Laboratori mjekësor - Dialab

27/02/2026

KONKURS PUNE – Laborant mjekësor

Laboratori ynë është në kërkim të një laboranti/laborante të motivuar dhe të përgjegjshëm për t’iu bashkuar ekipit tonë profesional.

Përshkrimi i punës:
Kandidati/ja do të angazhohet kryesisht në pranimin, përpunimin dhe menaxhimin e mostrave të mikrobiologjisë si dhe në mbështetjen e proceseve laboratorike sipas protokoleve dhe standardeve profesionale.

Kriteret kryesore:

* Diplomë në Laborator mjekësor / Teknik laborant
* Licencë valide nga Ministria e Shëndetësisë
* Përaparësi kanë kandidatët me përvojë pune në laborator (preferohet në mikrobiologji)
* Aftësi për punë në ekip dhe përgjegjësi profesionale
* Kujdes dhe saktësi gjatë punës me mostra biologjike

📅 Afati i aplikimit: 15.03.2026

📧 Të interesuarit mund të dërgojnë CV-në e tyre në: dialab.ks@gmail.com, të na kontaktojnë në: 044 88 00 11 ose të paraqiten fizikisht në objektin e laboratorit.

Laboratori ynë ka mbi 20 vite përvojë në diagnostikë laboratorike dhe është ndër laboratorët më të mëdhenj në Kosovë. Kandidatët e përzgjedhur do të kenë mundësinë të punojnë me teknologji moderne laboratorike dhe të përfitojnë nga përvoja e ekipit tonë në zhvillimin e tyre profesional.

31/10/2025

Çfarë është testi S-100 Protein?

Testi S-100 Protein është një analizë laboratorike që mat nivelin e proteinës S-100 në gjak. Kjo proteinë gjendet kryesisht në qelizat e trurit (neuronet dhe qelizat gliale) dhe në qelizat e lëkurës që prodhojnë pigmentin (melanocitet). S-100 është një biomarker i rëndësishëm që ndihmon mjekët në diagnostikimin dhe monitorimin e disa gjendjeve serioze shëndetësore.

Përdorimet kryesore të testit:

Në neurologji, S-100 përdoret për të vlerësuar dëmtimet e trurit pas trauma kraniale, goditje në tru (insult) ose operacioneve neurokirurgjikale. Nivelet e proteinës tregojnë dëmtimin e qelizave nervore dhe ndihmojnë mjekët të ndjekin progresin e rikuperimit.

Në onkologji, veçanërisht për pacientët me melanomë, S-100 përdoret për të monitoruar përhapjen e mundshme të kancerit (metastazat), për të vlerësuar efektivitetin e trajtimit dhe për të sinjalizuar rikthimin e sëmundjes para se të shfaqen simptomat klinike.

Kur është e nevojshme testi:

Kur mjeku ka nevojë të ndjekë pacientët me melanomë për rikthim ose përparim të sëmundjes.

Kur kërkohet vlerësimi i dëmtimeve cerebrale pas traumave, insulteve ose operacioneve.

Si pjesë e një paneli analizash për të bërë diagnoza diferenciale në rastet e ndryshimeve patologjike apo dëmtimeve qelizore.

Përfitimet për mjekët dhe pacientët:

Ndihmon mjekun të marrë vendime më të sakta për trajtimin dhe monitorimin e pacientit.

Ofron informacion shtesë për prognozën e pacientit, sidomos në rastet e melanomës dhe dëmtimeve neurologjike.

Lejon identifikimin e ndryshimeve të hershme në gjendjen e pacientit, duke ndihmuar në ndërhyrje më të shpejtë dhe efektive.

Testi S-100 Protein është një analizë e rëndësishme laboratorike që, së bashku me ekzaminime dhe analiza të tjera, ndihmon mjekët të marrin një pamje të plotë të gjendjes shëndetësore të pacientit dhe të ofrojnë trajtim të përshtatshëm dhe të sigurt.

31/10/2025

Çfarë është testi MxA/CRP?

Testi MxA/CRP është një analizë moderne laboratorike që ndihmon në dallimin midis infeksioneve virale dhe atij bakteriale – gjë që shpesh është e vështirë vetëm me simptomat klinike.

Proteina MxA (Myxovirus resistance protein A) është një tregues specifik që rritet në rastet e infeksioneve virale.

Proteina C-reaktive (CRP), përkundrazi, rritet kryesisht në infeksione bakteriale ose në procese inflamatore të rënda.

Kombinimi i këtyre dy treguesve në një test të vetëm lejon që mjeku të:

-dallojë më saktë nëse një pacient ka infeksion viral apo bakterial,
-shmangë përdorimin e panevojshëm të antibiotikëve,
-vendosë trajtimin më të përshtatshëm dhe efektiv për pacientin.

