20/02/2026
Nga Fabrika e Parë e Barnave në Kosovë drejt Njërit prej Standardeve më Strikte Evropiane: Rrugëtimi i TREPHARM dhe Certifikimi EU GMP
Në vitin 2011, në një Kosovë që po ndërtonte themelet e saj shtetërore dhe industriale, u hodh një hap historik për sektorin shëndetësor: hapja e fabrikës së parë dhe të vetme për prodhimin e barnave në vend. Ky vizion mori jetë me themelimin e TREPHARM SH.P.K., duke shënuar fillimin e një rrugëtimi që do të ndryshonte përgjithmonë industrinë farmaceutike në Republikën e Kosovës.
Që nga dita e parë, misioni i TREPHARM nuk ishte thjesht prodhimi i barnave, por ndërtimi i një industrie vendore të bazuar në cilësi, siguri dhe përgjegjësi ndaj pacientit. Në një treg të varur kryesisht nga importet, TREPHARM mori mbi vete përgjegjësinë për të dëshmuar se Kosova dhe hapësira mbarëshqiptare mund të prodhojnë barna sipas standardeve më të larta ndërkombëtare.
Ky rrugëtim ka qenë i gjatë, kompleks dhe i ndërtuar hap pas hapi. Industria farmaceutike është ndër industritë më strikte në botë, ku çdo proces i nënshtrohet kontrollit rigoroz, dokumentimit të detajuar dhe verifikimit të vazhdueshëm. Arritja e standardeve evropiane kërkon disiplinë absolute, sisteme të avancuara të sigurimit të cilësisë dhe përkushtim afatgjatë institucional. Për vite me radhë, departamenti i Prodhimit, Sigurimit të Cilësisë (QA), Kontrollit të Cilësisë (QC), Hulumtimit dhe Zhvillimit (R&D), Inxhinierisë dhe Logjistikës kanë punuar pa u ndalur për të ndërtuar procese, validime, protokolle dhe sisteme që përmbushin kërkesat më strikte rregullatore evropiane.
Një rol të rëndësishëm në këtë sukses ka pasur edhe mbështetja e Republikës së Kosovës dhe institucioneve të saj, të cilat kanë krijuar kushtet për zhvillimin e industrisë farmaceutike vendore dhe kanë mbështetur në mënyrë të vazhdueshme rrugëtimin e TREPHARM drejt standardeve evropiane. Ky bashkëpunim ka qenë thelbësor për forcimin e kapaciteteve prodhuese dhe ndërtimin e besimit në produktin vendor.
Sot, ky vizion i nisur në vitin 2011 shpërblehet me një nga arritjet më të mëdha në historinë e kompanisë: certifikimin me EU GMP, një nga standardet më të larta, më strikte dhe më të vështira për t’u arritur në industrinë farmaceutike globale. Ky certifikim konfirmon përputhshmërinë e plotë të TREPHARM me kërkesat rigoroze të Bashkimit Evropian për Praktikat e Mira të Prodhimit, duke garantuar kontroll maksimal në çdo hallkë të procesit, nga lënda e parë deri te produkti final.
Me këtë arritje, TREPHARM bëhet kompania e parë mbarëshqiptare që arrin standardin EU GMP, duke vendosur industrinë farmaceutike të Kosovës në të njëjtin nivel me prodhuesit evropianë më të avancuar.
Certifikimi mbulon fushat kryesore të operimit, përfshirë:
• proceset e prodhimit,
• paketimin primar dhe sekondar,
• testimet e kontrollit të cilësisë kimike, fizike dhe mikrobiologjike.
Certifikata përfshin prodhimin e produkteve medicinale humane dhe produkteve medicinale humane në fazë hulumtuese, përfshirë:
• tableta,
• kapsula të forta (hard shell capsules),
• forma të lëngshme për përdorim të brendshëm në ambalazh mono-dozë dhe multi-dozë,
• forma të tjera solide, si granula dhe pluhura për suspension oral në ambalazh mono-dozë dhe multi-dozë.
Ky certifikim nuk është vetëm një dokument zyrtar. Ai është dëshmi e një pune të palodhshme shumëvjeçare, e profesionalizmit të lartë të stafit dhe e përkushtimit maksimal ndaj sigurisë së pacientëve. Ai shënon momentin kur industria farmaceutike e Kosovës hyn me dinjitet në hartën evropiane të prodhimit farmaceutik.
Nga fabrika e parë e barnave në Kosovë, deri te përmbushja e njërit prej standardeve më të rënda dhe më strikte të Bashkimit Evropian, historia e TREPHARM është histori vizioni, këmbënguljeje dhe besimi në potencialin vendor. Me certifikimin EU GMP, TREPHARM hap një kapitull të ri zhvillimi, duke forcuar pozicionin e saj si partner i besueshëm për tregun evropian dhe më gjerë, në shërbim të shëndetit publik dhe të së ardhmes së industrisë farmaceutike në Republikën e Kosovës.
