https://www.youtube.com/channel/UCAKkIsI1yxc8WaC3zsGk4eg

AFYA ROOM, Dar es Salaam (2026)

23/01/2026

🌟 WIKI YA 32 YA UJAUZITO – KARIBU KWENYE COUNTDOWN YA KWELI! ⏳🤍
Hongera mama 💐… sasa umeingia rasmi kwenye miezi ya mwisho ya ujauzito! Mtoto wako anaendelea kukua kwa kasi, na mwili wako nao unaanza kukupa “signals” kwamba siku ya kukutana na mgeni wako haiko mbali tena 😍
👶🏽 Mtoto wako wiki ya 32:
• Uzito: takribani kilo 1.7 – 2.0 ⚖️
• Urefu: karibu sentimita 42 📏
• Ukubwa: sawa na papai (papaya) 🍈
• Anaanza kukusanya mafuta chini ya ngozi – ngozi inakuwa laini na ya kupendeza ✨
• Wengi huanza kukaa kichwa chini (cephalic) kujiandaa na kuzaliwa 👇🏽
🤰🏽 Kwa mama:
• Maumivu ya mgongo na mbavu yanaweza kuongezeka 😣
• Haja ndogo mara kwa mara 🚽
• Kukosa usingizi 😴
• Kupumua kwa shida kidogo – mtoto anabonyeza juu 🫁
💡 Elimu ya leo:
Huu ni wakati mzuri wa kuanza:
✔️ Kufuatilia sana mateke ya mtoto
✔️ Kuandaa begi la hospitali 👜
✔️ Kuhudhuria kliniki bila kukosa
❓ Swali la siku:
👉🏽 Mama wa wiki ya 32, dalili ipi inakusumbua zaidi kwa sasa?
📌 Usisahau kufollow AFYA ROOM kwa elimu ya ujauzito wiki hadi wiki 🤍

17/01/2026

🌸 WIKI YA 31 YA UJAUZITO: MTOTO ANAZIDI KUWA “HALISI” KILA SIKU 🤰🏽💓
Hongera mama 💐
Ukiwa kwenye wiki ya 31, ujauzito wako unaingia hatua ya “mwisho ya maandalizi”. Mwili wako na mtoto wote mpo kazini 👶🏽✨

👶🏽 MTOTO WAKO SASA
Katika wiki ya 31:
• Uzito: takribani kilo 1.5 – 1.7 ⚖️
• Urefu: karibu sentimita 41–43 📏
• Saizi: sawa na nanasi kubwa 🍍
👉🏽 Ngozi inaanza kuwa laini, mafuta ya mwili yanaongezeka
👉🏽 Ubongo unakua kwa kasi sana
👉🏽 Mtoto anaweza kufungua macho na kuitikia mwanga
👉🏽 Mateke yanaweza kuwa mazito zaidi kuliko ya kasi, unaweza kuhisi amepunguza kucheza🦶🏽😄

🤰🏽 MAMBO UNAYOWEZA KUHISI MAMA
• Kuchoka haraka
• Kukosa usingizi 😴
• Haja ndogo mara kwa mara
• Maumivu ya mgongo na mbavu
• Kiungulia au gesi tumboni
👉🏽 Haya yote mara nyingi ni ya kawaida katika wiki hizi, lakini dalili kali au zisizo za kawaida — muone mtaalamu 🩺

🧠 USHAURI MDOGO WA WIKI YA 31
✔️ Lala kwa ubavu (hasa kushoto)
✔️ Kula mara kidogo kidogo lakini mara nyingi
✔️ Pumzika unapopata nafasi
✔️ Endelea clinic bila kukosa

💬 SWALI LA SIKU:
👉🏽 Ni dalili ipi imeanza kukusumbua zaidi kwenye wiki hizi za mwisho za ujauzito?

