01/04/2026
Ururka Dhakhaatiirta Jubaland ayaa si heer sare ah u agaasimay munaasabad lagu dhiirigalinayay loogana mahadcelinayay Dr. Abdullaahi Kawir, taas oo ku muteestay dadaalkiisa joogtada ah, kartidiisa hogaamineed, iyo naf-hurnimada muuqata ee uu ugu adeegayo bulshada Soomaliyeed.
Dr. Abdullaahi Kawir, oo ah Madaxa Dhakhaatiirta isla markaana Chief Surgeon ka ah Kismayo General Hospital, ayaa si weyn loogu ammaanay doorkiisa badbaadinta nolosha bukaannada, isaga oo habeen iyo maalinba u taagan gudashada waajibaadkiisa, kana shaqeynaya daryeelka caafimaad si daacadnimo iyo dulqaad leh, isaga oo aan muujin wax daal ama caajis ah.
Munaasabadda lagu guddoonsiiyay shahaadadan sharafka ah ayaa ahayd mid si qurux badan loo soo agaasimay, waxaana ka soo qeyb galay mas’uuliyiin kala duwan oo ay ka mid ahaayeen
Guddoomiyaha Arrimaha Bulshada ee Baarlamaanka Jubaland, xil Shire Guddoomiyaha Haweenka Jubada Hoose, Guddoomiyaha Dhalinyarada Jubaland, iyo Guddoomiyaha Suxufiyiinta Jubaland. Sidoo kale waxaa goobta joogay bahda caafimaadka, dhakhaatiir, iyo xubno ka socday bulshada rayidka ah, kuwaas oo dhammaantood muujiyay taageero iyo bogaadin ay u hayaan shaqada qiimaha leh ee Dr. Kawir.
Qaar ka mid ah masuuliyiintii munaasabadda ka hadlay ayaa tilmaamay in Dr. Kawir uu yahay tusaale ifaya oo muujinaya sida ay muhiim u tahay in xirfadlayaasha caafimaadku ay u adeegaan bulshada iyagoo leh daacadnimo, xilkasnimo, iyo dareen masuuliyadeed oo sare.
Guddoomiyaha Ururka Dhakhaatiirta Jubaland,
Dr. Abdirisaaq Gaaxnuug,nayaa isna sheegay in abaal-marintan ay tahay mid dhiirrigelin u ah dhammaan shaqaalaha caafimaadka, si ay ugu daydaan dadaalka, hufnaanta, iyo anshaxa shaqo ee uu muujiyay Dr. Cabdullaahi Kawir.
Gunaanadkii, shahaadadan sharafka ah waxay ka tarjumaysaa qaddarin iyo ixtiraam ballaaran oo loo hayo kaalinta muuqata ee Dr. Kawir kaga jiro horumarinta iyo kor u qaadista adeegyada caafimaadka ee Jubaland, gaar ahaan magaalada Kismaayo, taas oo ka dhigeysa shaqsi mudan in lagu daydo laguna ammaano.
