http://popularsciencebyneu.blogspot.com/

Mohammed Qurashi Abbas, Khalda station Street, Wad Medani (2026)

29/01/2026

الاكزيما – تلك الحكة المرهقة
(سلسلة منشورات)
إكزيما التشققات Asteatotic Eczema مرة أخرى

أكثر الناس عرضة هم فوق الستين، وذروة الشكوى بتكون في الشتاء تحديداً، لأن الرطوبة في الجو بتنزل والجلد أصلاً ضعيف، وفي عوامل تانية بتزيد المشكلة من غير ما الناس تربطها:

بعض الأدوية زي المُدرّات (diuretics) بتسحب سوائل من الجسم، ومع الزمن ممكن تخلي الجلد “أكثر عطشاً”، وبعض العلاجات اللي بتقلل تأثير الهرمونات الذكرية (anti-androgens) بتقلل الدهون الجلدية فبتزيد الجفاف.

وبرضو التغذية بتدخل من الباب الخلفي: نقص الزنك أو نقص الأحماض الدهنية الأساسية ممكن يضعف جودة الجلد ويخلّيه أقل قدرة على الترميم، خصوصاً عند كبار السن الأكلهم محدود أو عندهم فقدان شهية.

العلاج هنا قائم على منطق واحد: ما تحاول “تلمّع الجفاف” بمرطب خفيف وتفتكر الموضوع انتهى؛ أنت محتاج تعيد بناء الحاجز، يعني تعوض دهون الحماية المفقودة وتحبس الموية جوة الجلد.

عشان كده المرطبات البتشتغل أفضل عادةً هي المرطبات الغنية بالسيراميدات (ceramides) لأنها بتعيد تركيب جزء من دهون الحاجز، ومعاها مستحضرات فيها يوريا (urea) لأنها بتسحب الموية للجلد وتلين القشور وتقلل التشقق.

الفرق بين النوع ده وبين مرطب بسيط زي الفرق بين زول بيرش موية على طين ناشف، وزول بضيف مونة ويسد الشقوق من جذورها.

وفي نفس الوقت لازم توقف الحاجات البتخرب كل شغلك: تقلل عدد مرات الاستحمام لو كان يومي وبزمن طويل، وتمنع الحمام بالمويه الحارة، وتقطع الصابون القاسي والمعطر، كثير من المرضى لو عملوا الحاجات دي براها الحكة بتقل للنص قبل ما يبدأ أي كريم علاجي، لأنك ببساطة وقفت النزيف المستمر من الحاجز.

ولو في احمرار واضح وحكة شديدة، مرات الترطيب براهو ما كفاية، لأن الجلد دخل مرحلة التهاب، وهنا الطبيب ممكن يضيف كورتيزون موضعي خفيف إلى متوسط لفترة قصيرة بس عشان يهدّي الالتهاب والحكة بسرعة، وبعدين يرجّعك مباشرة لخطة الترطيب والصيانة، لأن المقصود هنا ما علاج طويل بالكورتيزون، بل “كسر دائرة الحك والالتهاب” عشان الجلد يقدر يلتئم.

وفي 2024 ظهرت دراسات بتجرب وسائل علاجية جديدة حتى في النوع ده، من ضمنها تقييم كريمات بمركبات مضادة للالتهاب غير ستيرويدية زي roflumilast cream، والفكرة العامة منها إننا نلقى طريقة تهدّي الالتهاب والحكة بدون دفع ثمن ترقق الجلد عند كبار السن، لكن الأساس حيظل دائماً: إذا ما رجعت للدهون والسيراميدات واليوريا، وإذا ما عدّلت الحمام والصابون، حتفضل ترجع لنفس النقطة مع أول موجة جفاف جديدة.

29/01/2026

الاكزيما – تلك الحكة المرهقة
(سلسلة منشورات)
إكزيما التشققات Asteatotic Eczema

مع تقدم العمر، الجلد بكون سجلّ عمر كامل، الغدد الدهنية بتهدأ، ووصناعة الدهون الواقية بتقل، والسيراميدات (الدهون البتبني حاجز الجلد) تقل مع الزمن، فيبقى الجلد كأنه فقد الطبقة العازلة البتخليه يمسك مويته ويحتمل الجو.

فمع أول شتاء جاف، أو حمام ساخن طويل، أو صابون قوي، تحصل الحكاية البتجي منها شكوى كبار السن المشهورة: “حكة الشتاء”، النوع ده اسمو إكزيما التشققات Asteatotic Eczema أو Eczema Craquelé، وده فعلاً من أكثر أنواع الأكزيما شيوعاً في الكبار، وغالباً تلاقيه حول عمر أواخر الستينات وما فوق.

الصورة السريرية بتكون واضحة، أكثر مكان بتظهر فيه هو قصبة الساق من قدام ، لأن الجلد هناك أصلاً أقل دهنية وأقل حماية، ففجأة تلاحظ جلد ناشف شديد، وبعدين يبدأ يتشقق بخطوط حمراء دقيقة تفصل بين “ألواح” قشرة جافة، فيطلع المنظر كأنه خزف متشقق، أو أرض ناشفة اتشققت من العطش.

الناس مرات بتفتكرها عدوى أو حساسية من شيء جديد، لكنها في الحقيقة غالباً هي معادلة بسيطة: جلد مسنّ + جفاف بيئي + منظفات قاسية = حاجز منهار. والحكة هنا مرات بتكون حادة لدرجة تخلي الزول يحك لحد ما يجرح نفسه، فتدخل البكتيريا وتزيد المشكلة، وتتحول من جفاف موسمي بسيط إلى التهاب مزمن.