📌 Usisahau:
✅️follow
👍🏽 Like
💬 Comment
🔁 Share kwa mama mwingine

14/01/2026

“BASI BWANA… LEO CHUMBA CHA DAKTARI KILIKUWA K**A KIKAO CHA WIKI YA 30 😄🤰🏽”

Leo nikiwa hospitali Y, nilipokea wajawazito kadhaa waliokuwa kwenye wiki ya 30 ya ujauzito. Kila mmoja alikuwa na simulizi yake, lakini niligundua kitu kimoja…
👉🏽 karibu wote walikuwa wanasimulia hali zile zile mnazoandika hapa kwenye comments.

Mmoja akaniambia:
“Daktari, usingizi umepotea kabisa, naenda haja ndogo kila muda, mtoto ananipiga mateke hata kugeuka nalemewa.”
Nikamtazama nikatabasamu nikamwambia:
👉🏽 Hii ni kawaida wiki hizi.
Tumbo linakuwa kubwa, mfuko wa mkojo unabanwa, na mtoto ana nguvu zaidi. Ndiyo maana unakojoa mara kwa mara na usingizi unakatika.

Mwingine akaja akiwa ameshika mbavu na mgongo:
“Nahisi uzito sana, mishipa k**a inafunguka, kutembea kunakuwa shida.”
Nikamuambia:
👉🏽 Mwili wako unajiandaa kwa kujifungua. Viungo vinalegea taratibu, misuli inavutwa na uzito wa mimba—ndiyo maana mgongo, mbavu na nyonga vinauma.

Mama mwingine akasema:
“Daktari, kiungulia kimenizidi na nikikaa muda mrefu tumbo linauma sana.”
Hapa nilimwambia:
👉🏽 Mtoto anasukuma juu, asidi ya tumbo inapanda, ndiyo maana kiungulia kinaongezeka. Kula kidogo kidogo, epuka kulala mara baada ya kula.

Kisha akaja mama aliyekuwa na hofu:
“Nashauriwa kulala kushoto, lakini nikilalia kushoto napumua kwa shida, kwa hiyo nalalia kulia.”
Nikamhakikishia:
👉🏽 Usijilaumu.
Kulala kushoto ni ushauri wa jumla, lakini k**a unapata pumzi fupi, geuka upande unaokupa nafuu. Muhimu ni usiwe chali muda mrefu.

Halafu nikapokea lile swali zito zaidi:
“Daktari, maumivu yangu ya mgongo ni juu kabisa, shingoni hadi mabegani, si kiuno.”
Nikamuambia kwa utulivu:
👉🏽 Haya mara nyingi husababishwa na:
Kubeba uzito wa matiti yanayoongezeka
Mkao mbaya wa kukaa au kulala
Msongo wa mawazo na uchovu

Lakini nikamkumbusha pia:
⚠️ K**a maumivu ni makali sana, yanaambatana na ganzi, homa au maumivu ya kifua — lazima apimwe hospitali.

Nikahitimisha kikao chetu kwa kusema:
💬 Wiki ya 30 si rahisi, lakini hali nyingi mnazopitia ni sehemu ya safari ya ujauzito.
Hata hivyo, maumivu makali sana, kupumua kwa shida, au hali isiyo ya kawaida usivumilie kimya kimya — muone daktari.

🤍 Uko vizuri mama, mwili wako unafanya kazi kubwa ya kuandaa maisha mapya.

👉🏽 Endelea kufuatilia AFYA ROOM
👉🏽 Like, comment na share ili mama mwingine ajue hayuko peke yake

12/01/2026

🌸 WIKI YA 30 YA UJAUZITO: TUMBO LINAZIDI KUZUNGUMZA, MTOTO ANAJIFUNZA ZAIDI 🌸
Karibu wiki ya 30 mama 🤰🏽✨
Hapa ndipo unapogundua kuwa tumbo lako sasa linazungumza kila siku kwa mateke, kujigeuza na kusukuma 😄

