20/02/2026
ДЭЛХИЙН МОНГОЛ ЭМЧ: Б. Мөнхцэцэг
Сайн байна уу? Намайг Мөнхцэцэг гэдэг. Одоогоор Турк улсын Дарижа Фараби Эрдэм Шинжилгээ, Судалгааны эмнэлэгт элэг болон дурангийн эмчээр ажиллаж байна.
Анх эмч болохоор шийдсэн түүх минь бага байхдаа гэмтэл авч эмнэлэгт очсон тэр үетэй их холбоотой. Өвдсөнийг эдгээж, эрүүл болгон гэр бүлд нь буцааж буй эмч нарыг хараад их л биширч байснаа маш тод санадаг. Тэгээд л би ч бас тэдний нэг болж бусдыг авардаг эмч болох мөрөөдөлтэй болсон юм.
Нэгэнт л эмч болвол хүний хамгийн чухал эрхтнийг эмчилдэг мундаг эмч болно гээд зүрх, мэдрэл судлалаар эмнэлэгт дадлага хийж ажилласан ч эдгээр чиглэл нь надад тохирохгүй гэдгийг ойлгож эргэлзэж явах үед нэгэн багш маань “Сайн эмч болохын тулд дотрын анагаах ухааныг эзэмших хэрэгтэй” гэсэн зөвлөгөө миний амьдралыг өөрчилсөн.
Ингээд дотрын анагаах ухаан судлалаар хамгийн сайн их сургуульд суралцана гэж зориод Туркын Истанбулын Их Сургуулийн шалгалтад маш шаргуу бэлдсэн. Тухайн үед шалгалтад Турк болон бусад орны 2000 гаруй эмч нар оролцож, миний сурахыг хүссэн чиглэлд ердөө 2 эмчийн л хуваарь ирсэн ба шалгалтандаа тэнцсэнээр 5 жилийн турш дотрын анагаах ухаанд шамдан суралцах боломж миний өмнө нээгдэж байлаа.
Дараагаар нь өвчтөнд авсан арга хэмжээнийхээ үр дүнг маш хурдан харах боломжтой чиглэл болох элэг ходоод буюу бидний ярьдгаар гастроэнтерологи, элэгний дурангаар нарийсан суралцсан.
Эмч хүнийхээ хувьд зориод ирсэн хүмүүст цаг алдалгүй арга хэмжээг авч хүлээсэн үүргээ 100% гүйцэтгэн өөрөөс хамаарах бүх зүйлээрээ тусалж, өвчтөн эдгэрээд гарах бүрт сэтгэл өег, мэргэжлээсээ кайфийг мэдэрдэг гэхэд болно.
Манай Монгол улсын хувьд харьцангуй цөөн хүн амтай учир хэт нарийн мэргэжлийн эмч нар тийм ч олон хэрэггүй. Чадварлаг, дэлхийн аль ч оронд хүлээн зөвшөөрөгдөх эмч, мэргэжилтнүүд Монголд маш их, мөн тоног төхөөрөмжүүд ч хангалттай орж ирж байна.
Харин тулгамдаж буй гол асуудал бол иргэд маань хэтэрхий хожуу оношлогдож, хүндэрсэн үедээ эмнэлэгт хандах явдал болоод байна. Иймд урьдчилан сэргийлэх үзлэгтээ товлолын дагуу тогтмол хамрагдаж, хяналтанд байх нь хамгийн чухал. Иргэд болон эмч, мэргэжилтнүүдийг энэ талаар сургалтанд хамруулж, урьдчилан сэргийлэлт ямар чухал болохыг ойлгон, эрүүл мэнддээ эртнээс анхаардаг болох үед хүнд өвчтөнүүд багасч Эрүүл Мэндийн салбар маань илүү хөгжинө гэж хардаг.
Ийм л учраас одоог хүртэл анагаах ухаандаа шимтэн дурлаж иргэдэд туслахын тулд өөрийн оролцоог дайчлан, тасралтгүй суралцсаар явна даа.
