Dr.Muhannd Saif Lodah -د.مهند سيف الدين

17/09/2025

الضنك و البنادول
مع شح دربات البندول و ارتفاع معدلات الاصابة بالضنك و الحوجة التامة للبندول كخافض امن للحرارة ..كما نعلم الضنك مرض فيروسي ينتقل عن طريق باعوضة تسمى بالزاعجة المصرية Aedes egypti
هل يمكن الاستغناء عن المحلول و اخذ البندول في شكل حبوب و اقراص؟؟؟؟

كلا الشكلين (الحبوب) والـبندول المحول
يحتويان على نفس المادة الفعّالة
(باراسيتامول/Acetaminophen).

الفرق الرئيسي هو سرعة الامتصاص (Tmax)
The time to maximal concentration

المحلول اسرع في المفعول لكن الفعالية النهائية (خفض الحرارة/تسكين الألم الكلي) متقاربة عند جرعات متساوية.

دا يعني عمليًا شنو بالنسبة لحمى الضنك؟ التوصية العامة.. في حمى الضنك نستخدم الباراسيتامول فقط لتخفيض الحرارة وتسكين الألم؛ ممنوع منعا تام استخدام الأدوية المضادة للالتهاب غير الستيرويدية (أيبوبروفين ومثيلاتها، أو الأسبرين) لأنها تزيد خطورة النزف. دي توصية WHO/CDC/PAHO.
هل المحلول أفضل في الضنك؟

من ناحية التحكّم السريع في الحرارة: المحلول/ بدي بداية مفعول أسرع (مفيد إذا المريض يحتاج تخفيف سريع للحمى والألم). لكن لا توجد دلائل قوية أن دا بدي فائدة سريرية مستمرة أو يقلل من مضاعفات الضنك مقارنة بالحبوب العادية

من ناحية السلامة : استخدام الباراسيتامول مرتبط بارتفاع إنزيمات كبدية عند مرضى الضنك في تجربة عشوائية كبيرة؛ عشان كدا يجب الالتزام بالجرعات الموصى بيها وعدم الاستخدام المفرض فقط .

جرعة للكبار: عادة 500–1000 mg كل 4–6 ساعات حسب الحاجة، لا تتعدّى 4 غرام/24 ساعة (كحد أعلى للبالغ السليم). في حالات خطر على الكبد أو كبار السن قد يُخفض الحد إلى 3 غ/يوم. اتبع تعليمات المنتج.

في الضنك المفروض الالتزام بفاصل زمني 6 ساعات وتثقيف المريض بعدم الجمع مع أدوية أخرى تحتوي باراسيتامول.

إذا المريض عنده أمراض كبدية أو بشرب كحول بكميات كبيرة المفروض نتجنب زيادة الجرعة وراجع وظائف الكبد قبل/أثناء الاستخدام.

لا تستخدم NSAIDs/أسبرين ممنوع في حالة الاشتباه بالضنك لخطورة النزيف.

ممكن نلخص التوصيات بشكل عام في نقاط:
1. للضنك بنستخدم باراسيتامول بس لخفض الحرارة؛
ممنوع استخدامه NSAIDs/أسبرين

2.إذا دايرين تخفيض حرارةبشكب سريع: المحلول/ بدي تأثير أسرع، لكن الفعالية الإجمالية متقاربة مع الحبوب.

3. ما ترفع الجرعة لأنه الشكل المحلول أسرع؛ التسمّم الكبدي ممكن خاصة عند تجاوز 4 غ/يوم أو عند وجود أمراض كبد/كحول.

4. كان شفت أعراض اشتباه بمضاعفات (نزيف، ألم بطن شديد، قيء مستمر، نعاس/تحويل الحالة العقلية، بول غامق جداً أو اصفرار شديد) — ودي المريض المستشفى سريعًا.

اخر شي الضنك ما عنده علاج سوى الراحة التامة و مراقبة المرض منعا للمضاعفات و خفض الحرارة و مراقبة الصفائح الدموية ..و مكافحة الناقل البيولوجي الباعوض

10/09/2025

الضنك يفتك و ينهش ..لا يرحم ولا يبالي ...