Mtoto wako sasa anaendelea kukua kwa kasi:
👉 Uzito wake ni takribani kilo 1.4 – 1.6 ⚖️
👉 Urefu wake ni karibu sentimita 39 – 40, sawa na kabichi kubwa 🥬

Ndani ya tumbo lako:
🧠 Ubongo unaendelea kukomaa kwa kasi
👂 Mtoto anasikia sauti zako vizuri zaidi kuliko awali
🤲 Mateke na kujigeuza vinaongezeka kwa nguvu
🫁 Mapafu yanaendelea kujiandaa kwa kupumua hewa

Kwa upande wako mama 💕
Ni kawaida kuanza kuhisi:
😮‍💨 Kupumua kwa shida kidogo
🤕 Maumivu ya mgongo na mbavu
😴 Usingizi kukatika
🚽 Kwenda haja ndogo mara kwa mara
💡 Ushauri wa wiki hii:
👉 Lala ubavu wa kushoto 🛌
👉 Kunywa maji ya kutosha 💧
👉 Fuatilia mateke ya mtoto kila siku
👉 Usikose kliniki 🤍

📌 Kumbuka:
Kuanzia sasa, mtoto akizaliwa mapema bado ana nafasi nzuri ya kuishi kwa msaada wa kitabibu — ufuatiliaji ni muhimu sana 💪🏽

👉 Swali la leo:
Ni dalili ipi ya ujauzito ilikushangaza zaidi ulipofika wiki hizi—kupumua kwa shida, usingizi kukatika au maumivu ya mgongo? 😄
Tuambie uzoefu wako kwenye comments 👇🏽

Usisahau kufollow AFYA ROOM kwa elimu sahihi ya ujauzito na uzazi.

11/01/2026

🤰🏽 KUJIFUNGUA KWA OPARESHENI (CS) – NI NINI NA KWANINI HUFANYIKA?
CS (Caesarean Section) ni njia ya kujifungua kwa upasuaji, ambapo mtoto hutolewa kupitia tumbo na mfuko wa uzazi wa mama badala ya kupitia njia ya kawaida.
📌 Ni muhimu kufahamu:
👉 CS si kushindwa kwa mama
👉 Ni uamuzi wa kitabibu unaolenga kuokoa maisha ya mama na mtoto 🤍
CS hufanyika pale ambapo:
👉 Kujifungua kawaida kunaweza kuwa hatari kwa mama
👉 Au kuna hatari kwa maisha ya mtoto

🔴 SABABU ZA LAZIMA KABISA ZA KUJIFUNGUA KWA OPARESHENI
(Absolute indications for C-section)
Hapa mama hawezi kujifungua kawaida kwa usalama:
1. Kondo la nyuma kuziba kabisa njia ya uzazi (placenta previa)
2. Kondo la nyuma kujitenga mapema na kusababisha hatari kubwa (placenta abruptia)
3. Mtoto kushindwa kabisa kupita njia ya kawaida (CPD)
4. Mtoto kuwa katika mkao hatarishi (breech presentations) mf. kulala kabisa upande
4. Mtoto kuwa hatarini sana (non reassurance fetal status), mf. Mama kutosikia mtoto akicheza au mapigo ya moyo ya mtoto kuongezeka au kushuka sana
5. Kupasuka kwa mfuko wa uzazi (uterine rupture)
6. Kutokwa damu nyingi inayohatarisha maisha
7. Makovu ya awali ya upasuaji wa kizazi (previous uterine scar)

🟡 SABABU ZISIZO ZA LAZIMA KABISA
(Relative indications for C-section)
Hapa mama anaweza kujifungua kawaida au kwa operation kulingana na hali:
1. Mtoto kuwa mkubwa kupita kiasi
2. Uchungu kuwa dhaifu au kusimama
3. Mlango wa kizazi kufunguka polepole
4. Mama kuwa na shinikizo la juu la damu
5. Mimba ya mapacha au watoto wengi
6. Maambukizi kwa mama yanayohitaji uangalizi maalum
7. Uchovu mkubwa wa mama wakati wa uchungu
8. Maamuzi ya kitabibu kulingana na mazingira na usalama

