https://www.facebook.com/108845918811050/

get medical informations with alaa, alsahafa, Khartoum (2026)

18/01/2026

حبايبنا اطباء المستقبل طلاب المستوى الاول كليه *الطب* وكل الكلياات الطبيه.

اكيد فتشتو ناس تاخدو منهم نصائح ولقيتو النصيحتو نفعت معاكم وفيهم القال ليكم خلو الطب دا سكه عطش وكلام كتيير فيهو الببني وفيهو البهدم و ما عارفين تسمعو لمنو.

مبادرة سبل العطاء بتبارك ليكم قبولكم في الكليه العظيمه دي ومجهزة ليكم برنامج *اين الطريق!..* في *اول سلسلاته* 🔥

استعد تمشي في رحله *استكشاف الطريق* نسمع فيها لزمايلكم الكبار الناس المشوا الدرب قبلكم وجايين يختصروا ليكم المسافة بكلام صادق وتجربة حقيقية تمشو في دربهم وتسمعو نصائحهم وما عليكم خوف 💗

https://t.me/Ataa12346

🎯 الطريق طويل… لكن البداية الصح بتفرق ومع سبل العطاء الطريق ان شآء الله ساهل ومطمن ودي بس البداية🔥
وخليك فاهم:
ما العبرة تبدأ بدري، العبرة تبدأ صح

⏳ قريباً…

23/09/2025

قبل 3 اشهر تقريبا كنا في حمله توعيه عن الكوليرا وحمى الضنك في دنقلا تبع منظمه طوعيه مميزه جدا
المهم اثناء الحمله في البدايه سالنا عن الكوليرا واللهم بارك اغلبيه الناس عارفنها وكانو بشرحو معانا
بعدها قلت ليهم بتعرفو شنو عن حمى الضنك؟!
في حاجه كبيره الله يديها العافيه قالت لي بررييي ضنك دا م بنعرفو و م تقولو لينا ان شآء الله م يجي ل زول 🤣💙

لكن هسي وجب اننا نتكلم عن *حمى الضنك*

1. الأعراض
حرارة عالية مفاجئة 🔥
صداع شديد ووجع خلف العينين 👀
آلام في العضلات والمفاصل 💪
طفح جلدي أحيانًا 🌺
تعب عام وغثيان 🤢
> ملاحظ: لو ظهرت نزيف أو كدمات سهلة أو تعب شديد لازم تراجع المستشفى فوراً (ممكن تكون حمى الضنك النزفية).

2. التشخيص
اختبار دم للكشف عن الأجسام المضادة IgM وIgG
أو PCR للكشف عن الفيروس نفسه

3. العلاج
راحة تامة
شرب سوائل كثيرة لتجنب الجفاف 💧
خافض حرارة للحمى (باراسيتامول)
تجنب الأسبرين أو الإيبوبروفين لأنهم ممكن يزيدوا النزيف

4. الوقاية
ناموسيات عند النوم 🛏️
ملابس تغطي الجسم خصوصًا في وقت نشاط البعوض (الصباح والمساء)
مبيدات بعوض آمنة للمنزل
تجنب المياه الراكدة حول البيت 🚫💧

14/08/2025

السلام عليكم ورحمة الله وبركاته
كيف حالكم ي رهيبيين ان شآء الله طيبين

بالنسبة ل الطلاب الناوين يدخلو في المجالات الطبيه وعايزين يكون مميزين و ما عارفين يبدو كيف
عملنا ليكم ورشه مصطلحات طبيه

MEDICAL TERMINOLOGY WORKSHOP ❤🔥🔥🔥

فيها اكتر من 50 مصطلح طبي وامتحان نهايه الورشه
الورشه هتكون لمده 3 ايام مكثفه ومليانه علم ورهابة🔥
اونلاين على تلجرام
بمبلغ بسيط جدا

ل التواصل والاستفسار 0129834428

23/09/2024

عايزين نعمل كورس اونلاين بتاع basic anatomy لطلاب الطب السنه الاولى برسوم رمزية جدا وبطريقة مميزة جداااااا

