09/11/2025
Kobaca maskaxda ee ilmahu wuxuu si degdeg ah u dhacaa ilaa da’da 6 san ee u horaysa noloshiisa, xilligaas maskaxdu waxay u qoyantahay sida dhoobada oo kale, wax kasta oo ilmaha la baraana way ku dhagayaan si wanaagsan. Unugyada neerfaha ayaa xoogaysta muddadan kaasoo u saamaxa in ilmaha yari wax cusub barto kolba. Neerfayaasha si joogto ah loo isticmaalo way xoogaystaan, halka kuwa aan la isticmaalin ay lumiyaan shaqadooda ama ay gaabis galaan!
Inta lagu jiro marxaladdan ama da'dan, ilmaha waa inuu barto xirfado kala duwan sida:
1. Horumarinta dareenka (sensory development),
2. Xakamaynta murqaha yaryar,
3. Miisaamidda iyo dheellitirka
4. Barashada luqadda iyo isgaadhsiinta,
5.Dabeecadaha bulshada iyo la qabsiga asxaabta ama carruurta ay isku da'da yihiin
Waxyaabahan oo dhan waxay dhisaan asaaska inuu wax barto ilmaha yari . ha ahaato mid rasmi ah ama mid aan rasmi ahayn.
Halkaa markay marayso, waa lama huraan in xiligan markuu ilmahu marayo looga faa'ideeyo noloshiisa si buuxda, lana siiyo jawiga ugu habboon ee uu waxna ku baran karo kuna kori karo.
Berigii h**e, qoysasku way wada daganayeen ama way isku xidhnayeen sidaa si leeg bulshadu way is dhex gali jirtay, ilmuhu wuxuu heli jiray waayo-aragnimo kala duwan oo dhiirrigelinaya kobcinta maskaxda iyo la dhaqanka bulshada. Laakiin maanta, iyadoo la arkayo isbeddelka nolosha casriga ah iyo qoysaska oo gooni u nool, carruurtu waxay waayaan fursado badan oo ay ka heli lahayeen barasho iyo isdhexgal dabiici ah.
Waxaan ku talin lahaa, waxaa habboon in ilmaha laga bilaabo da’da 3 sano la geeyo meelaha carruurta la iskugu keeno sida "KG" ga meel ay ku helaan barasho aan rasmi ahayn iyo isdhexgalka bulshada oo uu la kulmo caruur da'diisa ah, si maskaxdoodu si caafimaad leh u kobocdo. Waa muhiim meelahaas in kharashkoodu uu noqdo mid la awoodi karo si cid kasta u gaysan karto. Muhiimadu inuu wax barto maaha, se waa inuu dadka dhex galo ilmuhu