الخبر المريح إن النوع ده من الأكزيما غالباً بيستجيب استجابة ممتازة جداً لو فهمت منطقه: ما محتاج “تبحث عن سبب غامض”، محتاج بس تعوض الناقص: ترطيب قوي، وتعويض دهني (lipid replacement) بمرطبات تقيلة، وتقلل الصابون القاسي والمويه الحارة، والالتزام بفكرة إن الجلد بعد الحمام لازم يتقفل عليه المرطب بسرعة قبل ما المويه تتبخر، لما تعمل كده، الشقوق تهدأ، والحكة تنزل، والجلد يرجع يلين.

بس للأسف هي من النوع البرجع مع المواسم، يعني ممكن تتحسن تماماً، وبعدين في أول شتاء جاف ترجع نفس الحكة ونفس التشققات، ده إذا رجعت لنفس عادات الاستحمام أو أهملت الترطيب.

عشان كده التوقعات هنا ما “علاج مرة واحدة”، بل “صيانة مدى الحياة” خصوصاً عند كبار السن: الجلد بقى محتاج رعاية حاجزه زي ما المفاصل محتاجة رعاية، لأن الزمن غيّر خصائصه الأساسية.

والنقطة الأهم للمريض الكبير في السن: لو في حكة شديدة عامة مع جفاف، ما تتعامل معها كأنها حاجة بسيطة دائماً، رغم أنها غالباً مجرد Asteatotic eczema فعلاً، لكن أحياناً الحكة في كبار السن تكون إشعار لحاجات أخرى (أدوية جديدة، أمراض عامة، فشل كلوي أو كبدي، اضطرابات دم… إلخ).

فلو الحكة كانت معممة جداً، أو مصحوبة بنقص وزن أو تعب أو تغيّر عام، أو ما استجابت للترطيب الجيد خلال فترة معقولة، الأفضل تقييم طبي أشمل. لكن في أغلب الحالات، “حكة الشتاء” هي ببساطة جلد عطشان وعايز دهون الحماية الاتسحبت منه مع العمر والجو.

واتس اب الحجز تحت صورة المنشور

29/01/2026

الاكزيما – تلك الحكة المرهقة
(سلسلة منشورات)
الاكزيما الدائرية – فلسفة العلاج والوقاية

الخطة الأساسية بتقوم على حاجتين ما بينفصلن: نرطّب الجلد بجدية كأننا بنرجّع ليه حياته من جديد، وفي نفس الوقت نكسر الالتهاب بعلاج موضعي قوي قادر يدخل جوة السُمك والخشونة ويطفّي النار.

أول هدف عملي هو “إعادة الشحن بالمويه” للطبقة السطحية؛ وهنا بتجي فائدة تقنية بلل واقفل “Soak and Smear”: بموية فاترة، وبعدها مباشرة (قبل ما المويه تتبخر) تقفلها بمرطب تقيل/دهني أو كريم علاجي موضعي حسب خطة الطبيب، كأنك بتقفل الخزان قبل ما يتسرّب.

الهدف التاني هو تهدئة الالتهاب القوي ذاته، لأن البقع لما تتخشّن وتبقى مُضلّعة ما بتستجيب غالباً للحاجات الخفيفة، الطبيب هنا عادةً يلجأ لـ كورتيزول موضعي قوي (Potent TCS) لفترة محسوبة عشان يقدر يخترق السُمك ويكسر الحلقة الالتهابية، وبعد ما يهدأ الاشتعال يبدأ الانتقال لخطة صيانة وترطيب منتظم عشان ما ترجع البقعة من نفس باب الجفاف.

والهدف التالت—الناس كتار بتنساه—هو تفكيك “اللويحات السميكة” نفسها. لأنو بيخلي الحكّة ترجّع الالتهاب كل يوم، بنستعمل ترطيب مقشر زي اليوريا، مع العلاج المضاد للالتهاب المناسب، عشان نرجع الجلد من “جلد مدرّع” إلى جلد طبيعي.

ولو الحالة عنيدة، أو بتتكرر رغم الالتزام، أو داخله ضمن طيف التأتّب (يعني عندك خلفية حساسية/ربو/أنف تحسّسي أو إكزيما مزمنة عامة)، هنا بدأ يظهر في السنوات الأخيرة باب علاجات أحدث. زي العلاجات البيولوجية مثل الـ Dupilumab ، وفيه حتى دراسات مُسجّلة خصيصاً لنوع الاكزيما دي.

وبرضو عائلة JAK Inhibitors دخلت المشهد كفكرة للحالات العنيدة في الإكزيما عموماً، في المجال ده تحديداً، في تقارير عن استخدام Topical JAK (زي delgocitinib موضعياً) ضمن سياقات عنيدة (أحياناً مع علاج ضوئي)، كإشارة إن المسار الالتهابي ممكن يتكبح بطرق غير ستيرويدي

أما بالنسبة لعائلة Oral JAK Inhibitors زي Upadacitinib وAbrocitinib فهي معروفة في علاج الإكزيما التأتبية المتوسطة-الشديدة، وبالتالي أحياناً تكون ضمن خيارات “السُلّم العالي” لما النمط الدائري يكون جزء من مرض إكزيما أوسع وتحت إشراف مختص.

وفي تطور لافت جداً في يناير 2026، شركة ألميرال أعلنت عن دراسة Phase III اسمها “LumiNE” لاختبار دواء Lebrikizumab خصيصاً لعلاج الأكزيما الدائرية، وده بيدينا إشارة قوية إن الطب بدأ يتعامل مع النمط ده ككيان محتاج حلول مخصوصة ليهو، مش مجرد علاجات الاكزيما المعروفة.

ذكر أسماء العلاجات الحديثة هنا هدفه توعية المريض بوجود خيارات حديثة، لكن اختيارها وترتيبها قرار طبي، لأن نفس “العملة” في الجلد ممكن تكون إكزيما دائرية حقيقية، أو جزء من تأتّب، أو حتى شيء تاني محتاج تشخيص دقيق قبل أي تصعيد علاجي.