❤موافقين اديكم التفاصيل
👍لا ما في داعي

26/08/2024

ــــــــــــــــــــــــــــــــــــــــــــــــ﷽ــــــــــــــــــــــــــــــــــــــــــــ
*اسعافات الحروق*
في قعدة جبنة في احدى احياء بلادي الجميلة كانت سميه تعد القهوة بتفاصيلها المميزة وفجأه حدث م لم تتوقعه انسكبت فيها القهوة الساخنه وصرخت باعلى صوتهاا واااي الحقوني😂
اسرعت الفتيات ل انقاذها
منهم من احضر الثلج والاخر احضر المعجون وبعضهم احضر زيت الزيتون
ثم توقفو ليسالو دكتورة فاطمه من منهم على حق
اسعفت الدكتوره سميه وبعدها كان موضوع اسعافات الحروق هو موضوع القعدة اليوم💜

ي دكتوره والله طول عمرنا بنخت معجون في الجرح شنو يعني بتقولي لينا غلط😏
طيب استنو اقول ليكم انوع الحروق التعامل الصحيح معاها بعد كدا اوريك ليه المعجون لا🙃

اولا عندنا الحروق ال من الدرجه الاولى ودي بتكون حرقه خفيفه كدا واثارها بسيطه
اسعافها ب مويه معتدله لا باردة لا سخنه و نزيل الخواتم والملابس من مكان الحرق ونمسح فيها مرهم زي mebo ولو الالم صعب ممكن نبلع مسكن
ثانيا الحروق من الدرجه الثانية و دي زي حاله سميه يكون الحرق deep. شوية اكتر من الدرجه الاولى ويتظهر فيها زي بثور فيها مويه
ل الاسعاف برضو نخت الجرح تحت مويه جاريه معتدله لمده 10 ل 15 دقيقه
م نعمل تلج لانه بزيد الالم و يضر الانسجة استخدام المعجون والزيوت بعمل التهابات في الجزء الفيهو الحرق
كيف طيب؟
جسمنا دا بمتص الحاجات الفيهو حتى الدليل انه في ادوية بنمسحها في الجلد وحقن بناخدها تحت الجلد لو المعجون دا دخل ال. circulation او الدوره الدمويه ممكن يعمل لينا اضرار وغير كدا بعمل التهاب محل الجرح 💙
م نفقع البثور البتظهر دي اصلا ربنا خلقها لينا ليه؟
اولا بتبرد مكان الحريق وبتغطي الجرح من الاتهاب والمؤثرات الخارجيه وفيها بروتينات بتساعد على ال healing لما نحن نفتحها بناخر الشفاء بتاع الحرق وكمان بنزيد نسبه انه الجرح دا يلتهب🩷

ثالثا واخيرا الجروح من الدرجة الثالثه وفي النوع دا ﺗُﺗﻠف ھذه اﻟﺣروق طﺑﻘﺗﻲ اﻟﺟﻠد و ﻗد ﺗُﺗﻠف أﯾﺿﺎً اﻟﻌظﺎم و اﻟﻌﺿﻼت و اﻷوﺗﺎر.ودي حاجه خطيرة جدا و م بنتعامل معاها في البيت بس بنزيل الخواتم والملابس الضيقه نلبسو ملابس فضفاضه ويصل الطبيب

طيب غير الجروح من الدرجة الثالثه متين بنمشي الدكتور؟
لو الحرق في الوجه
في مكان المفصل
في الاعضاء التناسلية

نسال الله العافية
that all about frist aid of burn
لو في سؤال اتفضلو وشكرا لكم اصدقائي

22/07/2024

عايزين البوست الجاي يكون عن شنو؟! ♡

16/07/2024

﷽
The Hypertension 🖤
كتير سمعنا عن ان فلان دا عندو الضغط
والله الناس ديل لمن اقعد جمبهم ضغطي برتفع 😂
ياخي بطل حركاتك دي بترفع لي ضغطي...
الضغط دا شنو اصلا؟؟!
نتفق على انه نحن عندنا في جسمنا نوعين من الاوعيه الدمويه
الاول بحمل الدم ل القلب وسميناهو الوريد Vien 💙
والثاني بشيل الدم من القلب وسميناهو الشريان Artery ❤
لما نتكلم عن ال Hypertension معناها بنتكلم عن المشاكل الفي الشرايين.. ليه ؟!
لانها عباره عن elastic tissue مطاطيه ممكن تنقبض وتنبسط على حسب الحاله بتاعت الجسم اي انقباض معناها زيادة ضغط✅
🙋‍♀️طيب معناها كلام حبوباتنا دا صح عادي الزول ممكن يرفع الضغط بطريقه كلامو
◾كيف يعني؟
🙋‍♀️ممكن مثلا الزول دا يكون بهاجمني بالكلام وانا اكون في وضعيه ال fight or flight يعني اشغل sympathetic system ازيد ال hard reat و ال pulse و اعمل vasoconstriction بكدا ه ازيد ال blood pressure 😏