Ky test rekomandohet veçanërisht për pacientë me temperaturë, simptoma respiratore, ose infeksione të paqarta, kur është e rëndësishme të përcaktohet shkaku i sëmundjes.

Në laboratorin tonë, testi MxA/CRP kryhet brenda ditës.

23/08/2025

Pas transplantit të një organi – si veshka, mëlçia, zemra apo mushkëritë, trupi mund të reagojë ndaj organit të ri duke e refuzuar atë. Për të parandaluar këtë, pacientët marrin ilaçe imunosupresive, si Tacrolimusi, të cilat dobësojnë sistemin imunitar për të mbrojtur organin e transplantuar.

Tacrolimusi është shumë efektiv, por ka një kufi shumë të ngushtë mes dozës që ndihmon dhe asaj që dëmton, prandaj është e domosdoshme të matet rregullisht në gjak.

● Matja e Tacrolimusit:
● Parandalon refuzimin e organit të transplantuar.
● Ndihmon në shmangien e efekteve anësore të rënda si dëmtimi i veshkave, mëlçisë apo presioni i lartë.
● Lejon mjekun të përshtatë dozën sipas nevojave të pacientit, në mënyrë të sigurt dhe të kontrolluar.

Në laboratorin tonë kryhet analiza e Tacrolimusit brenda ditës me pajisjet më moderne laboratorike dhe sipas protokoleve europiane.

17/07/2025

22/05/2025

Testimi mikrobiologjik për Neisseria gonorrhoeae – Gonorrea

Çfarë është Neisseria gonorrhoeae?

Neisseria gonorrhoeae është një bakter i cili infekton kryesisht mukozën e organeve gjenitale, rektumit dhe fytit.

Pse është i rëndësishëm testimi?
• Për të konfirmuar diagnozën në persona me simptoma
• Për të parandaluar komplikimet si infertiliteti, sëmundjet inflamatore pelvike (PID), apo përhapja sistemike e infeksionit
• Për të kontrolluar përhapjen tek partnerët seksualë
• Për të ndjekur trajtimin adekuat me antibiotikë, sidomos për shkak të rezistencës në rritje ndaj barnave.

Identifikimi bëhet me metoda të standardizuara mikrobiologjike.

Si kryhet testi?
Testimi realizohet përmes marrjes së një strishoje nga uretra (tek meshkujt), cerviksi apo va**na (tek femrat), ose nga fyti apo rektumi, varësisht nga ekspozimi.

30/04/2025

Sot nderojmë kontributin e çdo punonjësi që me mundin dhe përkushtimin e tij mban në këmbë shoqërinë tonë.

1 Maji është një ditë e rëndësishme që na kujton betejat historike për të drejtat e punëtorëve – për kushte dhe të drejta pune, orar të kufizuar dhe dinjitet në punë.

Për nder të kësaj dite të shënuar i'u njoftojmë se më 1 Maj (E enjte) nuk do të punojmë.

24/04/2025

🦠 Çfarë është Mycoplasma pneumoniae?
Mycoplasma pneumoniae është një bakter i veçantë që shkakton infeksione të rrugëve të frymëmarrjes, më së shpeshti një pneumoni atipike – që shpesh ka simptoma më të lehta sesa format tradicionale të pneumonisë, por mund të zgjasë më shumë dhe të shkaktojë komplikime.

📌 A është ngjitës? Si përhapet?
Po, është një infeksion ngjitës që përhapet përmes pikëzave të ajrit, kur një person i infektuar kollitet, teshtin apo flet. Përhapja është e ngadaltë por e vazhdueshme – shpesh shfaqet në ambiente të mbyllura si shkolla, zyra, apo familje.

📍 Si ndodh infeksioni?
Pas ekspozimit, bakteria përhapet në rrugët e sipërme dhe të poshtme të frymëmarrjes, duke shkaktuar:
- Kolla e thatë dhe e zgjatur
- Temperaturë
- Dhimbje fyti
- Lodhje dhe dhimbje muskujsh
- Ngërç në gjoks dhe vështirësi në frymëmarrje

Cilat janë pasojat e mundshme?
Infeksioni zakonisht është i lehtë, por në disa raste mund të çojë në:
- Pneumoni më të rëndë
- Otit (infeksion i vesh*t)
- Sinusit
- Komplikime neurologjike apo kardiake, veçanërisht tek fëmijët dhe të moshuarit

🧪 Pse është i rëndësishëm testimi laboratorik për IgG dhe IgM?
Testet serologjike (IgG dhe IgM) ndihmojnë në:
- Konfirmimin e infeksionit aktiv (IgM)
- Zbulimin e kontakteve të mëparshme me bakterin (IgG)
- Ndihmojnë mjekun në përcaktimin e nevojës për trajtim me antibiotik
- Janë të rëndësishme kur simptomat janë të paqarta apo kur radiografia e mushkërive nuk jep përgjigje të plotë.

