02/11/2025
Dagaalka hawada ee Somaliland lagu soo qaaday waa in ay dowladda Somaliland si cad uga jawaabtaa. Waxaan soo jeedinayaa in tallaabooyinkan la qaado:
1. Waa in lagu khasbaa bangiga soo ururiya lacagaha e-visada sharci darrada ah, oo ka mid ah kuwa ka hawlgala gudaha Somaliland. Baadhitaankii aannu sameynay waxaannu ku ogaanay kuna xaqiijinnay in bangigan oo la qarinayey uu mashruucan lacagaha u qabto kooxda Muqdisho ee weerarka ku ah dalkeenna. Xogtan waxaannu la wadaagnay Bangiga Dhexe ee Somaliland ee bixiya liisamada.
2. Shirkadaha diyaaradaha sida Flydubai iyo Ethiopian Airlines waa in culays lagu saaraa in magacii Somaliland ay ku soo celiyaa website-yadooda. Haddii shirkadahan diyaaradeed arrinkan ka dhega-adaygaan ama ay xukuumadda Muqdisho joojiso, waxa innoo bannaan in la sii isticmaalo magaalada Jigjiga, oo wax ka yar laba saacadood u jirta Hargeysa, sida dad tiro badaniba hadda sameeyaan.
3. Duulimaadyada tooska ah ee u dhexeeya Muqdisho iyo Hargeysa waa in la hakiyaa. Ma aha wax macquul ah in Hargeysa iyo Muqdisho lagu daro duulimaadyada gudaha, maadaama ay bixinayaan sawir khaldan oo muujinaya in Somaliland ay hoos timaado Soomaaliya. Dadka safraaya waxay si fudud u mari karaan Itoobiya ama Jabuuti.
4. Waa in gebi ahaanba la joojiyaa wareejinta lacagaha doolarka ah ee laga qaado Hargeysa loona diro Muqdisho. Baahida keenta in doolar tiro badan loo qaado Xamar waxa sabab u ah doolaryaraanta joogtada ah ee ka jirta Soomaaliya, taas oo sii xumaatay kadib markii la joojiyey lacagihii deeqaha ahaa. Arrintan waxa kale oo sabab u ah dadka oo aan weli si buuxda u baran ama u aaminin isticmaalka lacagaha telefoonnada iyo lacagaha xawaaladaha ee laga soo raro Mareykan iyo Yurub oo la keeno Dubai oo aad u soo raagta. Bil kasta dhammaadkeeda, Soomaaliya waxa dibadda kaga maqnaada lacag ka badan $100 milyan oo dhinaca Somaliland laga sii dabaro. Somaliland adeegsiga Zaad iyo eDahab ayaa sababay in baahida doolarka ee gudaha si weyn hoos ugu dhacdo. Sidoo kale, sannad kasta Somaliland waxa soo gala in ka badan $2 bilyan oo ka yimaadda xoolaha la dhoofiyo iyo xawaaladaha.
Maamulka hawada oo lala wareegaa waa arrin xanuun iyo xusuus murugo leh u leh bulshada reer Somaliland. Waxaan u soo taagnaa 1988 markii diyaarad ka kacday gegida magaalada ay dib u rushaysay isla dadkii magaalada u dhashay. Sidaas darteed, marka qaddiyad laga hadlayo, ganacsiga iyo dillaalnimadu meelna k**a soo galaan. Taallada Miigga ah ee Kheyriyada taagan waa farriin cad oo muujinaysa in dadka reer Somaliland aanay mar dambe ogolaan doonin in hawadooda loo adeegsado.