📌 Muhimu kukumbuka:
Lengo la operesheni si kumuumiza mama, bali kuokoa maisha ya mama na mtoto 🤍

👉 Swali la leo:
Unadhani jamii inaelewa vizuri maana ya kujifungua kwa CS? Tuambie maoni yako 👇🏽

Asante kwa kuendelea kufuatilia AFYA ROOM 🤍

05/01/2026

🌟 WIKI YA 29 YA UJAUZITO: MTOTO SASA ANA SAUTI, KUMBUKUMBU NA NGUVU ZA AJABU 🌟
Karibu wiki ya 29 mama 🤰🏽✨
Hapa ndipo unapogundua kuwa tumboni mwako hakuna tena “kiumbe mdogo” bali BINADAMU anayejifunza kila siku 😍

Mtoto wako sasa ana: 👉 Uzito wa takribani kilo 1.3 – 1.5 ⚖️
👉 Urefu wa karibu sentimita 38–39, sawa na boga dogo 🥒🎃
Ubongo wake unakua kwa kasi ya ajabu 🧠⚡
Anaanza: 👂 Kutambua sauti zako na za watu wa karibu
🧠 Kuanza kuhifadhi kumbukumbu rahisi
🤲 Kupiga mateke yenye nguvu zaidi (ndiyo maana unashtuka mara nyingine 😄)
Mapafu yanaendelea kuiva 🫁, na mwili wake unaweka mafuta chini ya ngozi ili kumsaidia kudhibiti joto baada ya kuzaliwa 🔥❄️

Kwa upande wako mama 💚, Ni kawaida kuanza kuhisi:
😮‍💨 Kupumua kwa shida kidogo
😴 Uchovu wa haraka
🤕 Maumivu ya mgongo na mbavu
💤 Usingizi kukatika mara kwa mara

💡 Habari njema:
Kuanzia wiki hii, mtoto akizaliwa mapema bado ana nafasi nzuri sana ya kuishi kwa msaada wa kitabibu — ndiyo maana kliniki na ufuatiliaji ni muhimu zaidi sasa 💪🏽

👉 Swali la leo:
Mtoto wako anapiga mateke zaidi ukiwa umelalia ubavu gani—kushoto au kulia? 😄 Tuambie 👇🏽

Asante sana kwa kuendelea kuamini na kufuatilia AFYA ROOM 🤍
Tunaendelea kusafiri pamoja hadi mwisho wa safari hii ya uzazi 🤝

04/01/2026

🤰🏽 “DAKTARI, MIMI NINA UJAUZITO WA WIKI NGAPI?”

Hili ni moja ya mfano wa maswali maarufu sana kwenye machapisho yetu hapa Afya Room 👇🏽
“Daktari, mara ya mwisho niliona hedhi tarehe 26/05/2025, je nina ujauzito wa wiki ngapi na nitajifungua lini?

Leo nikueleze kwa lugha rahisi kabisa 👇🏽

Madaktari huhesabu ujauzito kuanzia siku ya kwanza ya hedhi ya mwisho, si siku ya kushika mimba.
👉 Tarehe hii ndiyo msingi wa:
Umri wa ujauzito (Gestational Age – GA) na Tarehe ya makadirio ya kujifungua (Estimated Due Date – EDD)

JINSI YA KUJUA UMRI WA UJAUZITO (GA) NA TAREHE YA MAKADIRIO (EDD)