◾تصدقي كلامك في محلو؟ 🌚♥حبوبتنا كانو دكاتره وحكماء من غير م يدرسو..🔥
بس الارتفاع اللحظي الناتج عن الاستريس دا م بنشخصو كمرض عشان كدا الدكتور عشان يقول ليك بملء فمه ان انت عندك ارتفاع في الضغط(المرض المزمن) بطلب منك تقابلو 3 مرات في الاسبوع ويفحص ليك الضغط بتاعك ... بعد م يتاكد انه انت م خايف. او راكب سلالم او جاري...(يعني وانت في حالتك الطبيعيه) ضغطك مرتفع في ال 3 فحوصات بعد كدا بنبدا ندخل في رحله المرض المزمن

🙋‍♀️طيب ممكن اعرف ال normal range of the blood pressure

◾ايوة لازززم الجهاز البنقيس بيو اسمو ال sphygmomanometar عنده عده انواع ممكن نتكلم عنهم مره تانيه وعن طريقه القياس.. المهم ي جماعه اول م ابدا القياس بسمع اصوات نبض اول نبضه سمعتها بسميها ال systol ودي معناها القلب مقبوض او حصل ليو contraction وبسمع دق دق دق 💃💃لحد م يقيف واخر نبضه سمعتها دي ال diastol معناها القلب انبسط ونحن انبسطنا 😂🔥
الطبيعي بتاع ال systol مفروض يكون 120 زايد او ناقص 10
في مراجع بتقول انه يكون اقل من 120 بس الاغلبيه ان يكون 120+/-10
ال diastol 80+/-10
برضو في اختلاف..
لما اجي اقرا الضغط بقرا systol /diastol
يعني مثلا 120/80
ب اختصار
👨Normal: Systolic lower than 120 mm Hg and diastolic lower than 80 mm Hg.
🧔Elevated: Systolic 120-129 mm Hg and diastolic lower than 80 mm Hg.
👨‍🦳Stage 1: Systolic 130-139 mm Hg or diastolic 80-89 mm Hg.
👴Stage 2: Systolic 140 mm Hg or greater or diastolic 90 mm Hg or greater.

🙋ممكن اعرف اسباب الضغط

◾نحن عندنا نوعين من الضغط العالي قسمناهو على حسب السبب البعملو
1- Primary: High blood pressure that is not related to another medical condition.
ودا 90% من حالات ال hypertension
غالبا بجي ل العيان عمره بعد ال،45
وللاسف السبب بتاعو idiopathic يعني م معروف🤷‍♀️
بس في حاجات بتزيد ال risk بتاع الاصابه
زي: overweight.
eat too much salt and do not eat enough fruit and vegetables. do not do enough exercise.drink too much alcohol or coffee (or other caffeine-based drinks)smoke.have a lot of stress.are over 65.have a relative with high blood pressure.
لو لاحظت ان الحاجات دي اغلبيتها life style لو الزول غيرها بقلل ال risk of hypertension
بس ال age م حتقدر تغيرو 😂😂لكن الزول يكون حريص على نفسو واكلو م في داعي ل الوزن الزائد ولا ل السجارة والقهوة الكتيرة.... صحتك اهم
2-Secondary hypertension is high blood pressure caused by another condition or disease. Conditions that may cause secondary hypertension include kidney disease, adrenal disease, thyroid problems and obstructive sleep apnea diabetes mellitus.
يعني عندي مشكله في عضو معين زي القلب او الكلى مثلا وحصل تغيرات في ضغط الدم بسبب العضو المصاب دا ف حصل لينا hypertension ك مضاعفات ل المرض الاول🥲
في الغالب اول م اشك انه الضغط سببه secondary بعمل فحوصات ل وظائف الاعضاء ونسبه الصوديم والبوتاسيوم والكرياتنين والجلكوز لانه داء السكري برضو بعمل hypertension.