27/03/2025

🧪 Testi Cytomegalovirus IgG AVIDITY – Zbuloni nëse infeksioni është i ri apo i vjetër!

Çfarë është testi Cytomegalovirus IgG Avidity?
Ky test ndihmon në dallimin midis një infeksioni të vjetër dhe një infeksioni të freskët me Citomegalovirus (CMV).

Çfarë është Cytomegalovirus (CMV)?
CMV është një virus i zakonshëm që shumica e njerëzve e kalojnë pa simptoma, por mund të jetë i rrezikshëm për gratë shtatzëna dhe individët me imunitet të dobësuar.

- Dallimi mes testit të zakonshëm CMV IgG dhe testit CMV IgG Avidity:
✔ CMV IgG – Tregon nëse keni pasur infeksion në të kaluarën, por nuk përcakton kohën e saktë të infeksionit.
✔ CMV IgG Avidity – Përcakton nëse infeksioni është i freskët (i kohëve të fundit) apo i vjetër (i kaluar prej më shumë se 3-4 muajsh).

- Pse është i rëndësishëm ky test?
✔ Gratë shtatzëna – Nëse një infeksion i ri ndodh gjatë shtatzënisë, ekziston rreziku i transmetimit tek foshnja. Ky test ndihmon për të dalluar nëse infeksioni është i vjetër dhe nuk paraqet rrezik.
✔ Personat me imunitet të dobësuar – Ndihmon mjekun të vlerësojë nëse virusi po aktivizohet përsëri.
✔ Pacientët me infeksione virale të paqarta – Ndihmon në diagnozën diferenciale për të kuptuar shkakun e simptomave.

🔬 Rezultatet dhe interpretimi:
📌 Aviditet i ulët → Infeksion i freskët (brenda 3-4 muajve të fundit)
📌 Aviditet i lartë → Infeksion i vjetër (më shumë se 3-4 muaj më parë)

📍 Laboratori ynë ofron gjithnjë testet më të reja dhe specifike në diagnostikën laboratorike.
📞 Na kontaktoni për më shumë informacion.

08/03/2025

LIPIDOGRAMI – NJË HAP I RËNDËSISHËM PËR SHËNDETIN E ZEMRËS

Lipidogrami është një analizë e rëndësishme laboratorike që mat nivelet e yndyrnave në gjak dhe ndihmon në vlerësimin e rrezikut për sëmundjet kardiovaskulare. Kjo analizë përfshin:

🔹 Kolesteroli total – Një substancë e nevojshme për trupin, por nivelet e larta mund të shkaktojnë grumbullime në enët e gjakut.
🔹 HDL-Kolesteroli ("i mirë") – Ndihmon në pastrimin e yndyrnave nga gjaku dhe mbron kundër sëmundjeve të zemrës.
🔹 LDL-Kolesteroli ("i keq") – Nivelet e larta mund të çojnë në bllokimin e arterieve dhe rritjen e rrezikut për atak në zemër ose ishemi.
🔹 Trigliceridet – Lloji kryesor i yndyrnave në trup, të cilat në nivele të larta lidhen me diabetin dhe sëmundjet e zemrës.
🔹 Indeksi aterosklerotik – Një tregues i raportit mes HDL dhe LDL, që ndihmon në parashikimin e rrezikut për aterosklerozë.
🔹 Faktori i rrezikut – Një tregues që kombinon disa parametra për të llogaritur rrezikun e përgjithshëm të sëmundjeve kardiovaskulare.

❗ Pse është e rëndësishme të bëni lipidogramën?

✅ Zbulon rreziqet për sëmundjet e zemrës dhe enëve të gjakut në faza të hershme.
✅ Ndihmon në përcaktimin e masave për parandalimin dhe trajtimin e problemeve kardiovaskulare.
✅ Kontrolli i rregullt ndihmon në menaxhimin e kolesterolit dhe yndyrnave në trup për një jetë më të shëndetshme.

📝 Si të mbani në kontroll nivelet e yndyrnave në gjak?

🥗 Ushqehuni shëndetshëm – Konsumoni më shumë fibra, fruta, perime dhe yndyra të shëndetshme si vaji i ullirit dhe peshku.
🚫 Reduktoni sheqernat dhe yndyrnat e ngopura – Kufizoni ushqimet e përpunuara dhe yndyrat trans.
🏃‍♂️ Bëni aktivitet fizik – Ecja, vrapimi dhe ushtrimet aerobike ndihmojnë në përmirësimin e profilit lipidik.
⚖️ Kontrolloni peshën trupore – Mbajtja e një peshe të shëndetshme ul rrezikun e sëmundjeve të zemrës.