12/08/2025

في حاج مريض سكري سألني سؤال جميل جدا
وحبيت اكتب بوست عن الموضوع
قال لي ليه الانسولين لازم يتحفظ في التلاجة او تلج لو برة البيت والا بفسد و بصبح غير فعال مع انه الانسولين في اجسام الناس الما عندها سكري ما بفسد و درجة حرارة الجسم ٣٧ درجة مئوية
طيب ي حاج ...
عشان نعرف ليه الإنسولين في جسمنا ما بيفسد، لازم نفهم نقطتين
في جسمنا ..الإنسولين بيتخزن في حويصلات تقدر تقول زي “خزنة” خاصة جوه خلايا البنكرياس، وسط مثالي من حيث الحموضة والأملاح، وفي درجة حرارة ثابتة ٣٧ ، وما بيقعد كتير قبل ما يشتغل، فما بلحق يفسد.

برا جسمنا.. الإنسولين في القلم أو الأمبولة بروتين نقي
حساس، لو اتعرض للحرارة أو الضوء أو الاهتزاز بيتغير شكله ويفقد مفعوله، عشان كده محتاج التلاجة لحد وقت الاستخدام.

مثلا زي اللبن الطازة في ضرع البقرة ، آمن ودافي وجاهز للشرب، لكنن لو حلبناه ختيناه في قزازة وسبناه في الحر… حيفسد.
اتمنى الفكرة تكون وصلت ...بالتالي الانسولين لازم يكون محفوظ بشكل مثالي والا الحقنة الانت بتعبيها مثلا ٢٠ وحدة بتكون المادة الفعالة فيها ما مكتملة لل ٢٠ وحدة دي بالتالي ما بشتغل كويس او الكمية كلها فاسدة فما منها فايدة ..دا بودينا لانه حتى بعد الحفظ المفروض لم نجي نعبي الحقنة لازم نحرك الامبولة بشكل دائري من غير اهتزاز عشان المحلول كله يكون متجانس و ما مترسب ..بس من غير اهتزاز كبير عشان م يتكسر و يفسد برضو
شفانا الله و اياكم و البسكم ثوب العافية دوما ✨️💕

11/08/2025

مُمارسة الطب في السودان مؤذية نفسياً ومحطِمة تماماً لطموحات وآمال وإلتزامات أبناء الأسر البسيطة ..
البوست دا مكتوب من 2021 الوضع الان اسوأ بمراحل كبيرة ، الرسوم تضخمت ، الفرص في الخليج اصبحت شبه معدومة بعرف ناس ليهم سنة وسنتين ولسة شغالين في وظائف برة المجال لأنه مالاقين فرص ، القرارات بتاعة ترامب الاخيرة قفلت الطريق قدامنا كسودانيين في طريق الزمالة الامريكية ، في ناس متشت وماطلع ليها فيز لدهول امريكا ، اتخيل زول يتعب ويشقى ويمتحن الامتحانات دي كلها ويدفع دم قلبه وبعد دا كله ما يقدر يخش ،
كلامي دا ما تخويف للناس والارزاق دي مكتوبة قبل ما نتولد بس هو عبارة عن قراية للواقع عشان لو في زول لسة ما خش المجال يتريث ويقدر يقرأ الوضع بصورة عامة عشان بس ما يتفاجأ بالوضع .
🔴معلومة :نحنا متخرجين من ٢٠٢٣ وللان مافي زول عنده اكمال امتياز كمرحلة اولى للمعمعة دي + 8 سنوات دراسة جامعية ، بمعنى 10 سنوات منذ دخول كلية الطب ، 10سنوات دفعتنا الان في مصر اخصائين او على وش التخصص ، والله المستعان

إلا لو كان المُمارس من أسرة ميسورة الحال بحيث إنها قادرة توفر مُنصرفات الدراسة وتكاليف الإمتحانات والتدريب والتحضير والتخصُص ...الخ

او بلغة أكثر وضوحاً :
(لو أهلك ما غنيانين ما تقرأ طب) ..

لأنك بعد سنين طويلة من الدراسة الجامعية والتخرُج حتدخل التدريب (مرحلة الإمتياز) وحتكون مُستهلَك لصالح الدولة بدون مُقابل يغطي مُنصرفاتك ..

