07/12/2025
مستشفى الطُندب أبوكليوة الإقليمي التخصصي
📌 متين بنقول إنو الدورة الشهرية طبيعية حتى لو جات مرّتين في الشهر؟
#في بنات كتار بيخافن لمن الدورة تجيهم مرتين في الشهر، لكن الموضوع ما دايمًا خطر…
يعني لو جات يوم 3 وتاني جات يوم 25 من نفس الشهر تُعتبر طبيعية جداً, لأنو الفترة بين الدورتين تقريباً 22 يوم
والمدى الطبيعي للدورة الشهرية بيكون بين 21–35 يوم.
#إذن بنعتبرها طبيعية لو:
- المدة بين الدورة الأولى والتانية من 21 لي 35 يوم.
يعني لو جاتك في أول الشهر وبعدين نهاية نفس الشهر، ممكن جدًا يكون دا نظام جسمك ساي.
- كمية الدم والنزيف ما فيها تغيير كبير وما في ألم شديد أكتر من العادة.
- دورتك من زمان معروفة إنها قصيرة وبتجي بدري.
#والحاجات البتخلّيها ما طبيعية ولازم تقابلي :
- لو بتجي أقل من 21 يوم بين كل دورة والتانية.
- لو النزيف كتير شديد أو مستمر أكتر من المعتاد.
- لو معاها ألم غير طبيعي أو دوخة وهبوط.
- لو دي أول مرة يحصل ليك كده بدون سبب واضح.
#مهم تعرفي إنو التوتر، تغيير النوم، الرجيم الشديد، أو حتى تغيير الجو… ديل كلهم ممكن يلخبطو ليك الهرمونات ويخلّو الدورة تتلخبط.
قسم النساء والتوليد
بيئة علاجية آمنة ومضمونه
![مستشفى الطُندب أبوكليوة الإقليمي التخصصي [يحيي الحي في وجدان كل حي] د/محمد بشير في زمنٍ قلّت فيه النماذج النقية، برز ف...](https://img3.findhealthclinics.com/793/842/1308680417938421.jpg)