أخيرا عشان نقلل الانتكاسات، في فكرة ذكية اسمها العلاج المتقطع“Weekend Therapy”: بعد ما تختفي البقع، ما بتقفل الملف تماماً، بل بتستخدم العلاج الموضعي المضاد للالتهاب بصورة متقطعة في الأماكن البتولّع عادةً، مثلاً يومين في الأسبوع، مع ترطيب يومي منتظم. الهدف إنك تطفّي الالتهاب الخفي وتمنع رجوع البقعة وهي لسه بتتكوّن تحت السطح، وده عملياً بقلل فرص الانتكاس بدرجة واضحة عند كثير من المرضى.

واتس اب الحجز تحت صورة المنشور

29/01/2026

الاكزيما – تلك الحكة المرهقة
(سلسلة منشورات)
الاكزيما الدائرية – تتعرف كيف وبتصل لوين

بتبدأ غالباً بحاجات صغيرة ما بتلفت النظر: حبوب دقيقة أو نتوءات بسيطة، وبعد كم يوم تلاقيها اتلمّت على بعض وبقت رقعة مدوّرة واضحة، زي عملة على الجلد

عادةً قطرها من سنتيمتر لحدي خمسة، بتظهر أكتر في اليدين والرجلين والجذع، وبتكون فيها حكة بصورة مزعجة تخليك تحس إن الجلد “مستفز” ومطالبك تحكو بشدة.

في المرحلة الحادة، شكلها بكون أحمر قاتم شوية أو بني حسب لون الجلد ومبلول، يعني ممكن تلاقي فيها رشح بسيط زي “موية” من الجلد، ومعاه قشور وأغشية كأنها طبقة ناشفة فوق البلل، الناس هنا بتخاف لأنها بتشبه الالتهابات، لكن ده جزء من طبيعة الأكزيما لما تكون مولعة.

وبعد فترة، لو ما اتسيطر عليها كويس أو لو الخدش استمر، البقعة بتدخل المرحلة المزمنة: تنشف، تقشر، وتتخن، وببقى الجلد فيها خشن ومُضلّع كأنه اتجلّد من كثرة الحك، وأحياناً تشوف اسمرار بسيط من الالتهاب القديم.

أهم علامة تفرقها عن الأكزيما التأتبية إن الجلد بين البقع غالباً طبيعي تماماً، يعني ما عندك احمرار منتشر في كل المنطقة ولا جفاف شامل في كل الساق مثلاً، بل بقع دائرية منفصلة وبينها جلد عادي.

وبرضو من أكثر الحاجات البتتلخبط مع الأكزيما الدائرية هي الفطريات الحلقية (Tinea corporis). الاتنين مدورين والاتنين بحكّوا، لكن في الفطريات غالباً بتلقى الحواف هي الأشد نشاطاً: حافة مرتفعة شوية ومقشرة، ومع الزمن الوسط يخف ويصبح أفتح، فتظهر فكرة “حلقة” وفيها تفريغ مركزي واضح.

أما الأكزيما الدائرية فغالباً ما عندها التفريغ المركزي الكلاسيكي للفطريات، وما عندها حافة نشطة مرتفعة بنفس طريقة الفطريات؛ هي بقعة متجانسة نسبياً، كلها ملتهبة ومزعجة. ولما يكون في شك، الفحص البسيط بمحلول KOH على كشط من الحافة بفرق بينهم.

من ناحية التوقعات، بتستجيب كويس إذا اتعالجت صاح من البداية، لكن المشكلة الحقيقية فيها هي “الرجوع”؛ لأن الجلد لو رجع لنفس حالة الجفاف والإجهاد، البقع بتلقى فرصة ترجع في نفس الأماكن أو أماكن جديدة.

عشان كده الناس البتتحسن وبعدين توقف كل الوقاية فجأة، كثير منهم برجعوا بعد أسابيع أو شهور ويقولوا: “دي رجعت من غير سبب”. السبب غالباً هو إن الجلد رجع ناشف، والحاجز رجع ضعيف، والذاكرة الالتهابية لسه موجودة.

في البوست الجاي والأخير حنتكلم عن أساسيات علاجها

واتس اب الحجز تحت صورة المنشور

29/01/2026

الاكزيما – تلك الحكة المرهقة
(سلسلة منشورات)
الاكزيما الدائرية – الشكل السهل الممتنع

في نوع من الأكزيما بتتعرف عليه لأنك شفت “الشكل المميز”، اسمها الأكزيما الدائرية Nummular (Discoid) Eczema، واسمها جاي من فكرة العملة: بقع مدورة وواضحة الحدود، كأن زول خت ليهو عملة على الجلد ورسم حولها

مرات تكون بقعة واحدة، ومرات كتار في الساقين والذراعين والجذع، بتجي بحكة وتهيج وقشرة، وتخليك في حيرة: “دي فطريات؟ ولا صدفية؟ ولا شنو بالضبط؟” لأنها شكلها بيوحي بحاجات كتيرة.

الغريب إنها ما منتشرة جداً في الأطفال، وعندها نمط عمري كأنها بتجي في موجتين: بنشوفها أكتر في نساء صغار في سن المراهقة المتأخرة وبداية العشرينات، وبرضو بنشوفها في رجال أكبر في الخمسينات والستينات.

السبب غالباً بكون ما واضح، لكنها عندها ارتباط قوي بجفاف الجلد وحساسية الجلد العامة؛ وأي خدش أو صابون قوي أو جو بارد جاف ممكن يفتح الباب لبقعة تبدأ صغيرة وتكبر وتثبت كأنها “لاصقة” في مكانها.

أحياناً الأكزيما الدائرية دي ما بتكون المشكلة الأصلية، بل بتكون “رد فعل ثانوي” لحاجة بعيدة في الجسم، الأطباء بيسموها id reaction أو auto-eczematization، ودي بتفسر ليه مرات تعالج البقع نفسها فتتحسن شوية، لكن ما تستقر إلا لما تلقى وتصلح السبب البعيد، زي فطريات القدم مثلاً أو مشكلة وريدية في الساق.