حتقضي (12 شهر) تدريب بدون مُرتب وحتعتمد على أسرتك إعتماد مُباشر من قروش المواصلات وحتى الشاي والقهوة طيلة فترة التدريب ..

بعدما تخلص تدريب وتنجح في إمتحان مُمارسة المهنة وتقضي (سنة) الخدمة الوطنية وتبقى (طبيب عمومي) قدامك واحد من إثنين :

إما تشتغل في السودان بمرتبات بالكاد تسد رمقك ، وعادي تجي الشُباك بتاع الخزينة ويدوك 700 جنيه ثمن كباية قهوة حافز شهري مُقابل شهر كامل من السهر والأرق والجوع والرِباط في المستشفى ..

أو تبيع (الوراك والقدامك) وتبقى ضحية يتخاطفوك السماسرة وتدفع 20 الف ريال (فما فوق) مُقابل عقد بمرتب 7 الف ريال في منطقة طرفية بالخليج ..

ولو قررت تمتحن وتتخصص حترمي نفسك تحت رحمة مجلس لا يرقب في مؤمنٍ إلاً ولا ذِمة ، تدفع رسوم وتمتحن وتنجح لكن ما يعتبروك ناجح لأنهم محددين مُسبقاً عدد الناجحين ..

علماً بإنو رسوم الإمتحان رفعوها من 15 الف ووصلت 100 الف، تدفعها من دم قلبك وما بتنجح حسب مفهومهم هم للنجاح ..

ولو بقيت محظوظ ونجحت حتصطدم برسوم التدريب (ضريبة النجاح) واللي رفعوها من 20 الف لي 500 الف ..

وحتقضي 4 او 5 سنوات تدريب للتخصص بدون مقابل (وأهلك لو مستطيعين بختك) ولو حالك زي 90٪ مننا حتضطر تقطع التدريب وترمي نفسك تحت رحمة السماسرة عشان تشتري عقد عمل تقدر توفر بيهو مصاريف لسنوات التدريب المنتظراك ..

وللآن إنت ما إتخصصت ، ولا قدرت تصرُف على أسرتك ، ولا قدرت تتزوج ، ولا ولا ولا ...الخ

ولو فكرت او وسوس ليك الشيطان بالتخصص للزمالات العالمية زي STEP و MRC إستعيذ بالله من قلة الحيلة وإرتفاع الدولار واليورو وقول حسبنا الله ونعم الوكيل ..

ولو أهلك مرطبين قول يا زمالات وكُب الدولارات وأرمِي قدام ..

ولو إتوفقت ولقطت وبعت الوراك والقدامك وإتخصصت برضو حتقعد تعافِر وتساكِك لقمة العيش وحتلاقي دفعتك وزملانك واقفين في الموقف وشعار تاكسي مربوط في عربياتكم ..

دا إذا ما إتلاقيتو صُدفة في مركز خدمات ترحال لامن تجوا تغذوا حسابكم او تسددوا غرامات الرحلات ..

حتعيش فقير لا تملك قوت يومك وتلقط رزق اليوم باليوم وعلى بال ما تدفع وتتخصص وتقيف على حيلك حتلقى عمرك مشى بس ما تندم لأنك مشيت سكة (لو نجحت) حيستمتعوا بيها عيالك بعدك ..

ولو محظوظ حتلحقك دعوات المرضى الخففت معاناتهم بس حتظل ما لاقي اليعالج معاناتك ..

فلو أسرتك بسيطة ومنتظراك مسؤليات شوف مجال غير الطب ، ولو مرطب وأهلك ما محتاجين ليك وما عليك مسؤليات أقرأ طب عشان تستمتع بي كلمة (يادكتور) ..

ما تتورط وتمشي في سكة عطش

حاشا لِلّٰه من نشّكِي ربنا لي خلقو ؛ وإنما بنحكي واقع شايفنو وعايشنو ، بحيث إنو مافي قعدة أو مجلس يضُم أطباء إلا وبيتكلموا عن career shift وتبديل سكة العطش بي راحة البال ..

وبعتذر للزملاء المطحونين (دون مُقابِل) الإلتقطوا ليهم الصورة التحت في ذات غفوة وهم بيدفعوا ضريبة التدريب في سكة العطش ..

