http://popularsciencebyneu.blogspot.com/

Mohammed Qurashi Abbas, Khalda station Street, Wad Madani (2026)

27/03/2026

كل ما تود معرفته عن فيتامين ب 12
المنشور السادس: دواء السكر ممكن يسرق عافيتك
(تحذير لمستخدمي المنظم)

"حبة المنظم" (الميتفورمين) مهمة للحفاظ على صحة مرضى السكري وأمراض تانية، لكن بالرغم من فوائدها العظيمة في تظبيط السكر وحماية الجسم، إلا إنها بتلعب دور "الحرامي" في الخفاء من غير ما نحس، وبتبدأ تسرق منك مخزون فيتامين B12 حبة حبة.

في مستشفى الأبيض، لما عملوا الدراسة اللي حكينا عنها، اكتشفوا إن ١٨٪ من الناس العندهم نقص حاد في الـ B12 هم أصلاً مرضى سكري، و ٩٤٪ من المرضى ديل كانوا بياخدوا "الميتفورمين" بانتظام.

الحكاية وما فيها إن الدواء ده مع مرور السنين ببدأ يغير في كيمياء الأمعاء، وبعمل زي "الحاجز" البمنع الفيتامين إنه يمر لدمك، وكل ما زادت الجرعة وزادت سنيين استخدام الدواء، كل ما زاد خطر النقص ده.

التوصيات الطبية العالمية الحديثة لسنة ٢٠٢٥، بتقول وبكل وضوح: أي زول بياخد جرعة عالية من المنظم (أكتر من ١٥٠٠ مجم في اليوم) أو بياخدو ليهو أكتر من ٤ أو ٥ سنين، أو بدأ يحس بتنميل في رجلينه، لازم يحلل B12 فوراً وبصورة دورية.

أوعك توقف دواء السكر بتاعك من رأسك، لأنه ضروري جداً لحمايتك، لكن الحل بسيط شديد؛ لو ثبت إنه عندك نقص، الطبيب حيضيف ليك "حقن أو حبوب" B12 بجرعة كافية، وحتحس بفرق كبيير في نشاطك ووجع أعصابك حيخف بإذن الله.

في المنشور الجاي، حنتكلم عن مفاجأة طبية بخصوص "البهاق" وحب الشباب، وكيف ممكن الفيتامين ده يكون هو الحل لمشكلة بتأرق ناس كتار

27/03/2026

كل ما تود معرفته عن فيتامين ب 12
المنشور الخامس: لما الجلد يتكلم.. أسرار لونك وأظافرك

جلدنا ممكن "يفضح المستور" ويحكي لينا الحاصل جوة جسمنا من غير ما نتكلم، وممكن يكون هو المنقذ اللي يخلينا نكتشف نقص الـ B12 قبل ما الأمور تتأزم

أخطر وأهم علامة بنشوفها في أصحاب البشرة السمراء والداكنة زينا كدة، هي اسمرار غريب ومفاجئ بظهر في مناطق معينة؛ تلاقي ظهر اليدين وعُقد الأصابع (المفاصل) لونها بقى غامق شديد، أو تظهر بقع داكنة في ثنيات الجسم وحول الفم، الاسمرار ده "خداع" جداً، لدرجة إنه حتى بعض الأطباء ممكن يغلطوا ويفتكروه مرض "أديسون" اللي بيصيب الغدة الكظرية، لكن في الحقيقة بكون الجسم بس محتاج "جرعة عافية" من فيتامين B12.

وفي دراسة هندية مشهورة، في ٩ مرضى مشوا للدكاترة عشان "جلدهم اسودّ" بس، وما عندهم أي شكوى تانية، ولما فحصوا ليهم لقوا إنه الـ B12 هو السبب الوحيد، والمفاجأة الأكبر إن فحص الدم بتاعهم كان سليم تماماً، يعني "الجلد سبق الدم" ونبههم للمشكلة قبل ما تحصل أنيميا!

نقص الفيتامين ده بخلي الإنزيم المسؤول عن صناعة الصبغة في جسمك يشتغل "زي المجنون" وبصورة غير منتظمة، فببدأ يفرز صبغة زيادة في الحتات دي، والموضوع ما بقيف في الجلد بس، حتى أظافرك ممكن تحكي القصة؛ بتظهر فيها خطوط طولية داكنة، وممكن تلاحظ شيب مبكر في شعرك، أو تساقط غير مبرر، وحتى تشققات في زوايا الفم اللي ممكن توجعك مع الأكل والكلام.