وبرضو في عامل بثبتها ويخليها مزمنة: البكتيريا، كثير جداً من بقع الأكزيما الدائرية بتكون مستعمرة ببكتيريا ستاف أوريوس Staphylococcus aureus، حتى لو ما في صديد واضح.، وجودها فوق الجلد الملتهب ممكن يطوّل عمر البقعة ويخليها ما ترضى تختفي بسهولة، كأنها بتغذي الالتهاب وتخليه يلف في نفس الدائرة.

إذن ما كل بقعة مدورة في الجلد معناها “فطريات”، أحياناً هي جلد ناشف وحساس دخل في نمط التهابي ثابت، وأحياناً هي إشارة تقول: فتّش في القدمين، في الأوردة، في مصدر التهاب بعيد.

في المنشورات الجاية خلال اليوم حنواصل الحديث عنها وعن علاجاتها

واتس اب الحجز تحت صورة المنشور

28/01/2026

الاكزيما – تلك الحكة المرهقة
(سلسلة منشورات)
الإكزيما الحويصلية – موجهات التداوي والتوقعات

الهدف العلاجي هو إنك تقفل الحلقة كلها من أولها: تنشّف الفقاقيع العميقة، تهدّي الحكة/الحرقان، وتحمي الجلد من إنو يتشقق في مرحلة التقشير، والأهم تمنع العدوى البكتيرية الثانوية

أول ما النوبة تشتعل فالعلاجات الضعيفة بتكون ضياع زمن، عشان كده الأطباء غالباً بيميلوا لاستخدام كورتيزول موضعي Topical Corticosteroids قوي جداً في اليدين والرجلين لمدة قصيرة عشان تخترق الطبقة القرنية وتكسر الالتهاب بسرعة

وفي الأيام البتكون فيها الفقاقيع “طرية ومائية” أو متجمعة، في خطوة ذكية بتريح سريع: الكمادات/النقع المُجفِّف، مواد زي potassium permanganate أو aluminum acetate بتشتغل زي “منشفة كيميائية” تسحب الرطوبة وتقلل الانفجار المائي، فالحبوب تبدأ تهدأ بدل ما تتكاثر.

وبعد ما المرحلة المائية تهدأ، بيجي دور إنك تحافظ على الحاجز: ترطيب تقيل ومنتظم عشان لما الجلد يبدأ يقشّر ما يتحول لتشققات مؤلمة تفتح الباب لالتهاب وعدوى.

ولو النوبات بتتكرر أو الحالة بقت مزمنة في اليدين وبتأثر على الشغل والحياة، هنا بنطلع من مرحلة “الإطفاء” لمرحلة “التحكم طويل المدى”: تاريخياً، دواءAlitretinoin الفموي كان من الخيارات القليلة المخصصة للحالات الشديدة المزمنة من إكزيما اليدين التي ما استجابت للكورتيزونات الموضعية القوية، لكن مشكلته المعروفة إنه teratogenic (يؤثر على الأجنة) فلازم برامج صارمة لمنع الحمل ومتابعة دقيقة.

الجديد المهم إنو ظهر خيار موضعي غير ستيرويدي كبير: Delgocitinib cream، وهو Topical JAK inhibitor (بان-جاك) اتثبتت فعاليته في تجارب المرحلة الثالثة (DELTA 1 وDELTA 2) لمرضى Chronic Hand Eczema، ومع امتصاص جهازي محدود مقارنة بالأدوية الفموية، وظهر كبديل واعد خاصة للناس البخافوا من مخاطر الريتينويدات أو ما بتناسبهم.

وبرضو لازم نذكر حكاية المعادن (النيكل/الكوبالت): في ناس عندهم حساسية مؤكدة، وفعلاً ممكن الأكل الغني بالمعادن دي يساهم في الاشتعال عندهم، فبعض الأطباء بجربوا “تقليل المعادن” بصورة انتقائية. لكن دي خطوة ما عامة لكل الناس، والالتزام فيها صعب، والدليل العلمي ما ثابت لكل الحالات، فالأفضل تكون مبنية على تشخيص حساسية واضح وخطة واقعية ما تخرّب التغذية. (هنا بيجي دور Patch test لو في شك بحساسية تلامسية/نظامية مرتبطة بالمعادن).

أما التوقعات، فالصراحة المريحة إن البومفوليكس غالباً بتمشي في مسار دائري: تهدأ وترجع، وفي ناس ممكن تختفي عندهم لفترات طويلة بدون سبب واضح، وفي ناس بتكون عنيدة وتؤثر على جودة الحياة والقدرة على استعمال اليدين.

المهم في النهاية إن أي خطوة علاجية قوية—سواء كورتيزون فائق القوة، أو نقع مجفف، أو علاج فموي—لازم تكون تحت إشراف طبي، لأن اليدين والقدمين صحيح جلدهم سميك، لكن المرض نفسه سريع التقلب، وأكبر خسارة تحصل لما الزول يعالج بطريقة غير متسقة: يوقف بدري، أو يستخدم الضعيف في وقت يحتاج القوي، أو يخلّي الخدش يفتح الباب للعدوى.

واتس اب الحجز تحت صورة المنشور

28/01/2026

الاكزيما – تلك الحكة المرهقة
(سلسلة منشورات)
الإكزيما الحويصلية – ما فطريات ولا تحسس

في نوع من الأكزيما الناس بتتوه فيه شديد لأن شكله “غريب” ومكانه “محدد” وبيجي فجأة كأنه انفجار صغير تحت الجلد في اليدين والرجلين ، اسمو الأكزيما الحويصلية ، أو التعرقية Dyshidrotic Eczema، واسمها القديم Pompholyx بيعني “فقاعة” بالاغريقي.