منقول Dr. Mohammad Adil

02/08/2025

🔵 الطب ما قرآن منزل من السماء

يا جماعة، في حاجات مهمة لازم نعرفها عن الطب والدكاترة 👨‍⚕️👩‍⚕️

📌 مرات تمشي لي دكتور يديك علاج، وتمشي لي دكتور تاني يديك علاج مختلف
بتفتكر واحد فيهم غلط والتاني صح؟ لا يا غالي ، ما بالضرورة!

✅ الطب مدارس
يعني في طرق كتيرة لعلاج نفس المرض
واختلاف الأدوية أو طريقة العملية ما معناها في واحد ما بيفهم
دي بس اختلاف خبرة، وتجربة، ومدرسة اتعلم منها

📌 ممكن واحد يكتب ليك فحص معين، وواحد تاني يكتب ليك فحص مختلف
ده ما معناهو في زول جاهل، بالعكس، كل واحد شايف الحالة من زاوية معينة

📌 حتى العمليات الجراحية، في دكتور بفتح من جهة، والتاني من جهة تانية
كلهم اتعلموا طرق مختلفة، والنتيجة واحدة بإذن الله

❌ أخطر حاجة لما تقول "الدكتور ده ما بفهم" لمجرد إنو غير التاني
الكلام ده بيضرب الثقة بين المريض والدكتور
وبيخلق فوضى، وما بيساعد في العلاج

🎓 الطب ما إنجيل أو توراة أو قرآن
ما في طريقة واحدة صحيحة بس
في خيارات متعددة وكلها ممكن تكون صحيحة حسب الحالة

📚 الطب مدارس ومراجع كتيرة
وكل دكتور بختار الأنسب حسب خبرتو

✋ فساعدوا الدكاترة إنهم يساعدوكم
ما تحكموا عليهم بسرعة، واسألوا بكل احترام: "ليه اخترت الدواء ده أو الفحص ده؟"

📣 شارك البوست ده لو شايف إنو مهم، عشان نوعي بعض ونكبر الوعي الصحي في البلد

30/07/2025

المثل بقول :" سواة كريت في القرض تلقاهو في جلدها."
🧴
📍 قصة قابلتني وانا بتصفح التايملاين

في طفل عمره 6 شهور في دولة مصر الشقيقة ، اتحجز في المستشفى، وشه منفوخ وجسمه فيه تورم غريب، شعره خشن، وفيه دهون متجمعة في ضهره.
أهلو اتخلعو، والدكاترة شكّوا في حاجات كبيرة: ورم في المخ؟ خلل في الغدة الكظرية؟!

لكن المفاجأة كانت مؤلمة أكتر…

السبب: كريم "بيتاديرم"!

أيوه، الأم كانت بتخت الكريم مع كل تغيير للبامبرز… مرات في اليوم… وبتخلص العبوة خلال 4-5 أيام!
وبعد فحوصات كتيرة، اتضح إنو الطفل عندو متلازمة كوشينج Cushing syndrome – مرض خطير بيحصل لما يكون في كورتيزون زايد في الجسم.

---

📌 شنو هو الكورتيزون؟

الكورتيزون (أو الستيرويدات) مادة علاجية قوية جدًا، بتستخدم لعلاج التهابات الجلد، الربو، أمراض المناعة، وحالات خطيرة تانية.
لكن خطورتها الكبيرة بتجي من سوء الاستخدام، خصوصًا الموضعي (الكريمات)، لو اتستخدمت بكميات كبيرة أو لفترة طويلة أو في مناطق حساسة.