البشرى السمحة والخبر البيفرح، إن كل التغيرات دي "مؤقتة" وبتروح تماماً بمجرد ما تبدأ العلاج الصحيح، الاسمرار بتراجع بنسبة ٨٠٪ في أول ٤ أسابيع بس من أخذ الفيتامين، والأظافر بتبدأ تطلع نظيفة وسمحة تاني خلال شهرين لثلاثة شهور، يعني جلدك ده مراية حقيقية، لو شفت فيهو أي تغير في اللون خاصة في "عُقل أصابعك"، ما تتجاهله وتقول ده أثر شمس أو تعب، لأنه ممكن يكون نداء استغاثة من أعصابك ودمك

وطبعا لازم ننبه أنو في الطب ما في تفسير واحد للأعراض، فما أي إسمرار أو تشقق زوايا فم هو بالضرورة نقص فيتامين، الفكرة كلها انو ده سبب محتمل يجب استبعاده، فما تتوهموا بأنو ناقص، لأن الاعراض دي ما مقصورة عليه هو بس، بل شائعة لأسباب حميدة كتيرة زي الجفاف والاحتكاك مثلا

المرة الجاية، حنوجه رسالة عاجلة ومهمة جداً لأهلنا المصابين بالسكري، وحنعرف ليه "حبة المنظم" الممكن تكون بتنقذ حياتك، هي نفسها الممكن تكون بتسرق منك فيتامين الـ B12 من غير ما تحس

27/03/2026

كل ما تود معرفته عن فيتامين ب 12
المنشور الرابع: الأعصاب والدم في خطر
(العلامات الما بننتبه ليها)

دايرين نتكلم عن الأعراض البتجينا مع النقص وإحنا بنفتكرها تعب عادي أو إرهاق من الجري ورا المعايش، الخطورة الحقيقية في نقص فيتامين B12 إنه بيبدأ ينهش في جسمك ويدمر في أعصابك قبل ما إنت تحس بإنك مريض فعلاً، والوجع ببدأ من جوة لبرة.

أول جبهة بيضربها الفيتامين ده هي "دمك"؛ بيعمل نوع من الأنيميا غريب شوية، بخلي نخاع العظم يطلع كرات دم حمراء "كبيرة وهبيلة"، حجمها ضخم لكنها ضعيفة وما بتقدر تشيل الأكسجين وتوزعه في جسمك، وعشان كدة بتحس إنك دايماً فتران وروحك محروقاك من أقل مجهود.

والمشكلة إنك لو مشيت عملت "فحص الدم العادي" (CBC) المتوفر في أي معمل، كتير من المرات النتيجة بتطلع "طبيعية" أو قريبة للطبيعي، والفحص ده للأسف بيفوّت حالات كتيرة جداً وبخلي الناس تطمئن وهي في خطر، وعشان كدة ما تعتمد عليهو براهو لو حاسس بفتور دائم (حنتكلم عن الأدق بالمنشور الثامن).

لكن الضربة القاضية والخطيرة بجد هي ضربة "الأعصاب"، في دراسة مستشفى الأبيض اللي حكينا عنها بالمنشور الفات، لقوا إن ٨٦٪ من المرضى كانوا بيعانوا من "خدر وتنميل" في رجلينهم، وبحسوا كأنهم ماشين على قطن أو في "نغزات كهرباء" بتضرب في أطرافهم، ولقوا كمان إن ٧٣٪ عندهم "دوخة" مزمنة ما بتفارقهم، وحوالي ٤٤٪ بيعانوا من ضعف عام وانخفاض في ضغط الدم.

الحكاية بتبدأ بتنميل بسيط، ولو أهملناها بتصل لمرحلة صعبة؛ الزول ببدأ يفقد توازنه وهو ماشي، وممكن ينسى حاجات بسيطة، وحتى نفسيته بتتغير وببقى "خلقه ضيق" من غير سبب.

وفي حالات متأخرة، النقص ده بيعمل حاجة بيسموها العلماء "الجنون الضخمي megaloblastic madness "، يعني الزول ممكن تجيهو أوهام أو هلوسة وتغير شديد في المزاج، والناس بفتكروه مريض نفسي أو "مسحور" وهو في الأصل دماغه جاع للفيتامين ومحتاج علاج سريع.

