سودان بدون إدمان

13/11/2025

ستتم أرشفة الصفحة نظرًا لتوقف المبادرة بسبب الحرب

نسأل الله أن يعم السلام و الرخاء في جميع ربوع بلادنا الحبيبة 🇸🇩

11/08/2023

22/01/2023

25/08/2022

28/06/2022

ما تغشكم الرُدندرة وما تتغلبوا في الدواس

مشيت قبل كم سنة اشتري لي زهور و لاقتني الشجرة بتاعة الورد في الصورة دي و اشتريت منها شتلتين و كانت زهورها زاهية و جميلة و ألوانها قمة الجمال و لما طالعة من المشتل كم زول علق لي علي جمالها لكن في زول كده أداني نظرة غريبة ما فهمتها لغاية ما قريت مقال في الجريدة الرابط بتاعه تحت بيتكلم عن شجرة الورد حقتي زاتها .

شجرة الورد دي إسمها بالعربي الردندرة
‏Rhododendron ponticum.. ..طلعت مصيبة و آفة و سامة للحيوانات و بعض أنواع النحل وبتقتل الأشجار الجنبها و بتخنق الحياة…. أتاريه عمو داك كان عايز يقول لي يا سجمانة السم دا ما تشتريه 🤣

في بعض الدول نحل العسل اتعايش مع الردندرة لكن بدل يعمل عسل عادي بقي يعمل
(عسل الجنون) mad honey ، و دا نوع خطير من العسل بيأثر سلبيًا علي قنوات مهمة في الجهاز العصبي و بالتالي بيأثر علي القلب و الأوعية الدموية و بيعمل هلوسة و انخفاض في ضغط الدم وإضطراب في ضربات القلب و دوخة و ضعف في العضلات و زغللة في العيون و خدر و تشنجات و تعرق و طمام و إسهال و هبوط في التنفس و في بعض الحالات بيعمل ذبحة قلبية و بيوصل الموت Near fatal و قد يؤدي للوفاة بسبب المادة السامة الفعالة و إسمها grayanotoxin.

السم دا إستعمل في أول حرب كيميائية في العالم بين الفرس و الروم في سنة ٦٧ قبل الميلاد تقريبًا لما الروم كانوا مطاردين الفرس عند البحر الأسود قاموا الفرس وزعوا مواعين فيها عسل الجنون في طريق جيش الروم و الجماعة أكلوا العسل و هلوسوا و غلبهم المشي و اتبشتنوا و الشغلانية انبشقت و قاموا عليهم الفرس و هرسوهم و قتلوا منهم ألف جندي.

أها القصة دي علاقتها شنو بسودان بدون إدمان ؟
في أصدقاء سوء بيكونوا ردندرة.. شكلهم جميل و ناس cool 😎 و يقولوا ليك تعال جرب عسلنا دا ح يسعدك و ينسيك الهموم و يساعدك في القراية و دا حق الرجال و الناس الخطيرة و بعد كده هم يخنقوك و يخنقوا حياتك و أي حياة تجي جنبهم و عسلهم يكون أسوأ حاجة حصلت ليك يمرضك و يهلوس بيك و ينتهي من صحتك و مستقبلك. و نحن في حالة دواس و حرب كيميائية مع ناس بتدمر صحة شبابنا و موفرة ليهم المخدرات بأسعار بسيطة و أحيانًا مجانًا مقابل التوزيع في الجامعات و المدارس و في أماكن الأكل و الشراب و حتي جنب المساجد.

فيا شباب ما تغشكم الردندرة و ما تتغلبوا في الدواس 💪🏽



للمزيد من الإطلاع العلمي علي الموضوع:
https://www.ncbi.nlm.nih.gov/pmc/articles/PMC3404272/

الصورة من Gardeningexpress.co.uk

رابط الموضوع في الجريدة

‏https://apple.news/ADSBO0AR6SvK7wacsAE8lJQ