---

❗أخطر حاجة: استخدامه بدون وصفة طبية

كتير من الناس بيستعملوا كريمات الكورتيزون ساي كدا:

عشان تبييض البشرة

أو تنعيم الجلد

أو إزالة الحبوب

أو علاج الحساسية أو الالتهابات البسيطة

وأسوأ من دا كله… في ناس بيخلطوها مع كريمات تانية ويبيعوها تحت مسميات:
"خلطة تفتيح"، "كريم عرسان"، "كريم فوري"، "خلطة الصيدلية"! ومسميات كتيرة

---

💣 أشهر الكريمات الخطيرة دي:

بيتاديرم (Betaderm)

فيوسيكورت (Fucicort)

كيناكومب (Kenacomb)

ديرموفيت (Dermovate)

كيوتيفيت (Cutivate)

إليفات (Elovate)

هايدروكورتيزون (Hydrocortisone)

دي كلها فيها كورتيزون بتركيزات مختلفة، واستعمالها بدون رقابة طبية ممكن يسبب
☠️ مضاعفات خطيرة:

ترقق الجلد وحرقان وحكة

تغير لون الجلد الدايم

زيادة الشعر في الوجه والجسم

خطوط حمراء أو بيضاء في الجلد (Stretch marks)

وأسوأها: امتصاص الجسم للكورتيزون ودخول الطفل أو الكبير في متلازمة كوشينج زي الطفل المسكين دا

---

🧕🏽 للأمهات خصوصًا:

ما أي حاجة تبكي الطفل معناها كريم بيتاديرم!
المنطقة الحساسة رقيقة جدًا، وامتصاص الكورتيزون فيها عالي جدًا.
مافي داعي نعرض أطفالنا للخطر عشان "الطفح الجلدي" البسيط.

---

🩺 الحل شنو؟

1. أي كريم فيه كورتيزون لازم يكون بوصفة طبيب

2. ما تستخدم الكريمات دي لفترة طويلة بدون إشراف

3. لو في تحسن بطيء أو تكرار المشكلة، راجع الطبيب

4. ما تسمع لنصائح "الفيسبوك"، "قروبات الواتساب"، أو "جارتك الفاهمة أكتر من الدكتور"!

الكورتيزون ما لعب أطفال.
هو سلاح ذو حدين… ممكن ينقذ وممكن يدمر.
خلي حرصك على نفسك وعلى أولادك أكبر من رغبتك في "تفتيح سريع" أو "حل مؤقت".

نشر الوعي مسؤوليتنا كلنا.
✒️: Dr.Muhannd Lodah

29/07/2025

بعتذر عن الصورة ولكن
الليلة حاتكلم عن الصديق العدو او العدو الصديق ...مرض علي
قدر ما تهتم بيو بهتم بيك ..تهمله يا ويلك و سواد ليلك
"السكري"
او داء السكر ..او مرض ارتفاع السكر المسميات متعددة و المضاعفات اكتر

حاناقش اسوأ مرحلة فيه اللهي المضاعفات الخطيرة
واخطرها الغرغرينا و اللي بدورها تؤدي لبتر الاطراف

🩺 بتر الأطراف: خطر ممكن نتفاداه

📌 شنو هو مرض السكر؟

مرض السكر (أو السكري) هو مرض مزمن بيأثر على الطريقة الجَسم بيستخدم بيها السكر (الجلوكوز) في الدم. السكر ده هو مصدر الطاقة الأساسي لخلايا جسمنا، لكن في حالة السكر، يا الجسم ما بيقدر يصنع كمية كافية من الإنسولين، أو بيقاوم تأثيره.

😔 السكر والبتر: شنو العلاقة؟

من أكتر المضاعفات الخطيرة والموجعة لمرض السكر هو بتر الأطراف، خصوصاً الأرجل. السكر لما ما يتظبط، بيأدي إلى:

تلف الأعصاب (المريض ما بحس بالرجل لو فيها جُرح)

ضعف الدورة الدموية (الدم ما بيوصل كويس للأطراف)

بطء التئام الجروح

التهابات متكررة

كل دي عوامل ممكن تسبب تقرحات مزمنة، ولو ما اتعالجت، ممكن تؤدي لـ غرغرينا، وبعد داك الحل بيكون البتر.

📊 أرقام مُخيفة!

حسب الاتحاد الدولي للسكري (IDF)
، في العالم أكتر من 537 مليون شخص عندهم سكر (2021).

في السودان، حسب إحصائيات وزارة الصحة السودانية ومنظمة
الصحة العالمية (WHO)
، حوالي 13% من البالغين عندهم سكر، والنسبة دي في زيادة مستمرة.

كل 20 ثانية في العالم، بيحصل بتر رجل بسبب السكر.