التحذير الذهبي اللي لازم نحفظه صم: تلف الأعصاب لو وصل مراحل معينة ممكن يبقى "دائم" وما بتحسن تاني حتى لو اتعالجت، يعني كل يوم بتتأخر فيهو في كشف النقص ده، كأنك بتسحب من رصيد عافيتك الما بتتعوض.

المرة الجاية حنفتح ملف بمسنا في شكلنا ولوننا، وهو "لما الجلد يتكلم"، وحنشوف كيف لون جلدك وأظافرك ممكن يكشفوا نقص الـ B12 قبل حتى ما يظهر في فحص الدم.

27/03/2026

كل ما تود معرفته عن فيتامين ب 12
المنشور الثالث: وجعنا السوداني.. حكاية مستشفى الأبيض والكسرة

يا أهالينا في كل شبر من أرض السودان، سلام يغشاكم في الظروف الصعبة دي، المرة دي الكلام حار وبمس وجعنا الحي، لأننا دايرين نتكلم عن الوجه الطبي "المخفي" للحرب والنزوح المارين بيهم.

الحرب ما بس دمرت البيوت والكباري، بل دمرت برضو "سلاسل الغذاء" وقطعت وصولنا لأهم مصادر العافية وهي اللحوم والألبان، والنتيجة كانت أرقام بتخوف وصادمة جداً طلعت من قلب مستشفى الأبيض في شمال كردفان بدراسة ما بين سنة ٢٠٢٣ و٢٠٢٥.

لقوا إن ٨٤٪ من المرضى العندهم فقر دم (أنيميا) في المستشفى، السبب الأساسي لمرضهم هو نقص فيتامين B12! والأدهى من كدة إن متوسط مستوى الفيتامين في دمهم كان حوالي ١٥٥ ميكروغرام بس، وده رقم منخفض شديد وبدخلك في خانة الخطر طوالي.

الدراسة دي كشفت إن أمهاتنا وأخواتنا هم الأكثر تضرراً بنسبة ٦٦٪ من الحالات، وكبارنا العزيزين ما بين ٤٥ لـ ٦٩ سنة هم الفئة الأشد عرضة للخطر ده، وحتى في الخرطوم قبل كدة، الدراسات أثبتت إن حوالي ١٨.٦٪ من السكان عندهم نقص "صامت"، يعني الزول بمشي ويجي وهو ما عارف إنه مخازنه فاضية تماماً.

طيب، ليه النقص ده زاد كدة عندنا؟

السبب الأول طبعاً هو انعدام اللحوم والبروتينات الحيوانية بسبب ظروف الحرب والفقر، والسبب التاني واللازم ننتبه ليه هو اعتمادنا الكبير على "الكسرة" المصنوعة من الذرة الخام، لأن الذرة دي فيها مواد كيميائية طبيعية أحياناً "بتكلبش" في المواد الغذائية وتمنع امتصاصها في الأمعاء، لكن البشرى هنا إن "سر المهنة" عند أمهاتنا في طريقة التخمير الطويلة والسمحة للعجين بتقلل من المواد الضارة دي وبتخلي الفوائد تطلع، عشان كدة لازم نتمسك بتقاليدنا الصحيحة في إعداد أكلنا وتخمير الكسرة بمهلة.

الموضوع ما وقف في حدود السودان بس، حتى أهلنا الطلعوا لاجئين لدول بعيدة زي أستراليا مثلاً، لقوا إن ١٦.٥٪ منهم واصلين وعندهم نقص حاد جداً في B12 بسبب المعاناة الطويلة في مناطق النزاع قبل ما يسافروا.

الحقيقة المرة إننا بنواجه أزمة صامتة بتنخر في أعصابنا ودمنا من غير ما نحس، والخطورة إننا ممكن نكون مفتكرين الوجع والتعب من ضغوط الحياة، وهو في الأصل "جوع" كيميائي للفيتامين ده.

في المحطة الجاية، حنتكلم عن "العلامات" الجسم بيحاول ينبهنا بيها، وحنعرف ليه فحص الدم العادي (CBC) ممكن يخدعك ويقول ليك إنت كويس وإنت في الأصل محتاج تدخل سريع

27/03/2026

كل ما تود معرفته عن فيتامين ب 12
المنشور الثاني: رحلة الـ B12 جوة جسمك
(ليه الأكل براهو ما كفاية؟)

رحلة الـ B12 جوة الجسم دي "دراما" حقيقية، وأي غلطة في أي محطة بتدخلك في فتيل النقص، حتى لو كنت بتاكل خروف كامل كل يوم!

