاكل الصحي بيجيب اكتئاب كانت الطلبة اللي اتغيرت دي انتحرت على كده

لكن المفاجئة
المجموعة اللي غيرت اكلها حصل عندها تحسن في اعراض الاكتئاب بدرجة كبيرة

مش بس كده ، مستوي الأرق و الضغط العصبي كمان قل

يعني الاكل الصحي مجابلهمش اكتئاب و لا بوظلهم الموود زي العروسة دي ما بتقول

بالعكس الاكل الصحي زي ما بيحسن حالة الجسم الصحية كمان بيحسن حالة المخ و الموود

طيب ده مش دليل على فكره دي دراسة واحدة و كلامها ميمشيش معانا

خلاص ، استنونا بكرة ان شاء الله في البوست التاني من الفوود و الموود عشان نعرف اكتر نظام غذائي اثبتت الدراسات انه بيحسن الموود و بيقلل الاكتئاب

هتلاقوا في التعليقات مصدر الدراسة وبوست يعرفك على خطوات تساعدك على النوم بشكل أفضل

و اكتبوا في التعليقات اسئلتكم الخاصة بموضوع الاكل الصحي

الاكل الصحي بيحسن الموود ولا لأ؟

تابعوا هاشتاج



وعشان تعرف اكتر عن الاكل الصحي تابعونا علي الصفحة










#ريجيم

#صحة
#كرش
#تغذية

06/10/2025

صباح النصر

03/10/2025

الموضوع مش جديد
من ٢٠١٥ منظمة الصحة العالمية اعلنت ان اللحوم المصنعة من مسببات سرطان القولون والمستقيم

وده ملوش علاقة بجودة اللحمة دي ، لو لحوم مصنعة جايه بالطيارة من سويسرا برضه فيها نفس المشكلة

موضوع الجودة لو عليه خلاف او طالع فيه اشاعات او فيديوهات

لكن ان اللحوم دي مضرة للصحتك ولصحة اولادك دي مفيش عليها كلام

انا علطول بحب اوصل المعلومة في الصفحة عن طريق صورة كوميدية
لكن المرة دي الموضوع مختلف جدا و خطير فعلا

مع دخول المدارس و ال lunchbox ( ماله الكيس البلاستيك كان جميل و بيحتوي البني أدم)

السندوتشات بيكون فيها لانشون فراخ و لحمة ، بسطرمة او تركي مدخن و فيه ناس بتعمل سوسيس و برجر و ناجتس كمان حسب ما سمعت

كل الحاجات دي اسمها لحوم مصنعة
اللانشون و التركي المدخن و البيبيروني و السوسيس و الهامبرجر المصنع و الفراخ المصنعة ( الناجتس) و البسطرمة المصنعة

طيب فين المشكلة؟

انها بتتصنع من بواقي اللحوم و كده ، لا متقلقش انا بجيب انضف نوع في السوق

لا مش المشكلة في نضافة المنتج و لا جودة اللحوم المستخدمة المشكلة في طريقة التصنيع نفسها
ازاي؟

The International Agency for Research on Cancer
الوكالة الدولية لابحاث السرطان

دي هيئة علمية عالمية تابعة لل WHO منظمة الصحة العالمية مختصة بدراسة انواع السرطان و اسبابها

الهيئة اعلنت في 26 اكتوبر 2015 بعد مراجعتها لنتايج 800 دراسة ان اللحوم المصنعة بتصنف كمسبب للسرطان من المجموعة الأولي خاصة سرطان القولون

الهيئة بتصنف اسباب السرطان ل 5 مجموعات , المجموعة الأولي بتكون اقوي في الأدلة العلمية علي انها تسبب السرطان و من ضمن المجموعة دي التدخين و التعرض للأشعاع

يعني ايه Processed meat او اللحمة المصنعة حسب تصنيف الوكالة

اللحوم اللي تعرضت لعملية تصنيع زي التمليح او التدخين او التتبيل و الحفظ
زي اللانشون و مشتقاته و البسطرمة و مشتقاتها و الهوت دوج و مشتقاته و البيبيروني و مشتقاته
و الكلام ده علي اللحوم عامة مش اللحوم الحمراء بس يعني كمان الدجاج و الديك الرومي

ايه مستوي الخطر منها

الأبحاث بتقول ان استهلاك 50 جرام فقط من اللحوم المصنعة يوميا بتزود خطر الأصابة بسرطان القولون بنسبة 18%
50 جم دي ممكن تكون شريحة واحدة من اللانشون و اقل من واحدة هوت دوج