ورغم الاسم البلخبط، هي ما مشكلة غدد عرقية “تعطلت”، والعرق ما هو السبب المباشر، لكن الزول البتعرق يدينو شديد، أو بلبس قفازات لفترات طويلة، أو بشتغل في جو حار ورطب، غالباً ما تزيد عندو.

النوع ده جزء مهم من إكزيما اليدين، وممكن يشكّل نسبة معتبرة من الحالات، وبميل لاصابة الشباب في العشرينات والثلاثينات والأربعينات أكثر من الأطفال الصغار وكبار السن، وبنشوفو عند النساء أكثر شوية.

السبب ما واحد ولا بسيط؛ هو خليط عوامل، نصف الناس تقريباً عندهم تاريخ تحسّس عام أو أكزيما تأتبية في حياتهم، يعني الجلد أصلاً عنده استعداد. وفي محفزات معروفة ليهو: التوتر النفسي—وده محفز صريح جداً، لأن الأكزيما دي بالذات عندها علاقة قوية بحالة الأعصاب—وبرضو الجو الحار الرطب، عشان كده في ناس بتجيهم في الربيع والصيف بصورة موسمية.

وفي محفز “غريب” لكن مهم: في بعض الناس الحساسين لمعدن زي النيكل أو الكوبالت، ممكن يحصل لهم اشتعال أحياناً مع تناول أطعمة غنية بالمعادن دي

سريرياً، شكلها مميز وواضح، الطفح بطلع فجأة في شكل مجموعات من الحويصلات العميقة الصغيرة على جوانب الأصابع أو الكف أو باطن القدم، ولأنها تحت طبقة قرنية سميكة، ما بتتفجر بسهولة، فبتشوفها كحبيبات صلبة شوية، أحياناً بدون احمرار واضح في البداية

لكن الإحساس بكون مزعج: حكة قوية جداً، مرات الناس بتوصفها كحرقان أو وخز مؤلم أكتر من مجرد حكة، وبعد أيام، بدل ما “تفتح” زي أي فقاعة عادية، غالباً بتمشي بطريقتين:

يا إما تتنفس وتتسطّح تدريجياً، يا إما تدخل في مرحلة تقشير شديد، وتخلي حلقات قشرة صغيرة حوالين المكان كأن الجلد عمل دوائر تقشير، وبعدها يظهر جلد أحمر طري ومؤلم، ولو الحالة شديدة، ممكن الحويصلات تلتحم وتعمل فقاعات كبيرة، وساعتها الألم والتعطيل حيكونوا واضحين.

ولو الموضوع طول وبقى مزمن، بتظهر عواقبها الحقيقية: تشققات مؤلمة في الأصابع والكف، لأن الجلد السميك لما يلتهب ويجف بتشقق زي أرض ناشفة، ومرات بحصل تأثير على الأظافر: خطوط، سماكة، أو تشوه بسيط لأن الالتهاب قريب من قاعدة الظفر.

وفي المرحلة دي الناس غالباً تدخل في دائرة صعبة: الألم يخليك تقلل الترطيب وتقلل الغسيل، لكن الشغل يفرض عليك غسيل وتعقيم، فتتكرر الهجمات.

النوع ده من الإكزيما ما عدوى، وما “فطريات في اليد” بالضرورة، وما دليل على قلة نظافة، هي تفاعل جلدي عصبي-مناعي في منطقة خاصة من الجسم جلدها سميك وحساس.

فهم طبيعتها بريّحك نفسياً لأنك بتعرف ليه بتجي فجأة، وليه بتألم وتحك شديد بالطريقة دي، وليه ما لازم تنفتح حتى تتحسن. وفي البوست الجاي لما نتكلم عن العلاج، حنركز على منطق السيطرة أثناء النوبة، وكيف نمنع التكرار بدون ما يتحول الموضوع لتعذيب يومي لليدين والقدمين.

واتس اب الحجز تحت صورة المنشور

22/01/2026

الاكزيما – تلك الحكة المرهقة
(سلسلة منشورات)
الإكزيما التلامسية – الوقاية والتوقعات

في الوقاية، في فكرة غريبة بيسموها “ظاهرة التصلّب” أو hardening phenomenon، ودي بتحصل أحياناً في التهيّجي ICD: الجلد مع تعرض خفيف متكرر ممكن يتخن شوية ويتكيف، كأنو عمل طبقة حماية إضافية وبقى أقل تفاعل. لكن دي ما خطة علاج يعتمد عليها، لأنها ما بتحصل لكل الناس، وممكن تتحول من “تكيف” إلى “خشونة وتشقق مزمن”. والأهم: الظاهرة دي ما بتحصل في التحسّسي ACD أصلاً، لأن الحساسية ما بتتصلّب.

أما الحماية الحقيقية خاصة في الشغل، فهي عقلية “حماية قبل العلاج”: قفازات مناسبة لنوع المادة، طريقة لبس صحيحة، عدم ترك الموية والعرق محبوسين ساعات، واستخدام حاجز جلدي ومرطبات بشكل متكرر، لأن المشكلة في اليد العاملة إنها بتتعرض عشرات المرات يومياً. وده سبب إن التهاب الجلد التماسي هو أشهر مرض جلدي مهني في العالم: لأنه مع الوقت بيكسر اليد، واليد ما عندها خيار تتقاعد.

ومن أهم أجزاء العلاج برضو التعليم. لأن تجنب المواد ما ساهل دائماً، خاصة في التحسس من النيكل مثلاً: النيكل ما بس في الحلق والسلسلة: ممكن يكون في أدوات الشغل، في كفرات الموبايل ، في أزرار البنطلون، في السحّابات، في المفاتيح، فالمريض لو ما اتعلّم “وين يختبئ السبب”، حيعالج طول عمره بدون ما يعرف ليه بيرجع.

