03/03/2026
Madaxda Cusbitaalka Guud ee Hargeysa Oo Munaasibad Afur iyo Isxog-Waraysi La Qaatey Dhakhaatiirta Takhasuska Ah
Madaxda Cusbitaalka Guud ee Hargeysa ayaa caawa munaasibad afur ah ku maamuusay dhakhaatiirta takhasuska ah ee ka hawlgala cusbitaalka, kulan si qoto dheer loogu lafaguray xaaladaha shaqo ee dhakhaatiirta, isla markaana lagu xoojiyey wada-shaqaynta iyo isku-boorinta ka faa’iidaysiga Bisha Barakaysan ee Ramadaan.
Kulanka oo ahaa mid isugu jiray afur, iswaraysi iyo wacyigelin ruuxi ah, ayaa lagu falanqeeyey duruufaha adag ee dhakhaatiirtu ku shaqeeyaan, gaar ahaan marka la eego culayska adeegyada caafimaad ee bulshada iyo baahida joogtada ah ee bukaanadu qabaan.
Agaasimaha Cusbitaalka Guud ee Hargeysa, Dr Axmedweli Daahir Xaddi, ayaa hadal dhiirigelin iyo mahadnaq isugu jira u jeediyey dhakhaatiirta takhasuska ah. Agaasimuhu waxa uu ku bogaadiyey dadaalkooda, daacadnimadooda iyo sida ay ugu heelan yihiin u adeegidda dalkooda iyo dadkooda, isagoo xusay in shaqada ay hayaan ay tahay mid qiimo weyn u leh bulshada, inkastoo ay jiraan duruufo adag oo ay ku gutaan waajibaadkooda.
Dhankooda, qaar ka mid ah dhakhaatiirta takhasuska ah ayaa iyaguna uga mahadceliyey maamulka cusbitaalka sida hufnaanta, hawlkarnimada iyo wada-shaqaynta wanaagsan ee ay ula shaqeeyaan, taas oo ay sheegeen inay dhiirigelin u tahay horumarinta adeegyada caafimaad ee la siiyo bulshada.
Kulankan qiimaha leh waxa kale oo goobjoog ka ahaa Agaasime-ku-xigeenka Cusbitaalka Guud ee Hargeysa, Dr Cabdiraxman Cayngal, kaas oo xoojiyey muhiimadda midnimada, isku-duubnida iyo ka faa’iidaysiga fadliga Ramadaan si loo laban-laabo dadaalka iyo adeegga bulshada.
Ugu dambayn, munaasibaddan afurku waxay ahayd mid xambaarsan farriin midnimo, is-ixtiraam iyo dhiirigelin, taas oo sii adkaynaysa wada-shaqaynta u dhexeysa maamulka iyo dhakhaatiirta takhasuska ah ee Cusbitaalka Guud ee Hargeysa, si loo xaqiijiyo adeeg caafimaad oo tayo leh oo ay bulshada si joogto ah uga faa’iidaysato.
Xafiiska Warbaahinta
Cusbitaalka Guud Ee Hargeysa
