13/01/2026
Ons lees gisteraand ’n Bybelgedeelte uit Josua 6:4: Sewe priesters, elkeen met ’n ramshoring, moet voor die ark uit loop (jy kan gerus verder gaan lees).
My jongste stop my toe skielik en vra:
“Wat is die verskil tussen ’n ark en ’n boot?”
Ek begin verduidelik wat ’n ark is, maar sy raak effens geïrriteerd—want dit was nie haar vraag nie. Ons besluit toe om dit op te soek. In daardie onskuldige vraag, wat ek glo glad nie toevallig was nie, gee God vir my ’n diep boodskap.
’n Boot het iets wat dit stuur: ’n roer, seile of ’n enjin. Geestelik kan ons sê: jy beheer jou boot—deur emosies, doelwitte of wêreldse waarhede—of jy maak God die Kaptein van jou boot.
Maar die boodskap wat ek moes hoor, was oor die ark.
’n Ark word gebou om te beskerm, te bewaar en te oorleef. Dit vra nie beheer nie, maar vertroue—dat God self die waters rondom jou stil sal maak. Dit is om Sy teenwoordigheid binne te gaan en te weet: Hy het jou vas, en Hy het ’n plan.
Soms moet ons uit ons “boot-modus” klim en in God se ark van veiligheid gaan sit.
Ek kan my net indink hoe dit moes voel binne die ark:
om in ’n houtkamertjie te sit, die reuk van hout in te asem, die water rondom jou te hoor, sonstrale te sien wat op die water weerkaats—sonder om enige land in sig te hê. En tog: jy is warm, rustig en veilig, vasgehou in Sy teenwoordigheid.
Wanneer dit vir jou voel of die waters begin opstoot—
klim in die Ark. 🕊️