Leo nikufundishe mwenyewe ujihesabie, hatua kwa hatua 💡
📌 HATUA YA 1: JUA TAREHE YA MWISHO YA HEDHI (LMP)
Hakikisha unajua siku ya kwanza ya hedhi ya mwisho.
👉 Mfano wetu: 26/05/2025
Hii ndiyo tarehe muhimu zaidi katika kuhesabu ujauzito.
📌 HATUA YA 2: FUNGUA UpToDate Pregnancy Calculator
Kwenye simu au kompyuta:
Fungua Google
Andika: “UpToDate pregnancy due date calculator”
Fungua ukurasa wa calculator ya ujauzito ya UpToDate
(Usihofu, ni rahisi kutumia hata k**a si daktari 😊)
📌 HATUA YA 3: INGIZA TAREHE YA MWISHO YA HEDHI
Ndani ya calculator:
✅ Weka tarehe ya mwisho ya hedhi
➡️ Chagua 26 / 05 / 2025
MM, ni mwezi, DD ni siku , YYYY ni mwaka.
📌 HATUA YA 4:
Baada ya kujaza hiyo tarehe, mfumo utakupa majibu haya 👇🏽
🔹 Gestational Age (GA)
→ Wiki na siku ulizonazo kulingana na tarehe ya leo
🔹 Estimated Due Date (EDD)
→ Tarehe ya makadirio ya kujifungua (takribani miezi 9 + wiki 1 kutoka LMP)

⚠️ MAMBO MUHIMU YA KUFAHAMU
EDD ni makadirio, si lazima ujifungue siku hiyo
Kujifungua kati ya wiki 37–42 ni kawaida
Ultrasound ya mapema (wiki 6–12) ni sahihi zaidi kuthibitisha GA

💡 USHAURI WANGU , DAKTARI WAKO WA AFYA ROOM
Kujua GA na EDD:
✅ Hukusaidia kufuatilia ukuaji wa mtoto
✅ Husaidia kupanga kliniki na vipimo
✅ Hupunguza hofu kwa mama mjamzito

👉 Swali la leo:
Je, tayari umeshawahi kujaribu kuhesabu ujauzito wako mwenyewe? Ilikuwaje? Tuambie kwenye comments 👇🏽

Asante sana kwa kuendelea kujifunza nasi 🤍
Usisahau kufollow AFYA ROOM kwa elimu sahihi ya ujauzito na uzazi.

04/01/2026

“ALIFUNGUA MLANGO AKIWA AMEBEBA MTOTO, LAKINI MACHO YAKE HAYAKUWA YA MAMA…”
Basi bwana, ilikuwa ni siku chache tu baada ya kujifungua, Mama X alikuja hospitali Y akiwa amembeba mtoto wake mchanga.
Kwa nje, ungeweza kudhani ni furaha ya uzazi k**a ilivyo kwa mama wengine. Lakini nilipomtazama usoni…kuna kitu kilikuwa hakiko sawa.
Alikuwa anatabasamu, kisha ghafla analia.
Anazungumza, halafu anakaa kimya akitazama ukuta.
Nikamuuliza, “Mama unaendeleaje?”
Akanijibu kwa sauti ya chini, “Daktari… nahisi k**a mimi si mimi tena.”
Hapo nikajua, hii si uchovu wa kawaida wa kujifungua.
Hii ilikuwa safari ya akili ya mama baada ya kujifungua — ukichaa baada ya kujifungua (postpartum mental illness).

Kwa uzoefu wetu kitabibu, hali hii hujitokeza kwa ngazi tofauti:
🌧️ Hatua ya kwanza – Machozi ya uzazi (Postpartum Blues)
Nilimuuliza, alianza lini kujisikia hivi. Akasema, “Tangu siku chache baada ya kujifungua, nalia bila sababu.”
Hii hutokea kwa mama wengi. Machozi, huzuni ya ghafla, hisia za kuchanganyikiwa — lakini huwa ni ya muda mfupi, mara nyingi chini ya wiki moja.

🌑 Hatua ya pili – Sonona baada ya kujifungua (Postpartum Depression)
Kwa Mama X, dalili hazikuishia hapo.
Alianza kujiona hana thamani, anaogopa kumbeba mtoto, anajilaumu kila kitu.
Hii ni sonona ya uzazi — huzuni ya muda mrefu, hofu, mawazo mazito yanayodumu zaidi ya wiki.