القصة بتبدأ من أول لقمة تبلعها؛ الفيتامين ده بيكون "ماسك" قوي في البروتين بتاع اللحم أو اللبن، وعشان يفك من الأكل بيحتاج "نار" قوية، وهي حمض المعدة، لو حمض معدتك ضعيف (بسبب حبوب الحموضة مثلا)، الفيتامين ما حيفك، وحيمر مرور الكرام ويطلع مع الفضلات كأنك ما أكلت حاجة.

لكن المرحلة الأهم بتبدأ في المحطة التانية، المعدة بتفرز بروتين خاص و"شاطر" جداً اسمه "العامل الداخلي" (Intrinsic Factor)، وده وظيفته يمسك الـ B12 من إيده زي العريس ويوصله لحدي الأمعاء الدقيقة عشان يفتح ليهو الأبواب وتتم عملية الامصاص للدم، ومن غيرو، الباب ما حيفتح ليهو نهائي!

وهنا بتجي الصدمة الما بيعرفها كتير من الناس؛ معظم حالات نقص B12 البنشوفها في العيادات ما سببها "قلة الأكل"، لكن سببها إن "المكنة" فيها خراب خفي، في ناس جسمهم بعمل "تمرد" وجهاز المناعة بتاعهم بهاجم خلايا المعدة البيطلع منها "العامل الداخلي" ده، ودي حالة بنسميها "فقر الدم الخبيث"، والاسم ده جا من إنه زمان كان مرض قاتل قبل ما نكتشف الحقن التعويضية.

وفي أهلنا الكبار، حمض المعدة ببدأ يقل طبيعيا مع العمر، فالفيتامين ما بفك من الأكل بسهولة عندهم، وزيد عليهم الناس العملوا عمليات تكميم أو تحويل مسار للسمنة، ديل "المحطة" حقتهم زاتها اتغيرت، فبقى الامتصاص عندهم ضعيف جداً.

وما ننسى كمان "الضيوف غير المعزومين" زي الديدان المعوية، ودي في بلدنا موجودة وبكثرة، الديدان دي بتقعد تنافسك في أكلك ونصيبك من الفيتامين قبل ما يصل لدمك. فالخلاصة هنا إنك ممكن تكون شبعان في بطنك لكن خلاياك "جعانة" للفيتامين ده لأنها ما قدرت تستلمه.

المرة الجاية حنمشي لواقعنا الحار في السودان، وحنحكي ليكم عن أرقام خيالية وصادمة طلعت من دراسات في "مستشفى الأبيض"، وحنعرف ليه "الكسرة" والظروف الحالية ليهم دور في الحكاية دي

27/03/2026

كل ما تود معرفته عن فيتامين ب 12
المنشور الأول: الفيتامين الما بنقدر ننساه (البداية والفهرس)

الليلة دايرين نمسك طرف الخيط في حكاية صحية مؤثرة في صحتنا شديد، وهي قصة فيتامين B12، الفيتامين "الما بنقدر ننساه" ولا بنقدر نستغنى عنه، لأنه الفيتامين الوحيد الما بقدر يصنعه لا نبات ولا حيوان، ومصدره الوحيد في الطبيعة هو بكتيريا دقيقة ساكنة في التراب وفي أحشاء المواشي، وعشان كدة هو يعتبر أضخم وأعقد فيتامين عرفته البشرية، وفي نصه "قلب" من معدن نادر اسمه الكوبالت، وده السر الخلى العلماء يسموه "كوبالامين".

الفيتامين ده هو المايسترو الشغال في تلاتة جبهات مصيرية في جسمك؛ فهو المسؤول الأول عن صحة أعصابك وتغليفها عشان ما تحس بكهرباء أو تنميل، وهو المكنة الأساسية في نخاع العظم البطلع كريات الدم الحمراء عشان تحميك من الفقر الدموي، وفوق ده كله هو المشرف على بناء الـ DNA أو الشفرة الوراثية لكل خلية في جسمك، يعني باختصار هو حارس "بنيانك" من التلف.

المشكلة الكبيرة إننا بنعتمد عليه كلياً من برة، ومصادره محصورة بس في اللحوم، الكبدة، الألبان، والبيض، أو نضطر ناخده كمكملات صناعية لو المصادر دي نقصت.

