22/11/2025
Ka vende që na rikthejnë tek vetja – tek fillimet, tek pasioni, tek arsyeja pse zgjodhëm këtë rrugë.
Për mua, Kroacia 🇭🇷 është pikërisht ai vend.
Çdo rikthim këtu, nuk është thjesht pjesëmarrje profesionale, por një udhëtim i thellë emocional drejt rrënjëve të karrierës sime, drejt njerëzve që më kanë formësuar dhe frymëzuar që të jem aty ku jam sot.
Pjesëmarrja tashmë tradicionale si anëtare e Bordit Organizativ në Kongresin Vjetor të Shoqatës Internacionale Interdisciplinare për Sëmundje Kronike në Kroaci mbetet gjithmonë një privilegj dhe emocion i veçantë për mua.
Pavarësisht ftesave të shumta si folëse në konferenca e kongrese anembanë botës për të ndarë dijen dhe përvojën time, ftesa në Kroaci – vendi ku kam marrë hapat e mi të parë në Endokrinologji dhe Diabetologji, dhe ku kam fituar titullin Doktor Shkence – më sjell një gëzim të veçantë dhe shumë personal.
Takimi të paktën një herë në vit me mentorën time të nderuar, Prof. Ivana Pavlić-Renar, me mikën dhe udhëheqësen e shoqatës, Prof. Marija Vrca Botica, si dhe Profesor Emeritus, ish Rektorin Damir Boras, është kthyer në një frymëzim të përvitshëm që më motivon të vazhdoj me aktivitetet e mia shkencore gjatë gjithë vitit.
“Qershia mbi tortë” këtë vit ishte pjesëmarrja aktive me prezantime e gjashtë yjeve të rinj kosovarë në sesionin e hulumtuesve të rinj të Kongresit.
Krenare pafund me ju: Alberta, Ariola, Albion, Burim, Edona, Endrit!
Ju jeni dëshmia më e bukur që dëshira, puna dhe talenti sjellin rezultate të jashtëzakonshme. 🌟🇽🇰
🇽🇰 💙 ♥️