وفي الحالات المهنية المزمنة، المشكلة أحياناً ما في “عدم وجود علاج”، وإنما في إنك ما قادر تتجنب السبب بالكامل، لأن السبب هو شغلك. هنا الطب الحديث بدأ يفتح خيارات أعلى للحالات العنيدة، خاصة في إكزيما اليدين الشديدة: في أدوية جهازية معينة موجهة لحالات اليدين، وفي علاجات مناعية حديثة تُستخدم أحياناً لبعض حالات التحسس العنيد، لكن دي خطوات ما بنفكر فيها إلا لما تكون الحالة فعلاً معطّلة للحياة، وبعد ما يكون التشخيص والسبب واضحين، لأن ده آخر السُلّم وليس بدايته.

الخلاصة: التهاب الجلد التماسي ما بيهزمك لأنه قوي، بيهزمك لأنه “خفي” و”متكرر”. وأفضل علاج ليه هو أنك تكتشف الجاني، توقفه، ثم تعطي الجلد فرصة يبني نفسه من جديد. بدون ده، كل اللي بتعمله هو إسعاف يومي لجرح بيتفتح من نفس الباب.

واتس اب الحجز تحت صورة المنشور

22/01/2026

الاكزيما – تلك الحكة المرهقة
(سلسلة منشورات)
الإكزيما التلامسية – أهداف العلاج

في التهاب الجلد التماسي، العلاج الحقيقي هو إكتشاف المسبب، لأنو سواء كان التهيّجي (ICD) أو التحسّسي (ACD)، أي كريم في الدنيا حيدي راحة مؤقتة لو أنت مستمر تتعرض لنفس المادة السببت المشكلة.

في النوع التهيّجي ICD، مرات القصة بتكون واضحة من التاريخ الشخصي: نوع صابون جديد، أو منظف قوي، استعمال تعقيم متكرر، أو مواد كيميائية في الشغل، إلخ. هنا الطبيب غالباً بقدر يصل للجاني من سردك أنت، لأن التهيّجي ما محتاج “اختبار حساسية” غالبا محتاج تحليل نمط الحياة والاحتكاكات اليومية.

أما النوع التحسّسي ACD فغالباً بيحتاج التحقيق بجدية، لأن الجاني مرات بكون متدسي في تفاصيل صغيرة: معدن في الساعة أو الحزام، عطر في كريم “علاجي”، مادة حافظة في مناديل الأطفال، صبغة شعر، قفاز لاتكس، لاصق طبي، هنا التاريخ مهم جداً، لكن المعيار الذهبي للفصل النهائي هو Patch Test، لأنه ببساطة بيوريك جسمك بيقول “لا” على شنو بالضبط، بدل ما تفضل تمشي بالشبهات.

بعد ما نعرف السبب، الهدف التاني ما أقل أهمية: ترميم الحاجز الجلدي. لأن التهاب الجلد التماسي—خصوصاً التهيّجي—هو عملياً “تخريب في الحاجز”، فحتى لو شلنا السبب، الجلد حيحتاج زمن وبيئة مناسبة عشان يرجع قوي. هنا المرطبات بتكون جزء من العلاج الأساسي، لأنك بتبني الحيطة من جديد.

أما العلاج الدوائي نفسه، فهو في الأساس هدفه يهدّي الالتهاب عشان الجلد يلقى فرصة يتصلح، في النوبات الحادة كريمات الكورتيزول، Topical Corticosteroids القوية غالباً هي خط الإطفاء السريع، وفي حالات التحسس الشديد جداً والواسع—زي التفاعل العنيف لبعض النباتات أو المواد—مرات الطبيب بضطر لكورس قصير من الكورتيزول الفموي Oral Corticosteroids عشان يجهض العاصفة بسرعة، لكن ده بكون قرار محسوب لأننا دايرين نقطع الهجمة بدون ما ندخل في دورات تكرار.

واتس اب الحجز تحت صورة المنشور

22/01/2026

الاكزيما – تلك الحكة المرهقة
(سلسلة منشورات)
الإكزيما التلامسية – كيفية التمييز

التهاب الجلد التماسي عندو ميزة بتخليك تشك فيه من أول نظرة لو كنت منتبه: الطفح مرات بجي “مرسوم” كأنه قالب هندسي، مطابق تماماً لشيء لمس الجلد: ساعة في المعصم تعمل دائرة، حزام يعمل شريط حوالين الخصر، لاصق طبي يطلع مربّع، عطر في الرقبة يطلع بشكل خط أو بقع في المكان الاترشت فيهو، وحتى بعض النباتات اللمستك وانت ماشي بتعمل خط طويل كأنك اتجلدت بسوط. المنظر ده مهم لأن الجلد هنا بيرد على شيء من الخارج.

في المرحلة الحادة، الصورة غالباً بتكون واضحة: احمرار، تورّم بسيط، فقاقيع مائية صغيرة، وأحياناً فقاعات أكبر لو التفاعل كان قوي. والناس بتتخلع لأن المنظر بيكون سريع ومزعج

أما لو التعرض استمر يوم ورا يوم، القصة بتتغير. الجلد ما بفضل في مرحلة الفقاقيع طول الوقت، بخش في مرحلة “التخشّن”: فنشوف جفاف شديد، قشور، تشققات، ألم مع الحركة، وسماكة في الجلد.

والتمييز الأهم سريرياً بين النوعين—التهيّجي (ICD) والتحسّسي (ACD)—بيكون في الزمن والإحساس.

النوع التهيّجي ICD غالباً بيديك إحساس “حارق” أو “لاسع” أو ألم، وببدأ بسرعة، في نفس اليوم أو بعد ساعات قليلة من التعرض، وده منطقي لأنه تهيّج مباشر، أما النوع التحسّسي ACD فقصتو أدهى وأخبث: غالباً الحكة بتكون هي العرض الأقوى، والحكة دي ما بتيجي فوراً، بتتأخر يوم أو يومين أو حتى ثلاثة بعد التعرض.

