11/05/2025
"يا رب، إنت شايف، وإنت اللي بتعوض"
عشر دقايق في الميكروباص، اتعلمت فيهم اللي ماعرفتوش في 20 سنة تعليم!
الست كانت بتضحك، والدموع في عينيها..
الساعة كانت 7 الصبح، والدنيا ضباب، والميكروباص واقف في نص الطريق بيزمر ومفيش مكان فاضي، ركبت وأنا زهقان من الزحمة كالعادة، وقعدت في الكرسي التالت..
وفي أول كرسي لفت انتباهي كانت قاعدة ست كبيرة بسيطة جدًا، لابسة جاكت قديم، وإيدها ماسكة شنطة بلاستيك فيها ورق؛ الست دي كانت بتضحك ضحكة غريبة، فيها دموع، فيها وجع، فيها فرح في نفس اللحظة.
الناس بدأت تبصلها بنظرات استغراب..
واحد قال بصوت واطي: "شكلها مجنونة"
والتاني ضحك وقال: "يا عم شوفلك عربية تانية قبل ما تعمل مصيبة"
بس السواق، راجل كبير في السن، بص لهم وقال بهدوء "سيبوها شكلها فرحانة بحاجة"
الست كانت بتكلم نفسها، بتقول بصوت خافت: "يا رب زي ما فرّحتني النهاردة، فرّح كل أم في الدنيا"
الموضوع شدني وقمت قعدت جنبها، اديتها منديل وقولتلها: "أنتي كويسة يا أمي؟"
بصّتلي وابتسمت وقالت: "أنا كويسة يابني، بس قلبي مش مصدق اللي حصل"
سكتّ شوية وقلتلها: "خير يا رب؟"
قالت لي بصوت مليان فرحة ودموع: "ابني.. ابني اتعيّن النهاردة"
ابتسمت من قلبي وقلتلها: "ما شاء الله، ألف مبروك!"
قالت وهي بتبص في شنطتها: "عارف اتعيّن فين؟ في الشركة اللي كنت بخدم فيها 15 سنة"
اتصدمت شوية ولساني اتشل، الكلمة دي لوحدها وقفتلي الكلام..
بدأت تحكي بالتفاصيل وهي عينيها مغرقة دموع: "كنت بدخل هناك كل يوم الصبح قبل الكل، أفتح الشبابيك، أمسح المكاتب، أحضر الشاي، وأروّق الحمّامات، كنت بشوف الموظفين بالبدل ونظافتهم وأقول لنفسي: يا رب ابني يبقى كده في يوم"
خدت نفس طويل وكملت: "في يوم كنت بنضف مكتب المدير، وسمعته بيزعق في حد بيقوله (أنا مش فاضي أسمع شكاوى الخدامة دي تاني)"
ساعتها نزلت دموعي على الأرض وأنا بمسحها، بس كنت دايمًا أقول: "يا رب، إنت شايف، وإنت اللي بتعوض"
الناس كلها سكتت، حتى السواق كان بيبص في المراية ودموعه في عينه..
قالت وهي بتضحك وبتمسح دموعها:
"بس ابني النهاردة رايح نفس الشركة، بنفس البوابة اللي كنت بدخل منها خدامة، داخل موظف كبير، ببدلة، وشهادة، واحترام"..
النهاردة نفس المدير بنفسه قاله: (إحنا فخورين بيك يا أستاذ أمجد)
وأنا كنت واقفة برا المكتب ببص عليه ومش مصدقة..
سكتت ثواني وقالت وهي بتضحك بدموع: "أنا بضحك عشان ربنا ما نسينيش، وبعيّط عشان فاكرة كل لحظة وجع، وكل صلاه كنت بصلى فيها واقوله يارب عوضنى تعبى فى ابنى ويشتغل فى الشركه دى ويبقى موظف كبير هنا وربنا حقق احلامى باللي حصل النهاردة"
الناس في العربية كلها بقت ساكتة، واحد في الكرسي الوراني قال بصوت متأثر: "ربنا يكرمك ياست الكل"
والسواق قال: "اللي عند ربنا ما بيروحش"
أما أنا فنزلت من الميكروباص ودموعي نازلة وأنا مش حاسس، وحسّيت إن الست دي مش مجرد راكبة، دي كانت رسالة من ربنا لكل واحد تعب ولسه مستني العوض..
مفيش وجع بيروح عند ربنا، العوض ممكن يتأخر، بس لما ييجي، بييجي على شكل فرحة تمسح كل سنين التعب..
ع+
"اِفْرَحُوا فِي الرَّبِّ كُلَّ حِينٍ، وَأَقُولُ أَيْضًا: افْرَحُوا."
(في 4: 4).