📅 Kryeni kontrolle të rregullta – Lipidograma duhet të bëhet të paktën një herë në vit ose sipas rekomandimit të mjekut.

29/01/2025

Analiza e D-Dimer gjatë shtatzënisë: Çfarë duhet të dimë?

Shtatzënia është një periudhë e veçantë dhe e ndryshueshme për çdo grua, gjatë së cilës organizmi pëson shumë transformime fizike dhe hormonale. Një nga analizat që mund të kërkohet nga mjeku juaj për të monitoruar shëndetin tuaj është **analiza e D-Dimer**. Por çfarë është saktësisht D-Dimer, pse është e rëndësishme, dhe si ndryshojnë vlerat referente gjatë trimestrave të shtatzënisë?

Çfarë është D-Dimer?
D-Dimer është një fragment i vogël proteine që prodhohet kur një trombozë shpërbëhet në trup. Ky tregues përdoret për të vlerësuar praninë e trombozës venoze ose çrregullimeve të tjera të koagulimit të gjakut. Në përgjithësi, një nivel i lartë i D-Dimer mund të tregojë një rrezik të shtuar për formimin e trombozës.

Pse bëhet kjo analizë gjatë shtatzënisë?
Gjatë shtatzënisë, rreziku i trombozës venoze rritet ndjeshëm për shkak të ndryshimeve në hormonet dhe qarkullimin e gjakut. Organizmi i një gruaje shtatzënë prodhon më shumë proteina të koagulimit për të ndihmuar në ndalimin e gjakderdhjes gjatë lindjes. Kjo mund të çojë në nivele më të larta të D-Dimer edhe nëse nuk ka trombozë. Prandaj, analiza e D-Dimer është një mjet i rëndësishëm për të vlerësuar rrezikun e trombozës, veçanërisht nëse ka shenja dyshimi.

Ndryshimet e vlerave referente të D-Dimer gjatë trimestrave
Nivelet e D-Dimer ndryshojnë gjatë shtatzënisë, dhe këto ndryshime janë të pritshme për shkak të transformimeve në trup. Këtu është një përmbledhje e pritshme e vlerave referente gjatë trimestrave:

1. Trimestri i parë :
Nivelet e D-Dimer zakonisht mbeten afër vlerave normale të një gruaje jo shtatzënë (zakonisht nën 500 ng/mL). Megjithatë, disa studime tregojnë një rritje të lehtë që mund të fillojë tashmë në këtë fazë.

2. Trimestri i dytë:
Nivelet e D-Dimer fillojnë të rriten ndjeshëm. Vlerat mund të jenë afërsisht 1-2 herë më të larta se vlerat bazë (zakonisht midis 500-1000 ng/mL).

3. Trimestri i tretë:
Në këtë fazë, nivelet e D-Dimer mund të jenë shumë më të larta, duke arritur deri në 3-4 herë më shumë se vlerat normale (zakonisht mbi 1000 ng/mL). Kjo është për shkak të rritjes së vëllimit të gjakut dhe aktivitetit të shtuar të koagulimit në përgatitje për lindje.

Pse ndryshojnë vlerat referente gjatë shtatzënisë?
Ndryshimet në nivelet e D-Dimer gjatë shtatzënisë janë të natyrshme dhe shoqërohen me ndryshimet fiziolojike që ndodhin në trupin e një gruaje. Këtu janë disa arsye kryesore:
- Rritja e vëllimit të gjakut: Gjatë shtatzënisë, vëllimi i gjakut në trup rritet me 30-50%, gjë që rrit edhe aktivitetin e koagulimit.
- Ndryshimet hormonale: Hormonet si estrogeni dhe progesteroni ndikojnë në sistemin e koagulimit, duke rritur mundësinë e formimit të trombozës.
- Përgatitja për lindje: Organizmi përgatitet për lindje duke rritur aftësinë e tij për të ndaluar gjakderdhjen, gjë që çon në nivele më të larta të D-Dimer.

Kur duhet të bëni këtë analizë?
Analiza e D-Dimer zakonisht kërkohet nëse keni shenja që tregojnë mundësinë e trombozës, si:
- Ëjtje në njërën këmbë
- Dhimbje ose ndjesi të rëndë në këmbë
- Vështirësi në frymëmarrje
- Dhimbje në gjoks

13/11/2024

Po e ndjekim nga afër panairin MEDICA Fair me pjesëmarrës nga e gjithë bota, për të u njoftuar me risitë dhe teknologjitë më të reja që pritet të vijnë.