02/02/2026
Deeqo Maxamed Qaalib waxa ay khibrad dheer u leedahay maamulka, iyo horumarinta hay’adaha waxbarasho, iyadoo leh waayo aragnimo ka badan 19 sano, oo isugu jirta hoggaan tacliimeed, dhisidda hay’ado, tababarro shaqaale, iyo qorshayn istiraatiiji ah.
Waxay ka soo shaqaysay Wasaaradda Waxbarashada, Hiddaha iyo Tacliinta Sare ee JFS, halkaas oo ay ka ahayd Lataliye Sare, kana qaadatay kaalin wax ku ool ah hirgelinta barnaamijyo waawayn oo heer qaran ah, dejinta qorshayaal istiraatiiji ah, iyo dhismaha Machadka Ingiriisiga ee Jaamacadda Ummadda Soomaaliyeed. Sidoo kale, waxay gacan ka geysatay kobcinta xiriirka jaamacadaha caalamiga ah iyo helitaanka fursado waxbarasho sare.
Ms. Deeqo Maxamed Qaalib waxay soo noqotay Agaasimaha Waxbarashada ee Jaamacadda SIMAD iyo Guddoomiye Ku-xigeenka Tacliinta ee Huda International School (Turkiga), Intii lagu jiray xilligii cudurka Covid-19, waxay aasaastay Somali Action Network (Badbaadi Naf), urur samafal oo door muuqda ka qaatay badbaadinta nolosha, gaar ahaan keenista qalabka oksijiinta isbitaallada waaweyn ee dalka.
Madaxweynaha Jamhuuriyadda Federaalka Soomaaliya ayaa u magacaabay Guddoomiye Ku xigeenka Arrimaha Maamulka iyo Maaliyadda ee Jaamacadda Ummadda Soomaaliyeed, taas oo muujinaysa kalsoonida buuxda ee lagu qabo hoggaaminteeda, kartideeda maamul, iyo doorkeeda ku aaddan horumarinta iyo hufnaanta hay’adaha tacliinta sare