⚠️ Hatua ya tatu – Ukichaa baada ya kujifungua (Postpartum Psychosis)
Ndipo aliponiambia kwa sauti ya kuogofya,
“Daktari… kuna sauti zinaniambia nimdhuru mtoto.”
Hapa ndipo tunapokutana na hali hatari zaidi.
Mama anaweza kusikia sauti, kuona vitu ambavyo wengine hawaoni, kubadilika tabia, na kupata mawazo ya kujiumiza au kumdhuru mtoto. Hii si dharau, si uchawi — ni ugonjwa wa akili unaohitaji matibabu ya haraka.

Nilichukua hatua muhimu mara moja.
👉 Kwanza, kumtenga mama na mtoto kwa usalama
👉 Kisha kuanza matibabu ya kisaikolojia na dawa chini ya uangalizi
Niliwaambia familia yake:
“Hii hali inatibika. Mama atarudi kuwa yule yule.”

Na kweli, baada ya matibabu sahihi, Mama X alirejea katika hali yake ya kawaida. Leo anaendelea kulea mtoto wake kwa upendo na furaha.

💡 FUNZO MUHIMU:
Ukichaa au sonona baada ya kujifungua si udhaifu wa mwanamke. Ni ugonjwa wa kitabibu unaochangiwa na:
1.Msongo wa mawazo
2.Kukataliwa kwa ujauzito
3.Changamoto za kiuchumi
4.Historia ya magonjwa ya akili

📌 Tafadhali:
Ukiona mama mpya anabadilika tabia, anajitenga, analia sana au anaongea mambo yasiyo ya kawaida — msimuache peke yake. Msaidieni apate matibabu.

Asante kwa kunisoma hadi mwisho 🤍
Usiache kufollow ukurasa wetu wa AFYA ROOM kwa elimu ya afya ya akili, uzazi na maisha.
—
Dr. Hilary Emmanuel

02/01/2026

🌸 WIKI YA 28 YA UJAUZITO: MTOTO WAKO SASA NI MGENI MKUBWA TUMBONI 🌸
Wiki ya 28 imefika! 🎉
Hapa ndipo rasmi unaingia trimester ya tatu—safari ya mwisho kuelekea kukutana uso kwa uso na zawadi yako 💝
Ndani ya tumbo lako, mtoto wako sasa anaendelea kukua kwa kasi ya kushangaza 🤯
👉 Uzito wake ni takribani kilo 1 – 1.2
👉 Urefu wake ni karibu sentimita 37, sawa na tikitimaji dogo au bilinganya kubwa 🍆🍉
Ubongo wa mtoto unaanza kufanya kazi kwa umakini zaidi 🧠✨
Anaweza:
👂 Kusikia sauti zako vizuri
👀 Kufungua na kufumba macho
🤲 Kupiga mateke yenye nguvu zaidi (ndiyo maana unasikia “ngumi” tumboni 😄)

Mapafu yake yanaendelea kuiva polepole 🫁, na mwili unaanza kuhifadhi mafuta kidogo kidogo ili kumsaidia kudhibiti joto baada ya kuzaliwa.

Kwa upande wako mama 🤍
Ni kawaida kuanza:
😴 Kuchoka haraka
😮‍💨 Kupumua kwa shida kidogo
🤕 Kuhisi maumivu ya mgongo na nyonga
🚽 Kwenda haja ndogo mara kwa mara

Huu ni wakati mzuri sana wa:
✅ Kufuatilia kliniki kwa karibu
✅ Kuanza maandalizi ya kujifungua
✅ Kula lishe bora na kunywa maji ya kutosha
✅ Kupumzika bila kujilaumu