طبعا بعداك بكتب ل العيان العلاج بتاعه وببدا بجرعات صغيرة واتابع معاو واشوف لو في تحسن واذا م في تحسن بزيد الجرعه
•موضوع ال pharma نتكلم عنه في بوست تاني ان شآء الله

•لو انا مريض ضغط او بعرف مريض ضغط
لازم اوصيهو ب انه يكون have good life style م ممكن الزول ياكل دهون مهدرجه يعمل جلطه تسد الشريان وندخل في مشاكل ضغط
والكسل م حبابو😂الناس تحاول تتحرك .
دمتم سالمين❤
اذا في اي سؤال اكتبو في الكومنتات انا م حبيت اطول البوست اكتر من كدا

*الاء الصادق ساتي*

14/07/2024

. ﷽

السلام عليكم ورحمة الله وبركاته
عايزين ال. topic الجاي يكون عن
ال hypertension الضغط العالي👍
داء السكري diabetes mellitus ❤

البياخد تصويت اعلى ح ارسلو اول🩶

13/06/2024

﷽
*إسعافات الجروح*
_ احمد مالك بتكورك يولد
= اتجرحت ي امي والدم ماشي كتير شديد الحقيني بالبن 💔
_بن شنو يولد احسن حاجه بيت العنكبوت
"ي بت والله م في احسن من الرماد المرة الفاتت عشه بت نور الدين عملتو لبتها طوالي النزيف وقف
•ي بت الحب شاي زاتو وكمان بمنع الاتهاب
=ي جماعة جيبو اي شي المهم الحقوني
_ اها هسي نعمل ليو شنو عشان الدم دا يقيف حيرتوني معاكم
كدي نكورك ل الدكتورة دي تجي تحل المشكله دي
ي دكتووورةةة ي دكتووورة
---نعم ي خالتي الحاصل شنو
-- والله احمد دا عندو جرح بنزف و م عرفنا نعمل ليو بن ولا شاي ولا عصير اتحيرنا زاتو دا جرح ولا حاجه تانيه
ـــــ بس شوفي ليك قطعه نضيفه اربطي ليو الجرح بتاعو واضغطي عليو لحد م اعقم حاجاتي واجيك
اتجرحت بشنو ي احمد
_بالسكين
--الجرح بتاعك دا كبير وعميق بحتاج زي 6 غرز انا ادواتي معاي ومعقمه وهخيط ليك وبعدين نجيب الحقنه بتاعت التتنس antitetanus وتاخد مضاد حيوي antibiotic كل 8 ساعات لمدة تلاته ايام وبجي بغير ليك بعد يومين ان شآء الله
=جزاك الله خيراً ي دكتورة طيب وريني لما زول يتجرح تاني اتصرف كيف
_الله يعافيك ي خالتو
الجرح دا معناها انتي قطعتي جزء من الجلد والانسجه التحت الجلد ومرات بتصل ل العضلات وفي حاله النزيف الشديد زي حق احمد دا قطع ليهو وريد وفي ناس بقطعو شريان عديل.

م ممكن انا ادخل في ال. system بتاع جسمي بن ولا بيت عنكبوت ولا شاي وفي ناس بختو تمباك وناس زيت عربات شفناهم كتير في المستشفى بدمرو جرحهم بنفسهم
ممكن البن يكون فيهو coagulation factors او عوامل بتاعت تجلط توقف النزيف بس لو النزيف دا نتيجه لقطع شريان والله العيان دمو يتصفى ويموت في ساعات وانت بتكون قايل نفسك اسعفتو ب البن بتاعك دا وحتى لو م ضرب شريان البن مع الزمن بخلي الجرح يلتهب
الشاي مطهر بس لو خليتو في الجرح لفترة مع الزمن برضو الجرح بيلتهب
اما باقي الحاجات دي م عارفه تفسير ليها بس متاكده انها م بتفيد الجرح دا بحاجه م ممكن زول مجروح احشي الجرح ب بيت عنكبوت مليان تراب وبكتريا الا لو عايزة انتقم من الزول 😂
= مخير الله ي دكتورة اها طيب نعمل شنو
_اول حاجه الزول دا لو اتجرح بحديدة مهما كان عمق جرحو يصل الدكتور عشان ياخد حقنه التتنس
باقي الجروح.. على حسب عمق الجرح في جروح سطحيه superficial wounds دي ممكن استخدم معاها العلاج البلدي بقطعه قطنيه نضيفه ويريت لو شاش او قطن ننضفها بمويه ملح.... وليمون ودي مواد مطهره بحت م عندنا مشاكل معاها😂💙 اما لو عندكم يامدين ف نستغنى عن الليمون