دراسات بتقول إن 70% من عمليات بتر الأرجل في السودان سببها مضاعفات السكر.

🛑 الحاصل ده ممكن نتجنبه!

الخبر الكويس إنو بتر الأطراف ده ما قدر محتوم، وفي خطوات بسيطة ممكن تحمينا منه:

✅ أولاً: تابع مستوى السكر باستمرار

راقب السكر، وتابع مع طبيبك، خصوصاً لو عندك تاريخ عائلي للمرض.

✅ ثانياً: راعِي رجليك كل يوم

افحصها يومياً، حتى لو ما حاسس بيها.

اغسلها بمويه دافئة ونشّفها كويس، خصوصاً بين الأصابع.

ألبس جزمة مريحة ومحكمة.

ما تمشي حافي، حتى داخل البيت.

✅ ثالثاً: امش للطبيب لو شُفت أي جُرح ما بيشفى

أو لو رجلك بقت فيها احمرار، تورم، أو ريحة غريبة.

✅ رابعاً: التزامك بالأكل والعلاج

التغذية الصحية وممارسة الرياضة اليومية (حتى ولو مشي نص ساعة) مهم جداً.

🎯

، السكر مرض ممكن نعيش معاه بسلام، لكن لازم نكون واعين.
ما تنتظر رجلك تتقرح ولا الجرح يتعفن...
العلاج المبكر والوقاية أرخص بكتير من غرفة العمليات!

🙌 دعم المجتمع مهم

الوعي بمرض السكر ما بس مسؤولية المريض، بل كمان مسؤولية المجتمع كلو.
يعني:

لو عندك قريب مريض سكر، ساعدو في المتابعة الطبية.

لو إنت مدرس أو إمام مسجد، أنشر التوعية في البيئة المحيطة بيك.

لو بتشتغل في الرعاية الصحية، راعي التثقيف الدوري للمرضى خصوصاً في المناطق الريفية أو الأقل وعياً.

🍲 أكلنا ممكن يكون دواء
لازم نتبع النظام الصحي في اكلنا و نبطل السفسفة و الحلويات الكتيرة انت زول دمك سكر و زي العسل ما محتاج تاكل سكريات كتير😂😂😂

❌ أشياء لازم ننتبه ليها:

(المشروبات الغازية)
النشويات ..البطاطس و الكسرة و العصيدة و الحاجات دي
اي النفس امارة بالسوء بس لازم تكون متابع مستويات السكر عندك كويس و جرعات العلاج تكون موزونة علي احتياج جسمك

الدهون الحيوانية بكميات كبيرة

🧠 الوعي = وقاية

مرات كتيرة، مريض السكر بيكون ما عارف إنو في خطر، أو مستهون بالجروح الصغيرة. لازم يعرف إنو:

> الجرح الصغير ممكن يودي للمشرحة... لكن الجرح الكبير لو اتعالج بدري ممكن يتشافى.

🧾 الخلاصة :

السكر مرض مزمن نعم، لكن ممكن نتعايش معاه بسلام
ممكن نتفاداه
بالوعي والفحص اليومي■
دور المجتمع دعم المرضى بالتوعية والرعاية■
الأكل الاعتدال والتقليل من السكريات والدهون■
المتابعة ضرورية جداً حتى لو ما في أعراض

-- ، السكر ما عيب، وما نهاية.
لكن الإهمال هو الخطر الحقيقي.
خلي عندك وعي، وفحصك اليوم بيوفر عليك عملية بتر بكرة.
---
Diabetes is more serious than many people think.

It doesn’t just affect your Glucose level
It can damage your eyes, kidneys, heart, nerves, and more.
Please, don’t ignore it. Check your blood sugar regularly and take care of yourself.

