07/30/2025
موضوع اول مرة هاتكلم عليه بس اكتر حاجة ربنا كرمني بيها لسنين و سنين اني رعيت ضميري في اي شركة دخلت بابها سواء كمتدرب او موظف لأنهم ببساطة فتحوا بيتي و أكلت و شربت من مرتبهم و اتعلمت من تدريبهم و فضلت احس بفضلهم عليا طول السنين في كل خطوة أخدتها في حياتي لحد الوقتي. آخر شركة اشتغلت فيها و ده كان من ٢٥ سنة و اكتر قعدت فيها ٥ سنين كانت فيها مشاكل كتيرة و مرت علينا ايام صعبة و كان في أوقات بنقبض مرتبنا متاخر شهر و مرة قبضنا جزء من مرتبنا منتجات من الشركة لكن كل ده عمره ما يضيع حق الشركة علينا اننا عشنا من خيرها و فتحت بيوتنا و استعملنا فيها تعليم يساوي ملايين و أهلتنا علشان نكون رجالة و ناخد فرص افضل في المستقبل. فاكر مرة ان صاحب الشركة كان راجل مرموق في عالم البيزنس و المرة الوحيدة اللي شوفته فيها كنت قاعد مع مديرين في المكتب و دخل علينا و قالي أنا و مجموعة معانا لو سمحت اطلعوا بره 🙄 و ده كان اول و آخر مرة أشوفه بس دايما فاكره بالخير و بادعيله انه اجتهد و اشتغل و حارب طواحين الهوا علشان يعين موظفين و كان منهم انا علشان ربنا يرزقني برزقه.
لما قررت امشي من الشركة مشيت علشان افتح ستارت اب و كنت فعلا زعلان رغم اني مشيت و الشركة في اسوء حالتها بس قررت اني عمري ما افكر اضرب الشركة في ضهرها في ايام ضعفها و لا افتح بيزنس منافس لها باستخدام العلم اللي اتعلمته عندهم و اللي باعتبره ملك ليهم مش ملكي و مش من حقي استعمله.
بعد سنين اتحطيت في نفس الموقف و كنت دايما فاكر اني لازم اجتهد علشان اساهم في فتح بيوت ناس زي ما استاذ رامي لكح "رب العمل" عمل كده من ٢٥ سنة. ❤️
نصيحتي للشباب :
لو اشتغلت في شركة و مش عاجباك و انت شايف ان مستواك يأهلك لشركة افضل سيبهم بكل احترام و افضل دايما فاكر انهم فتحوا بيتك صدقني هاتلاقي ربنا فتحلك أبواب عمرك ما تتخيلها و يمكن في يوم من الأيام تحتاج لهم.
شورة في بلاد المعمورة