الجسم بيحتاج منه كمية بسيطة جداً يومياً، حوالي 2.4 ميكروغرام للزول البالغ، وبتزيد شوية للحوامل وأكتر عند الرضاعة عشان يضمنوا نمو عصبي سليم لأطفالهم، ورغم إننا محتاجين "هبشة" منه بس، إلا إن غيابه بعمل دربكة كبيرة في الصحة.

وعشان نكون متابعين مع بعض الحكاية من أولها لآخرها، السلسلة دي حتكون مرتبة ومنظمة عشان نغطي كل جوانب الموضوع ده، وحنمشي فيها "خطوة بخطوة" في المواضيع الجاية دي:

المنشور الثاني: رحلة الـ B12 جوة جسمك (ليه الأكل وحده ما كفاية؟)
https://www.facebook.com/share/1DUeKyTbmZ/

المنشور الثالث: وجعنا السوداني.. حكاية مستشفى الأبيض والكسرة
https://www.facebook.com/share/p/18BqFxjqTA/

المنشور الرابع: الأعصاب والدم في خطر (العلامات الما بننتبه ليها)
https://www.facebook.com/share/p/1CKpK8fG4E/

المنشور الخامس: لما الجلد يتكلم.. أسرار لونك وأظافرك

المنشور السادس: دواء السكر بيسرق عافيتك (تحذير لمستخدمي المنظم)

المنشور السابع: حكاية البهاق وحب الشباب (المفاجأة غير المتوقعة)

المنشور الثامن: نفحص كيف ونعالج وين؟ (الدليل العملي الكامل)

23/03/2026

فهرس متجدد

السلاسل والمواضيع المهمة بتضيع مع الأيام في زحمة الفيسبوك، هنا حأضع روابط ليها وأجددها بإستمرار بإذن الله 🙏

نبدأ بي ديل ..

كل ما تحتاج لمعرفته عن ترطيب البشرة
https://www.facebook.com/share/18HhVt7Jh5/

نقص فيتامين د في السودان
https://www.facebook.com/share/p/1EYNCoFyDk/

كيف نعوض فيتامين د بأمان
https://www.facebook.com/share/p/16kTdbmfN4/

جلدك مراية أكلك؛ حول الفيتامينات والجلد
https://www.facebook.com/share/p/1DYcXVCgxb/

البهاق Vitiligo اضطراب مناعي يرى على الجلد ولا يقتصر عليه
https://www.facebook.com/share/p/1FD6Cb1eFA/

سلسلة الندبات
https://www.facebook.com/share/p/1E3p3Nh7bd/

حمض الأزيليك (السكينورين) كل ما تود معرفته
https://www.facebook.com/share/p/1H19i1jQ1s/

سلسلة الآيسوتريتينوين
https://www.facebook.com/share/p/18QTswT9gc/

سلسلة الخراجات المتكرره
https://www.facebook.com/share/p/1DetJYCegi/

المناعة الذاتية قدر محتوم أم من صنع أيدينا؟
https://www.facebook.com/share/p/1BzLQERzoM/

الميلانوفري نرجو الانتباه
https://www.facebook.com/share/p/1E4oGvwmCc/

الاكرتين والماربلين وما شابههما ليسوا مقشرات
https://www.facebook.com/share/p/1DaVRdAdwZ/

البانديرم والكيناكومب وأشباههما احذر
https://www.facebook.com/share/p/1bYpAXjcFj/

سلسلة اللشمانيا
https://www.facebook.com/share/p/1DQG9AY8mV/

كل ما تود معرفته عن تعويض الحديد
https://www.facebook.com/share/p/1EsJ1iyyd5/

23/03/2026

كل ما تحتاج لمعرفته عن تشقق الكعبين (٢ من ٢)
روتين "السمكرة" والعلاج الأمثل 🛠️

لو الشقوق خفيفة لمتوسطة، الركيزة الأساسية هي "الترطيب الذكي"، وهنا النجم الأول هو كريمات اليوريا (Urea). استخدام كريمات فيها مادة اليوريا بتركيز عالي (أكثر من ١٠٪ لـ ٤٠٪) بيعتبر الحل السحري، لأن اليوريا بالتركيز ده بتشتغل شغلين: بترطب، وفي نفس الوقت بتذوب الروابط بين خلايا الجلد الميتة وتكسر القشرة القاسية.