دي الحتة البتلخبط الناس: الزول يشتري ساعة يوم السبت، الطفح يطلع يوم الاثنين، فيفتكر السبب أكل ولا “حاجة دخلت في الدم”، بينما السبب الحقيقي كان معدن أو عطر أو مادة حافظة لمست الجلد قبال يومين، عشان كده في النوع التحسّسي لازم تسأل نفسك: “استعملت أو لبست أو لمست شنو قبل 48–96 ساعة؟”

من ناحية التوقعات، التهاب الجلد التماسي عندو حكم واضح جداً: لو عرفت السبب وشلته، غالباً الموضوع بينتهي وبتعالج تماماً، خصوصاً في التحسّسي، لأنه ما مرض لازم يعيش معاك العمر كله. لكن لو ما عرفت السبب، أو عرفته وما قدرت توقف التعرض ليه بسبب الشغل أو العادة اليومية، هنا بتحصل المأساة: يتحول لمرض مزمن متعب، كل يوم تشققات وحكة وألم، وكل علاج يديك راحة مؤقتة وبعدين يرجع لأن المصدر لسه موجود.

وعشان نكون عمليين: لو الحالة بتتكرر، أو المكان ثابت، أو الإحساس يوحي بحساسية متأخرة، هنا أهم فحص في الدنيا ليهو هو الـ Patch Test. ده اختبار اللزقات، وهو المعيار الذهبي لتشخيص الحساسية التلامسية ACD لأنه بدل ما نخمن، بنجرّب المواد الشائعة على الجلد بطريقة منظمة ونشوف أي واحد فعلاً بيعمل التفاعل. الفحص ده ما بيفيد في التهيّجي بنفس القوة، لأن التهيّجي أساساً “ضرر مباشر” ما “حساسية ذاكرة”.

في المنشور الجاي حنعرف نتعامل معاهم كيف علاجا ووقاية

واتس اب الحجز تحت صورة المنشور

22/01/2026

الاكزيما – تلك الحكة المرهقة
(سلسلة منشورات)
الإكزيما التلامسية – حكاية مدينتين

في عيلة الأكزيما، في نوع بيجيك من برّه، من العالم، من شغلك، من الصابون البتستعمله، من العطر البترشه، من قفاز لابسهو ساعات طويلة، أو من معدن لامس جلدك يوم ورا يوم.

عشان كده اسمو التهاب الجلد التماسي (Contact Dermatitis)، وده فعلاً واحد من أكتر أمراض الجلد شيوعاً في بيئة العمل، وسبب مهم جداً لخسارة اقتصادية وإجازات مرضية لأنو بيركّز على اليدين ويعطل حياة الناس اليومية.

الفكرة الأساسية بسيطة: الجلد زي بوابة، ولما مادة معينة تقيف على البوابة دي وتعمل فيها تأثير مباشر، ممكن يحصل التهاب. لكن الالتهاب ده عندو طريقين كبار: تهيّج (Irritant) أو تحسس (Allergic). شكلهم ممكن يكون متشابه للعين: احمرار، حكة، تشقق، قشور، لكن القصة تحت الجلد مختلفة تماماً، وعلاجهم ووقايتهم برضو مختلفة.

النوع الأول هو التهاب الجلد التماسي التهيّجي Irritant Contact Dermatitis، وده الأكثر شيوعاً، حوالي 80% من حالات التهاب الجلد التماسي. هنا ما في “حساسية مناعية” بالمعنى المعروف، وإنما في مادة بتخرب طبقة الجلد مباشرة. مثلا: منظف قوي أو مادة كيميائية شالت المونة من بين الطوب، أو خلّت البروتينات تتكسر، أو حرقت خلايا الجلد نفسها. الصابون القاسي، المنظفات، المذيبات، الأحماض، القلويات، دي كلها ممكن تعمل نفس السيناريو.

الجلد لما يتضرر بالطريقة دي، الخلايا المتضررة بتطلق إشارات التهاب جاهزة، فيبدأ الاحمرار والتهيج سريع، أي زول لو تعرض لمادة مهيجة بتركيز عالي أو لفترة كافية، حتحصل ليه نفس المشكلة، الفرق بس إن في ناس حتحصل ليهم أسرع، وناس أخف شوية حسب قوة الحاجز الجلدي.

ده بوضح ليه الناس المصابين بأكزيما تأتبية بكونوا أكثر عرضة، لأن جلدهم من البداية عندو نقاط ضعف في الحاجز، فالمهيجات البتخلي غيرهم بس “ينشف شوية”، ممكن تخليهم يدخلوا في التهاب كامل وتشقق وحكة مزمنة.

النوع التاني هو التهاب الجلد التماسي التحسّسي Allergic Contact Dermatitis، وده بشكل حوالي 20%، لكن قصته أعمق لأنه بعتمد على “ذاكرة المناعة”. هنا لما مادة مهيجة (بنسميها hapten) تدخل الجلد ممكن تتلصق ببروتينات الجلد، فتتحول لحاجة جديدة المناعة تعتبرها “غريبة”.

في المرة الأولى غالباً ما بتحصل حاجه؛ لكن الجسم بعمل مرحلة تدريب سرية، فيكوّن خلايا ذاكرة جاهزة، بعدين في المرة الجاية، لما تتعرض لنفس المادة، المناعة تقوم تتذكر فجأة وتعمل رد فعل متأخر.

وده سبب إن الطفح ما بظهر في نفس اللحظة، ممكن يتأخر يومين أو ثلاثة غالباً. الناس بتتغش لما تحاول تفهم جات من وين، لأن الزمن خدّاع: بفتكروا الطفح جا من أكل أو من صابونة جديدة، بينما السبب الحقيقي كان حاجة لمسوها قبل 48–96 ساعة.

المواد البتعمل النوع ده كثيرة جداً، لكن في قائمة بتتكرر في كل الدنيا: النيكل في الإكسسوارات والأحزمة والأزرار، العطور في الكريمات والمستحضرات، المواد الحافظة في المناديل المبللة وبعض الشامبوهات، بعض المضادات الحيوية الموضعية زي النيومايسين، ومعادن تانية زي الكوبالت.