📝 المصادر ::

International Diabetes Federation (IDF) – www.idf.org

منظمة الصحة العالمية (WHO) – www.who.int

تقارير وزارة الصحة السودانية – 2023


Sudan Journal of Medical Sciences, Vol. 16, Issue 2 (2021)

World Health Organization – Noncommunicable Diseases Country Profile: Sudan 2022

Sudan Ministry of Health – Annual Report on Diabetes and NCDs (2023)

24/07/2025

"في مثل بقول ام جركم ما بتاكل خريفين "
الا الكوليرا دي من ما يجي الخريف بتبدا تاكل ثااابتة بقت ودا لاسباب كتيرة وبرغم انه الوقاية منها بسيطة و علاجها ابسط الا انها بتحصد ارواح كتيرة
📢 **ياجماعة، الكوليرا ما هزار! خلونا نفهمها ونحمي نفسنا!** 🦠
مع فصل الخريف لازم نتكلم شوية اكتر الامراض المصاحبة للفصل الصعب دا
الكوليرا مرض معدي بتسببو جرثومة *Vibrio cholerae*، بتجي من الموية أو الاكل الملوث.
لو ما اتعالج بسرعة، بتسبب إسهال شديد وجفاف ممكن يؤدي لفشل كامل في الاعضاء و للموت في ساعات! 😷

# # # **معلومات عن الكوليرا**
- **السبب:**
الجرثومة *Vibrio cholerae*
بتفرز سموم (toxins)
بتخلي الأمعاء تطلع كميات كبيرة من
الموية، وده السبب في الإسهال الشديد.
- **طرق العدوى:**
- الموية الملوثة (زي موية الترع أو الآبار الغير معقمة).
- الاكل الملوث (خضروات غير مغسولة أو أكل مكشوف).
- عدم الاهتمام بالنظافة الشخصية (عدم غسل الإيدين).
- **الأعراض:**
- إسهال مائي شديد (يشبه موية الأرز).
- قيء مستمر.
- جفاف (جحوظ العيون، الجلد ينشف، تعب شديد ووهان عام).
- تشنجات عضلية.
- **العلاج:**
- **محلول التروية الفموي (ORS):** خليط موية وملح وسكر بيعوض السوائل.
- **سوائل وريدية:** للحالات الشديدة.
- **مضادات حيوية:** زي الدوكسيسيكلين أو الأزيثرومايسين
بتقلل مدة المرض.
-تصحيح المعادن والصوديوم و البوتاسيوم في بعض الحالات الحرجة بعد التحاليل المعملية
- **الوقاية:**
- شرب موية نضيفة (مغلية و معقمة بالكلور).
- غسل الإيدين بالصابون قبل الأكل وبعد الحمام.
- طبخ الأكل كويس وغسل الخضروات .
- تجنب الأكل الملوث و المكشوف.
- تطعيم الكوليرا في المناطق عالية الخطورة و المستوطن فيها العدوى .

# # # **إحصائيات**
حسب منظمة الصحة العالمية (WHO)، الكوليرا بتصيب من 1.3 إلى 4 مليون شخص سنويًا، وبسببها بيموتو حوالي 21,000 إلى 143,000 شخص، خاصة في المناطق اللي مافيها موية نضيفة أو صرف صحي.
بشكل عام:
💧 ما تشرب موية إلا لو نضيفة 100% (مغلية أو معقمة).
🍴 اغسل الخضروات كويس واطبخ الأكل عديل، وتجنب الأكل المكشوف.
🧼 إيديك بالصابون دايمًا قبل الأكل وبعد الحمام.
🏃‍♂️ لو حسيت بإسهال شديد أو قيء؟ أجري لأقرب مركز صحي فوري! الكوليرا ما بتلعب!

# # # **المصادر **
1. منظمة الصحة العالمية (WHO):
[https://www.who.int/news-room/fact-sheets/detail/cholera](https://www.who.int/news-room/fact-sheets/detail/cholera)
2. مراكز السيطرة على الأمراض (CDC):
[https://www.cdc.gov/cholera/index.html](https://www.cdc.gov/cholera/index.html)
3. مقال علمي في *The Lancet*:
[https://www.thelancet.com/journals/lancet/article/PIIS0140-6736(17)30559-7/fulltext](https://www.thelancet.com/journals/lancet/article/PIIS0140-6736(17)30559-7/fulltext)

، شارك البوست ده عشان الكل يعرف ويحمي نفسو! 💪
ً

Cholera is an extremely virulent disease. It affects both children and adults and can kill within hours if left untreated. Severe cases need rapid treatment with intravenous fluids and antibiotics.