لو الجرح عميق نجيب قطعه نضيفه نضغط بيها مكان الجرح وبكدا بنكون بنحاول نوقف النزيف ب الضغط لحد م نصل الدكتور وهو يقرر محتاجه خياطه او لا
= ي سلام عليك ي دكتورة الله يزيد علمك و يوفقك دنيا واخرة ويعليكي م يدليكي
--اللهم آمين يارب جمعا عليك الله ي خالتو كتري دعواتك السمحه دي انا محتاجاها❤️

*الاء الصادق ساتي*

27/02/2023

المسكنات Analgesic

حاجه خديجه : ي بنتي عليك الله وانتي جايه من المستشفى. جيبي لي الدواء بتاع المفاصل عشان الصيدليات الجمب المستشفى ارخص
:دواء بتاع مفاصل؟
مسكن يعني ولا شنو؟
حاجه خديجه: اي مسكن سمح شديد بس المشكله لما يخلص و م ابلعو الألم بزيد شديد
:طيب ممكن اشوف علبتو؟
حاجة خديجه : اي قاعده في الدولاب هناك شليها
:طيب ..... ipuprofen 😳 بتاخديو 5 سنوات؟؟؟؟
حاجة خديجه: اي ي بنتي مالك مخلوعه كدا
:بعد م اخدتيو بقى عندك آلام في المعده صح؟
حاجة خديجه: اي م شاء الله والله ..انتي عرفتي كيف 😂
:اي دي من اثارو الجانبيه...عملتي ليها شنو ؟
حاجة خديجه: اي كتبو لي مضداد حموضه والله الالم قعد يخف شديد الحمد لله
:انا ح آجل مشي الشغل دا شويه عشان أقول ليك الحاجات دي 😔