الروتين الذهبي للعلاج (السمكرة اليومية):

• ١. الغسيل: اغسل القدمين بماء فاتر (ما حار) وجففهم بالراحة بطريقة "الطبطبة".
• ٢. الترطيب العميق: ادهن كريم اليوريا الصباح، وبعد الحمام بالمساء والكعب لسه "مندي" شوية عشان الامتصاص يكون في أعلى مراحله.
• ٣. القفلة (العزل الليلي): قبل ما تنوم، خت فوق المرطب طبقة تقيلة من الفازلين (Petrolatum)، لأنه بيشتغل كغطاء فوق الجلد ويمنع تبخر الموية بنسبة ٩٩٪. البس شراب قطن ونوم بيهو عشان تزيد الامتصاص وتصحى تلقى الجلد طري.
• ٤. التقشير اللطيف: مرتين لـ ٣ مرات في الأسبوع بس، ممكن تستخدم حجر خفاف (Pumice stone) بالراحة عشان تشيل الجلد الميت بعد ما يلين، لكن إياك تستخدمه لو الشقوق عميقة، بتنزف، أو بتوجع.

🚨 تحذيرات طبية مهمة جداً:
• الموس ممنوعة: أوعك تحاول تقطع الجلد السميك بـ "موس" أو شفرة في البيت، خلي الشغلانة دي للمختصين (Podiatrist) لو استدعى الأمر.
• غلطة الشاطر لمرضى السكري: الترطيب للكعب ممتاز ومطلوب، لكن إياكم تختوا أي مرطب بين الأصابع! الرطوبة المكتومة هناك بتعمل بيئة ممتازة لنمو الفطريات المزعجة.
• متين تمشي للدكتور؟ لو التشقق ما خفا خلال أسبوعين من الروتين ده، أو حسيت بألم زايد، احمرار منتشر، سخانة، أو إفرازات، لازم تراجع طبيبك فوراً لأن دي ممكن تكون علامات التهاب بكتيري ثانوي.

حاولوا تلبسوا جزم مقفولة وداعمة للكعب، وادوا كراعيكم شوية اهتمام وحنية في الترطيب!

23/03/2026

كل ما تحتاج لمعرفته عن تشقق الكعبين (١ من ٢)
القصة الهندسية وراء شقوق الكعب 🦶

تشقق الكعبين مشكلة تجميلية بتشوه شكل الكراع وتخلينا نخجل من لبس الشباشب، وبتنتج عن "تفاعل ميكانيكي" بحت بين الجلد والضغط، وعشان نبسط البحصل ونفهم الحاصل، تخيل معاي إن كعبك ده تحته "مخدة دهنية" (Fat pad) بتمتص الصدمات وتتحمل وزنك كلو.

لما تقيف وتمشي، المخدة دي بتفرش وتتمدد بالجنبات، لو الجلد المغطيها من بره مرن وطري ومرطب، حيتمدد معاها عادي جداً، لكن لو الجلد جاف وفاقد للمرونة، فبتتراكم فوقه طبقة من الخلايا الميتة والقاسية (Callus)، وكده طوالي مع الضغط المستمر الجلد ده "بيطرشق" ويبدأ يعمل شقوق سطحية، وممكن تقلب لشقوق عميقة (Fissures) بتوجع وتنزف، وتبقى مدخل للالتهابات لو أهملناها.

عشان كدا، أسباب المشكلة دي بنقسمها لـ "خانتين" كبار:

١. الأسباب البيئية والسلوكية (ودي الغالبية العظمى فينا):

• الجفاف والضغط: جفاف الجلد البسيط مع الوقفة الطويلة (بالذات في السيراميك والأسطح الصلبة).
• زيادة الوزن: لأنها بتزيد الحمل والضغط الميكانيكي على المخدة الدهنية.
• الأحذية المفتوحة: اللبس المستمر للـ "شباشب" والأحذية المفتوحة من ورا، لأنها ما بتدعم حافة الكعب وبتخليه يفرش بزيادة.
• تدمير الحاجز الجلدي: الحمام المتكرر بموية حارة شديد واستخدام صابون قوي بيغسل دهون الجلد الطبيعية ويخليه عرضة للتشقق.

٢. الأسباب المرضية والجينية: هنا التشقق بيكون "جرس إنذار" لمرض تاني أعمق:

• زي الأكزيما التأتبية، الصدفية، أو حتى كسل الغدة الدرقية اللي بيعمل جفاف شديد.
• تنبيه خاص لمرضى السكري: لازم ينتبهوا شديد، لأن الجفاف مع ضعف الإحساس (الاعتلال العصبي) ومشاكل الدورة الدموية، ممكن يخلي الشق البسيط يقلب بمدخل للعدوى البكتيرية ومشاكل القدم السكرية لا قدر الله.