مش بس منظمة الصحة العالمية اللي اعلنت كده
هيئات كتير مهتمة بالسرطان اعلنت نفس الأعلان بعد مراجعة الأبحاث اللي تمت علي النوع ده من اللحوم

طيب نعمل ايه ؟

كل التوصيات بالأكل الصحي وضعت اللحوم المصنعة ضمن الممنوعات
ابعدها تماما عن نظامك الغذائي و عن اكل اولادك
الموضوع مش مجرد بحث اتعمل او فرقعة اعلامية
الموضوع رسمي و اغلب المنظمات المهتمة بالسرطان اقرته رسميا

هتلاقوا في الكومنتات مصادر للكلام ده
شير و انفع غيرك بمعلومة موثقة

01/10/2025

صباح الخير

النهاردة اليوم العالمي للقهوة
فهنجاوب على سؤال مشهور جدا

القهوة تساعد في نزول الوزن و لا ممكن تبوظ الدايت؟

الاجابة تعتمد عليك انت

القهوة فعلا ممكن تساعدك في رحلة نزول الوزن

و القهوة برده ممكن تبوظلك الدنيا

ازاي تساعدك؟

القهوة بدون اضافات مشروب مفيد مش هيضيع سعراتك
فكده ممكن مشروبات يومك تبقي بدون سعرات توفرها للاكل فلو اكلت اقل من سعراتك تخس.

القهوة ممكن تزود حرق الدهون بنسبة بسيطة وده ممكن يساعدك في نزول الوزن.

القهوة بتحسن من النشاط الرياضي و قدرة التحمل و ده هيساعدك في ممارسة الرياضة عشان نزول الوزن.

القهوة كمان بدون اضافات ممكن تقلل الشهية شوية وتقلل احساسك بالجوع.

طيب ازاي القهوة تلخبط الدايت و تعطلك في رحلة نزول الوزن؟

لو بتشرب مشروبات قهوة غرقانة سعرات زي قطعة الجاتوه
الفرابتشينو والموكاتشينو وكل الاسامي الغريبة دي،
مكسات القهوة الجاهزة زي ال ٣*١ او ٢*١ او كوفي ميكس او خلطات القهوة الفرنسية (فرنسا على فكرة مفيهاش قهوة زي دي 😂 مش عارف مين اخترعها).

الاضافات زي السكر والكريمة والدهون نباتية من الكريمر اضافات غير صحية عالية في السعرات ، ممكن كده تضيع سعراتك و تخلي يومك يبوظ و سعراتك تعدي المسموح فتعطلك عن نزول الوزن.

القهوة كمان ممكن تكون سادة بس انت متعود تأخذها مع حلويات
بسكويت او شيكولاتة او كيك ، فتضيع سعراتك علي الاكل اللي جنب القهوة وتعطلك عن نزول الوزن.

القهوة كمان ممكن تسبب الأرق وعدم انتظام النوم لو شربتها زيادة عن اللزوم او شربتها وقت موعد النوم ، النوم المريح اساسي في رحلة نزول الوزن و بيأثر على كل وظائف الجسم.

شوف التعليقات هتلاقي بوستات فيها مصادر كل المعلومات هنا
وتلاقي بوست يقولك ازاي تشرب القهوة بشكل صحي،كمية الكافيين في انواع القهوة المختلفة

القرار في ايدك انت

ان القهوة تساعدك او تعطلك

القهوة بتساعدك ولا بتعطلك ولا مش فارقة؟

دور علي هاشتاج عشان تعرف اكتر عن الاكل الصحي

#قهوة #قهوةتركية #اسبريسو #كافيين #قهوه #قهوتي #دايت #ريجيم

06/09/2025

راس مال اي واحد بيهبد وينصب على الناس على السوشيال ميديا في المجال الطبي هو الطبالين من الفولورز اللي عايزين يهربوا من المعلومة الحقيقية لبوستات الاثارة وفيديوهات ازاي تقضي على المرض المزمن في 10دقايق
ومشروب القضاء على السكر والضغط
واظاي تخفي كرشك في 5 ايام

كل واحد بيعمل فولو للنصاب
كل واحد بيعمل شير لهبده من هبداته عشان جت على مزاجه
كل واحد عجبه الأسلوب المتدني في لم الريتش عن طريق مخالفة العلم والزيطة

مشترك مع النصاب في الجريمة

طبعا اللي بيدافعوا عنهم ويبرروا كلامهم ويأكدوا عليه دول نصابين معاهم