والموضوع ما دايماً بكون واضح لأن المنتج الواحد ممكن يحمل أكثر من مادة محفزة، ومرات تشتري “كريم علاجي” وتكتشف إن العطر أو الحافظ جواته هو السبب الحقيقي للالتهاب.

الخطورة في التهاب الجلد التماسي إنو ممكن يتحول لحالة مزمنة بسهولة، خصوصاً في اليدين، لأن يدك ما بتقدر توقف تستعملها، فحتى لو وقفت عن مادة واحدة، في مواد تانية بتكمل الضغط على الجلد. وده سبب إنو في الطب المهني بنعتبره من أهم الأمراض المرتبطة بالشغل: الممرضين، عمال النظافة، الكوافيرات، الصناعات الكيميائية، الميكانيكية، كلهم معرضين، لأن الجلد عندهم بعيش في تعرض مستمر للمهيجات.

في المنشور الجاي حنعرف أشكالهم ونفرق بينهم كيف

واتس اب الحجز تحت صورة المنشور

20/01/2026

الاكزيما – تلك الحكة المرهقة
(سلسلة منشورات)
الإكزيما الدهنية
🔍 دليل الوقاية من "القشرة الدهنية" (الاكزيما الدهنية) للبالغين

القشرة الدهنية (Seborrhoeic Dermatitis) حالة مزمنة وبتحتاج "طولة بال" وعناية مستمرة، ما بس علاج لفترة وتنتهي. وده روتين كامل للصيانة المستمرة.

🧼 روتين العناية بالبشرة (الوجه والجسم)

1. النظافة "بالهداوة":
استخدم غسول لطيف (Soap-free cleanser). ابعد تماماً عن الصابون القوي أو "صابون الغسيل" لأنه بخرّب حاجز البشرة وبزيد التهيج.

2. التطريب الذكي:
استخدم مرطب قوامه خفيف (Lotion or Gel) وما يكون فيه زيوت ثقيلة. الأفضل تختار مرطبات بتحتوي على مادة "السيراميد" عشان ترمم جلدك.

3. الكريمات والشامبوهات العلاجية:
في حالات الهيجان، استخدم كريمات فيها مضادات فطريات زي (Ketoconazole) أو (Piroctone Olamine).

4. ابعد عن "الحوامض والكحول":
قلل من استخدام العطور المباشرة على الجلد أو التونر اللي فيه كحول، لأنها بتزيد التحسس.

5. الحماية من الشمس:
الشمس ممكن تزيد الالتهاب. لازم واقي شمس "خالي من الزيوت" (Oil-free) يومياً.

🧴 روتين العناية بفروة الرأس (الشعر)

1. غسيل الشعر المنتظم:
فروة الرأس الدهنية محتاجة نظافة دورية. استخدم الشامبو المعالج (زي النيزورال أو السيلينيوم) مرتين لثلاثة في الأسبوع وقت وجود القشرة لعدة أسابيع.

2. سر الصنعة (قاعدة الـ 5 دقائق):
أهم غلط بقع فيه الناس هو غسل الشامبو بسرعة، لازم تخلي رغوة الشامبو المعالج في راسك من 3 لـ 5 دقائق عشان المادة الفعالة تشتغل وتقتل الفطريات.

3. إذابة القشور:
لو القشرة سميكة، استخدم لوشنات فيها "حمض الساليسيليك" عشان تلين القشرة قبل الاستحمام، وبكدة الشامبو الفطري بيصل للجلد بفعالية أكبر.

4. تنبيه مهم عن الزيوت:
ابعد عن الزيوت التقيلة زي زيت الزيتون، في فروة الرأس لأنها "أكل غالي" للفطريات وبتحفز نموها وبتزيد القشرة.

5. تجنب "الكوافير" والمواد الكيميائية:
الصبغات القوية والفرد (البروتين/الكيراتين) ممكن يهيجوا الفروة شديد وقت النشاط.

🍏 الأكل وصحة الجلد

1. أوميغا-3 (الدهون الصحية):
أكثر من السمك، بذور الكتان، والجوز، دي بتقلل الالتهاب من جوه لبره.

2. قلل السكريات والنشويات:
علمياً، الأكل المليان سكر (High Glycemic Index) بيرفع هرمون الأنسولين، وده بيزيد إفراز الدهون (الزهم)، فبالتالي بتزيد القشرة.

3. صحة الجهاز الهضمي (البروبيوتيك):
الزبادي (الروب) والخمائر الطبيعية بتساعد في توازن بكتيريا الجسم وبتحسن مناعة الجلد.

🧘‍♀️ نمط الحياة والنفسية

1. الراحة النفسية:
الاكزيما الدهنية "صديقة للتوتر". كل ما زاد الضغط النفسي، الحالة بتنشط. حاول تمارس رياضة أو أي هواية تريح بالك.

2. النوم الكافي:
السهر بجهد الجسم وبخلي المناعة تضطرب، وده بيظهر طوالي في شكل "قشور" في الوجه وجوانب الأنف.

3. الجو والبيئة:
حاول تتجنب العرق الزايد، ولو عرقت أغسل وجهك بماء بارد فوراً.

الاكزيما الدهنية حالة بنتعايش معاها بالروتين الصاح، ما تحك جلدك بقوة، وما تستخدم خلطات مجهولة، وخليك دايماً "رايق" عشان جلدك يروق.

واتس اب الحجز تحت صورة المنشور

Mohammed Qurashi Abbas

29/01/2026

29/01/2026

29/01/2026

29/01/2026

29/01/2026

28/01/2026

28/01/2026

22/01/2026

22/01/2026

22/01/2026

22/01/2026

20/01/2026

Address

Website

Alerts

Contact The Practice

Shortcuts

Share

Category