📌 Kumbuka: kuanzia wiki hii, mtoto akizaliwa mapema bado ana nafasi nzuri ya kuishi kwa msaada wa kitabibu, ndiyo maana ufuatiliaji ni muhimu sana 💪🏽

👉 Swali la leo:
Unahisi mtoto wako anapiga mateke zaidi wakati gani—asubuhi 🌅 au usiku 🌙? Tuambie kwenye comments 👇

Asante sana kwa kuendelea kuwa sehemu ya familia ya Afya Room 💚
Tunaendelea kusafiri pamoja wiki hadi wiki 🤝

30/12/2025

“DOKTA, NAWASHWA SANA… NAISHI NA FANGASI K**A RAFIKI YANGU” 😅🤰🏽

Basi bwana, leo nikiwa zamu yangu ya kawaida Hospitali Y, akaingia mama mjamzito —, ujauzito wa miezi sita kasoro. Uso wake unaonyesha wazi hana amani.

👉 “Dakta, nahisi aibu kusema… lakini nawashwa sana ukeni. Hii hali imenitesa wiki nyingi, natibiwa, inapotea, halafu inarudi tena,” akaniambia kwa sauti ya chini.

Nikamtazama, nikatabasamu kidogo (ile tabasamu ya kumpa moyo mgonjwa 😄), nikamwambia: 👉 “Mama, tulia… hauko peke yako. Hili ni tatizo linalowasumbua sana wajawazito.”

"Wakati wa ujauzito, mwili wa mwanamke hubadilika sana. Homoni huongezeka kwa kiwango kikubwa, Sukari mwilini huongezeka, Kinga ya mwili hushuka kidogo"

"Mazingira haya yote 👉 yanawapa fangasi nafasi ya kustawi ukeni.Ndiyo maana wajawazito wengi huwa wahanga wa fangasi za ukeni mara kwa mara, hata k**a wanajitunza"

"Dalili zake: 1. Kuwashwa 2. Uchafu mweupe k**a mtindi 3. Harufu isiyo kali sana 4.Maumivu wakati wa tendo au kukojoa"

“Hii hali inaweza kutibika kabisa, ila muhimu ni tiba sahihi, muda sahihi, na kujitunza.”

🩺 Nikamueleza, " Usijitibu bila vipimo, Epuka kutumia dawa holela, Epuka sabuni kali ukeni, Vāa nguo za ndani za pamba, Punguza sukari kupita kiasi, Maliza dozi k**a ulivyoelekezwa"

Alipoelewa, uso wake ukabadilika.
“Dakta, nilidhani ni mimi peke yangu… sasa nimepata amani.”

Nikamtazama nikamwambia, “Ujauzito una hadithi nyingi, hii ni mojawapo. Muhimu ni kuuliza na kupata ushauri sahihi.” 😊

💬 SWALI KWAKO MAMA / DADA
Je, umewahi kusumbuliwa na fangasi wakati wa ujauzito?
Ulipataje msaada, au bado unapambana nao kimya kimya?
👇 Tuambie kwenye maoni, au uliza swali lako.
🙏 Asanteni sana kwa kuendelea kuamini Afya Room.
📌 Elimu sahihi, kwa mama salama na kizazi chenye afya.

29/12/2025

🌸 WIKI YA 27 YA UJAUZITO: MTOTO WAKO SASA ANA UZITO, UHAI NA MWENDO WAKE MAALUMU 🌸
Ndani ya wiki ya 27 ya ujauzito, mambo yanakuwa halisi zaidi tumboni 🤍.
Mtoto wako sasa ana uzito wa takribani 900 gramu hadi kilo 1, na urefu wa karibu sentimita 36–38, sawa na kichwa cha cauliflower au kabichi dogo 🥦.
Ngozi ya mtoto inaanza kuonekana laini zaidi, kwani mafuta ya mwili yanaanza kujikusanya polepole 🧈. Mapafu yake bado yanaendelea kukomaa, lakini tayari yanaanza kufanya mazoezi ya kupumua kwa kutumia maji ya uzazi 🌬️. Ndiyo maana unaweza kuhisi mtoto anahiccup (anacheua-cheua) mara kwa mara — ishara nzuri ya ukuaji wa mfumo wa hewa.