في البوست الجاي حنعرف كيف "نسمكر" الشقوق دي بشكل علمي، ومتين نستخدم حجر الخفاف، وياتو كريم هو الساحر في الحالة دي!

23/03/2026

في ثقافتنا الصحية السودانية في فكرة منتشرة جداً، مفادها إنو أي اسمرار في الوجه - خصوصاً الكلف، أو السواد البظهر مع العمر حوالين الفم والخدود - سببو “كسل الكبد”.

خلونا نفكك الفكرة دي بهدوء

الكبد عضو مهم جداً، وبدون أي مبالغة هو من أعمدة الجسم، شغلو الأساسي تنظيم التمثيل الغذائي، وتكسير السموم، ومعالجة الهرمونات، وتنظيم السكر والدهون، ولما الكبد يمرض فعلاً، التعبير عنو ما بكون خفي ولا انتقائي.

يعني ما بختار الخدود بس، ولا برسم خطوط حول الفم براهو، أمراض الكبد الحقيقية بتطلع بأعراض واضحة: اصفرار العين، تعب شديد، حكة عامة، تغير لون البول والبراز، وتحاليل مختلة، ووقتها الجلد ممكن يتأثر، لكن التأثير بكون شامل، ما مرسوم ولا محصور في الوجه.

أما الكلف والتصبغات المرتبطة بالعمر، فدي قصة مختلفة تماماً، عشان كدا بنشوف ناس كبدهم سليم تماماً، وتحاليلهم ممتازة، لكن عندهم كلف شديد، وبنشوف العكس: ناس عندهم مشاكل كبدية واضحة، لكن ما عندهم أي تصبغ وجهي، لو كان الكبد هو السبب المباشر، كان المفروض العلاقة تكون ثابتة، لكنها ما كدا.

المشكلة في فكرة “كسل الكبد” إنها مريحة نفسياً. بتدينا سبب واحد بسيط لحاجة معقدة، وبتخلينا نصدق إنو الحل ساهل: شاي أعشاب، حبوب تنظيف، وخلاص، لكن الواقع إنو التصبغات دي مزمنة، بتتحسن وتنتكس، وبتحتاج فهم وصبر، وحماية من الشمس، وتنظيم نمط الحياة، وعلاج جلدي مدروس.

تصحيح المفاهيم الصحية ما بقلل من قيمة الطب الشعبي ولا التجارب الشخصية، لكن بيخلينا نميز بين الاحترام والخرافة، وبين الفهم والعادة، وفي موضوع التصبغات، الفهم هو أول خطوة في العلاج.

23/03/2026

ممارسة الطب في عصر الانفجار المعلوماتي والذكاء الاصطناعي

نطلع بيكم من التثقيف الطبي شوية وأعرفكم على جانب مختلف من ممارستي الطبية مستفيدا من خبراتي التانية بالمشروع ده الأخد مني عدة أيام

انغمست في رحلة البحث الممتعة دي بعد سؤال راودني وأنا بعاين مريضة عايزة تتعالج بالآيسوتريتنوين: شنو هي آخر الأدلة والأبحاث حول محددات الأعراض الجانبية واحتمالات الانتكاسة بعد ما الزول ياخد الدواء ده؟ وهل نظرتنا للموضوع ده اتغيرت؟ وكيف نقدر نحسن من التنبؤ العلاجي والتعامل مع مرحلة العلاج وما بعدها؟

خطوات البحث والتحليل:

أول حاجة، استخدمت خاصية البحث العميق في "جيمناي" للاستقصاء الأولي، لأنها بتسمح لي أطلع على صياغة السؤال البحثي وأعدله حسب الحاجة قبل البحث، عشان أطمن على شموله والمصادر حقته (قواعد البيانات الطبية). النتيجة كانت تقرير شامل وموثق بالمصادر، بينفع كبداية ممتازة لرحلة التعلم دي.

الخطوة التانية بعد قرايته، كانت تحليل المصادر المرفقة مع التقرير (باستخدام الذكاء الاصطناعي) عشان أجمعها حسب المواضيع البتغطيها: الأعراض الجانبية ومحدداتها، إحصائيات الانتكاسة ومحدداتها، الجرعات والفحوصات، وغيره.