اولا الألم دا الله ادانا ليو عشان ينبهنا بإنه في حاجه غريبه في جسمنا مفروض نعالجها م نوقف الألم وخلاص
اتخيلي مثلا حمودي دا ببكي عشان جعان أو مثلا عشان قرصتو نمله ولا عطشان أو بطنو واجعاو بس نحن م فاهمنو
قمنا اديناهو اللهايه و هو سكت وكدا ارتحنا من الجوطه
حاجة خديجه: لالا لازم أعرف مشكلتو و اوديو لامو كيف يعني اديو لاهايه
:بالضبط كدا لازم أعرف المشكلة شنو واحلها م اوقف التنبيه أو ألبكاء بتاعو دا نفس الألم
أو مثلا زي انزار الحريق مفروض نحن نشوف الحريق وين ولا مفروض نكسر الانزار ونقعد
حاجة خديجه: طبعا نطفي الحريق
:بس نحن لما ناخد المسكنات كأننا بكسر الانزار لما يكون في حاجه م طبيعيه في جسمك الحته الفيها الحاجة الما طبيعيه دي بترسل اشاره للدماغ والدماغ برسل ليها اشارات عشان تدينا الشعور بالالم دا ربنا م خلق الالم دا عشان نوقفو ...لا خلقو عشان نعالج سببو...المسكن بمشي المخ بوقف الاشاره بتاعت الألم دي بس لسه المشكلة قاعده.
و من الاثار الجانبيه للمسكنات القرح peptic ulcers اذا في المعده أو الامعاء و دا سبب ألم البطن الكان عندك قرحه المعده دي يعني زي حصل تعريه في جزء من جدار المعده والبزيد الألم هو حامض المعده عشان كدا كتبو ليك حاجات تقللو بس لما تقلليو كدا ممكن يجيك عسر هضم ممكن نتكلم عن الموضوع دا في وقت تاني
تخيلي انه في ناس بيجو بفشل كلوي renal failure وم في سبب عملها ليهم غير المسكنات دي و غير انه ممكن تعمل مشاكل في القلب و اضرار كتيرة حتى ممكن تادي للجنون
حاجة خديجه: جنون عديلل كدا طيب وريني أعمل شنو يعني أموت بالوجع دا؟!
:لا بعد الشر عليكي العلاج كألاتي
زي م قلت ليك قبيل نعالج السبب وجع المفاصل و هشاشه العظام العندك دي حاجة طبيعيه تخيلي ؟
عشان نحن ك اناث لما نصل عمر ال 50 دا يعني after the menopause في هرمون مهم شديد بقل (اسمو الاستروجين. )هو بحافظ لينا على العظام وبمنع هشاشتها و برضو بحافظ على المفاصل بس بعد م وصلتي العمر الجميل دا بتحتاجي انك تهتمي بنفسك اكتر و تاخدي استروجين من بره و
Vitamin D وصوديوم و مغنسيوم
برضو في حاجه اسمها الكركمين بعمل نفس عمل المسكنات بدون اثار جانبيه
على فكره الكركم زاتو لو مسحتيهو محل الالتهاب بعالج الاتهابات
وللوقايه من الامراض التانيه لازم تاكلي اكل صحي و تعملي تمارين رياضيه اخدي فايتمينات و نومي بدري بعد العشاء طوالي لو ممكن
المسلسل احضري اعادتو م تساهري
حاجة خديجه: يسلام والله شجعتيني شديد و حاضر حعمل كل القلتيهو بس مرات آلام بكون صعب شديد م بقدر إتحملو
:م مشكله اخدي المسكن و طوالي امشي المستشفى افحصي وشوفي المشكلة الحقيقية شنو بس م تعتمدي على المسكنات كعلاج
حاجة خديجه: خلاص انا حوقف العلاج غير انه بمرضني م بعمل حاجه وحعمل كل الحاجات الانتي قلتيها
: لااااا العلاج م بوقفو كدا طوالي بذات ال nonsteroidal anti-inflammatory drugs نحن بس نقلل ال dose شويه شويه لحدي م نبقى م محتاجين ليو طبعا بمتابعه الطبيب بتاعك🙏
حاجة خديجه: ايوااا حاضر. ي بنتي
:يلا مع السلامه 🤍
حاجة خديجه: الله يسلمك ي بنتي الليله حقول لنسوان الجمعيه كلهم الحاجات الخطيرة دي🔥
:ي سلام وكمان وري الناس البياخدو علاجات ضغط المسكنات دي بتقلل من ال effect بتاع العلاجات بتاعت الضغط
وبرضو بالمناسبه في دراسه حديثه بتقول ان الاطباء م بنصحو استعمال الاسبرين دا م ياخدوهو إلا الناس الاتعرضو لجلطات قبل كدا عشان خطورتو
حاجة خديجه: هنا بيبيعهو في الدكان كمان 💔 ربنا يعين وشكرا ليك ي بنتي يلا امشي الحقي العيانين ديل🤍

27/02/2023

السلام عليكم ورحمة الله وبركاته
انا الاء الصادق طالبه في كليه الطب
حبيت اشاركم بعض المعلومات الصحيه
أكيد ح تفيدكم حتى لو بنسبه 1%
وحتى لو عايزين نتكلم عن مرض معين أو علاج معين نشوف اكتر حاجة بتنطلب ونكتب عنها
وحنعمل مسابقات 🔥🔥
حنتعلم ونستفيد بشكل ممتع
ولو في حاجه انا نسيت اقولها ي ريت تذكروني عشان كلنا تستفيد♥️✨
ي رب دايما تكونو بخير وصحه❤️🙏

get medical informations with alaa

18/01/2026

23/09/2025

14/08/2025

23/09/2024

26/08/2024

22/07/2024

16/07/2024

14/07/2024

13/06/2024

27/02/2023

27/02/2023

Address

Telephone

Website

Alerts

Contact The Practice

Shortcuts

Share

Category