Ubongo wa mtoto unakua kwa kasi kubwa 🧠, mishipa ya fahamu inazidi kuunganishwa, na hisia k**a kusikia sauti, mwanga na hata mguso zinaimarika zaidi. Ndiyo maana mtoto anaweza kush*tuka ukicheka sana, ukipiga kelele au kusikia muziki 🎶.

Kwa mama, tumbo linaonekana wazi zaidi 🤰, pumzi inaweza kupungua kidogo, usingizi kubadilika na miguu kuanza kuvimba kwa baadhi ya wajawazito. Haya yote ni mabadiliko ya kawaida, lakini dalili kali au zisizo za kawaida zisipuuzwe — wahi kituo cha afya mapema 🏥.

📌 Kumbuka:
Lishe bora, maji ya kutosha, mapumziko na clinic za mara kwa mara ndizo silaha zako kuu kipindi hiki 💪🥗💧.

👉 Swali kwako mama:
Je tayari unahisi mtoto wako ana ratiba yake ya kupiga mateke? Asubuhi, mchana au usiku? Tuambie kwenye maoni 💬

Asante sana kwa kuendelea kuwa nasi kwenye safari hii ya uzazi 🤍

Endelea kufuatilia Afya Room kwa elimu sahihi, ya kitaalamu na yenye kugusa maisha ya kila siku.

25/12/2025

🎄🍗 “SIKUKUU SIO RUHUSA YA KUMSAHAU MTOTO TUMBONI!”

🍾❌ POMBE KWAKO, HATARI KWA MTOTO | 🥗✅ CHAKULA BORA, ZAWADI YA UHAI

Sikukuu zimefika 🎉🎄
Meza zimejaa 🍗🥩🍰
Vinywaji vinapita kila kona 🍾🥂
Lakini kumbuka 👉 wewe si peke yako, unaishi kwa ajili ya wawili 🤰🏽💕

🍷 Pombe wakati wa ujauzito haina kiwango salama
— Pombe hupita moja kwa moja kwenda kwa mtoto kupitia kondo la nyuma
— Inaweza kuathiri ubongo, ukuaji na akili ya mtoto
— Inaongeza hatari ya mtoto kuzaliwa na matatizo ya kudumu wakati wote wa maisha

🥗 Lishe bora = kinga ya mtoto
— Kula vyakula vyenye protini, mboga za majani, matunda na nafaka
— Epuka kula kupita kiasi “kwa sababu ni sikukuu” 😅
— Kumbuka: uzito mkubwa kupita kiasi pia ni hatari

👉 Mtoto tumboni haendi kwenye sherehe,
👉 Hanywi pombe,
👉 Lakini anapata kila kitu unachokunywa na kula 😌

🧠 KUMBUKA HII:
✔️ Sikukuu ni za siku chache
✔️ Madhara ya pombe kwa mtoto ni ya maisha yote
✔️ Afya yako leo = maisha bora ya mtoto kesho

💬 Wewe mjamzito, umepanga vipi kula na kunywa sikukuu hii?

👭 Mtag mama mwingine mjamzito umsadie asipotee kwenye sherehe

👍 Like | 💬 Comment | 🔁 Share
Asante sana kwa kuendelea kuwa sehemu ya familia ya Afya Room 💚

Tunawajali mama na vizazi vijavyo 🤍

AFYA ROOM

23/01/2026

17/01/2026

14/01/2026

12/01/2026

11/01/2026

05/01/2026

04/01/2026

04/01/2026

02/01/2026

30/12/2025

29/12/2025

25/12/2025

Address

Website

Alerts

Contact The Practice

Shortcuts

Share

Category