الخطوة التالتة كانت استخدام مواقع التفتيش البصري للبحوث الطبية زي (Connected Papers). المواقع دي بتقبل مجموعة من الأوراق البحثية (المصادر الجمعتها في الخطوة الفاتت) وبعدها بتتبع كل الأوراق ذات الصلة حسب فلاتر معينة عشان ترسم لي خريطة تفاعلية بتغطي كل النطاق البحثي حول الموضوع. بعدها قمت بتتبعها وقرايتها وتجميع المعلومات، بالذات البحوث الاستقصائية البتلخص المعارف في المجال والاتفاق العلمي الحالي، مستند في ده على إتقاني لمنهجية الطب المبني على الأدلة والتقييم الإحصائي لجودة البحوث وكيفية قرايتها بصورة شاملة.

بناء النظام المعلوماتي (MCD):

بعد داك، بديت أنفذ خطة تانية عشان أستفيد بصورة منهجية من كل المعلومات دي:

استعنت بـ "شات جي بي تي" (ChatGPT)، وحللت كل المعلومات الاستخلصتها في الخطوات الفاتت، عشان أقسمها لـ:

المعلومات الخاصة بالمريض، واللازمة عشان أقيم أثر الدواء عليه ومدى استفادته منه بصورة كويسة.

المعلومات اللازمة لحسن متابعة الحالات، والبتلعب دور أساسي في التنبؤ بسير العلاج والانتكاسة.

كنت خاتي في بالي إنها تكون ماشة على منهجية المجموعة المعلوماتية الطبية المثلى (Minimal Clinical Dataset - MCD)، عشان تنفع للأتمتة وللأبحاث لقدام.

التطبيق العملي والأتمتة:

وعلى هداها، وبمساعدة من الذكاء الاصطناعي، عملت 3 قوالب معلومات (Forms):

قالب يملاهو المريض لما يطلب الاستشارة.

قالب يملاهو الدكتور في كل زيارة بتاعت متابعة.

قالب بيحتوي على تفاصيل الحالة بدقة والخطة العلاجية المقترحة للمريض.

بالطريقة دي بضمن إنو كل المعلومات المهمة اتسأل عنها واتسجلت من غير أي سهو أو غفلة، وإنو لقدام ممكن تِتحلل بسهولة عشان نطلع منها ببحوث عالية الجودة، تساهم في إثراء معرفتنا البتنمو طوالي في المجال ده.

بعدها حولتها لقوالب Google Forms، بعد ما صاغها لي الذكاء الاصطناعي كملفات CSV عن طريق رفعها (Import) في Google Sheets أول شيء. وبعد داك استخدمت Google App Script عشان أكتب كود برمجي يحولها أوتوماتيكياً لقوالب جاهزة، وبعدها راجعتها وعدلتها عشان تطلع بشكل جمالي لائق ومكتملة من ناحية المعلومات، وسهلة الزول يملاها من غير تعب كتير.

الخلاصة والنموذج التنبؤي:

أخيرًا، عملت نموذج تنبؤي بحلل أوتوماتيكياً معلومات المريض عشان يحسب مدى مناسبتو للعلاج ده، والطريقة الأمثل للجرعات والمدة وطريقة الفحوصات، حسب أحدث الأدلة الطبية. وبكده بضمن إنو تقييمي للمريض يكون مبني على معلومات مكتملة ومستند على كل معارفنا الطبية، ومستغل للتكنولوجيا القوية المتوفرة الليلة البتخدم المعلوماتية الطبية، نحو ممارسة طبية بتدعم الخبرة السريرية البشرية بفلسفات الطب المبني على الأدلة والطب الشخصي (Personalized Medicine).

استمتعت بالرحلة ولسه بستمتع بثمراتها بالمعلومات المنظمة القاعد أجمعها، عسى يتوفر وقت للتحليل وعمل دراسات موسعه حولها، شكرا للقراءة 🙏

23/03/2026

I've just reached 60K followers! Thank you for continuing support. I could never have made it without each and every one of you. 🙏🤗🎉

حأعمل فهرس للسلاسل السابقة بالمناسبة دي 🙏

Mohammed Qurashi Abbas

27/03/2026

27/03/2026

27/03/2026

27/03/2026

27/03/2026

27/03/2026

23/03/2026

23/03/2026

23/03/2026

23/03/2026

23/03/2026

23/03/2026

Address

Website

Alerts

Contact The Practice

Shortcuts

Share

Category