عيادة الطب النفسي التطوري للاطفال

29/08/2025

وهيعمل ايه⁉️
هيعمل ايه لما يزهق .. لما نمنع عنه الملهيات هيعمل ايه ‼️
علم الاعصاب بيسمي الوقت الغير مشغول" حالة الفراغ" .. لا هو "ملل" ولا هو "خمول"
مخنا بيدرب نفسه فى الفترة دي بتنشيط شبكة اسمها Default Mode Network ..
دي شبكة عصبية فى مخنا مسئولة عن الابداع وربط الخبرات .. مخنا بيعيد ترتيب نفسه 🧠
الطفل بيتدرب هنا ازاي يفكر .. عملية التفكير بحد ذاتها ، بدون اى مثيرات خارجية .. تصفية الذهن 😌
لو مش عارف يصفي ذهنه و يفكر .. مش هيعرف ازاي يشغل وقته ، مش هيعرف يصلي ، مش هيعرف يتعامل مع المشاعر السلبية زي الغضب والحزن والألم و غيرها
هتلاقيه بيتصرف من غير ما يفكر
هيحتار ازاي يبدأ تفاعل اجتماعي ، ازاي يستمتع بوقته !!
تخيل ان اوقات اللافعل بتحسن الفعل .. فترات الفراغ بتساعد على التوازن العصبي
طبعا فى الاول فيه خناقات صحية هتحصل ، ثم هيحتاج مشاركتك ، ثم هيقدر يتعامل ...
الاستثارة المستمرة بملهيات مختلفة للمخ بتخليه فى حالة استنزاف عصبي و هرموني 😣
فترات الفراغ المنظمة بتقلل الكورتيزول و تحسن المناعة 😮‍💨
بتفصل و تاخد نَفس و ذهنك يصفى علشان ترجع تاني

13/06/2025

نصائح خفيفة و سريعة عن #خبايا التخاطب و جلساته 🥰
علي قناة العيادة على اليوتيوب .

نصايح خفيفة للتخاطب

30/03/2025

كل عيد وربنا راضي عننا 🥰

21/03/2025

اختفي من قدام عيني ... 😱
االاطفال اللي عندهم صعوبات بــ "التواصل الاجتماعي" معرضين انهم يتوهوا او ظاهرة ال wandering اكتر 4 اضعاف من اي طفل.
و 35% منهم مش بيعرفوا يعبّروا عن اسمهم او عنوانهم او رقم تليفون حد قريبهم.
و 50% من اطفال التوحد بيحاولوا يتجاوزوا المسافة الأمنة عن اهلهم.
و الاحصائيات بتقول ان اكثر المخاطر اللى بيتعرضوا لها : الغرق و حوادث الطرق
الطفل هنا ممكن يدرك شعور الخوف و الهلع بس متأخر و زي اى طفل خوفه ممكن يخليه يتصرف بعشوائية اكتر.
طبعا احنا فى رحلة علاجه و دعم قدراته لحد ما يقدر يعتمد على نفسه و يعي المسئولية . و خلال الرحلة دي لازم نكون على دراية باي تهديد لولادنا.
فأيه اهم الاسباب اللى الدراسات حددتها :
🍄 الحساسية الحسية: ممكن الطفل يكون بيهرب عن مكان مش مستحمل المثيرات اللى فيه او يهرب لمكان حابب المثيرات اللى فيه
🍄 النمطيات : احيانا الطفل بيجري للمكان اللى فيه اهتماماته اللى متعلق بيها بشكل مبالغ
🍄 الاندفاعية : نتيجة للاختلافات الفسيولوجية فى المخ ، اغلبهم بيتصرف قبل التفكير فى النتائج
🍄 الضغط : الطفل هنا بيهرب من الاماكن او الاشخاص اللى بيمثلوا له توتر نفسي لا يتحمله
🍄 الاستكشاف : قلة الخروج و التوجية المستمر بتدفع الطفل للجري علشان يستمتع بالحركة و الحرية
اول الحلول هو اننا نخلي الموضوع فى بالنا و نكون على وعي بيه ، ثم نحاول نتبع التوصيات دي :
🍄 تأمين المنزل و تركيب اقفال او اجراس تنبهنا عند المخارج (هااام جدااا)
🍄 يكون دايما مع الطفل بطاقة تعريفية بالاسم و العنوان و رقم للتواصل
🍄 ممكن تستخدم اجهزة GPS لتتبع حركة الطفل
🍄 التمهيد للطفل قبل ما نروح اى مكان جديد عليه
🍄 تخفيف الضغط و التوجية المستمر
🍄 الخروج بشكل دوري مع الطفل بأماكن يستطيع الحركة فيها بحرية و امان
🍄 بعض التدخلات الدوائية بتساعد على تقليل الاندفاعية لدي الاطفال
🍄 بعض البرامج المتخصصة بتدرب الطفل بنماذج محاكاة عملية خارج المنزل
طيب لو حصل و الطفل تاه لاقدر الله :
🍄 عدم الذعر والبدء في البحث فورًا بطريقة منظمة
🍄 ابحث اولا فى الاماكن اللى الطفل شغوف بيها (مثل: العاب او شاشات او حلوي او مياه )
🍄 تحقق من جهاز التتبع ان وجد
🍄 اسأل الجيران و المحيطين و استعين بالمقربين
🍄 خلي معاك صور حديثة واضحة له توضحه بالكامل علشان تسهل تَعرُّف الناس عليه
🍄 وسائل التواصل الاجتماعي قد تساعدك ان تأخر العثور عليه
🍄 بلغ الجهات المعنية بحماية الطفل
بعد العثور على الطفل، من المهم تحليل الاسباب اللى ادت إلى ضياعه واتخاذ التدابير اللازمة لمنع تكرار الحادثة.
الموضوع شائع علي مستوي العالم كله .. و خطير ...
و محتاج توعية على نطاق واسع
ربنا يحفظ ولادنا من كل سوء و يطمن قلوبنا عليهم دايما


https://healthydevelop.bio.link/

30/11/2024

مين بيربي ولادك ⁉️
مش انت !! 🥸
الاول نفرق بين "الرعاية" (Caring) و "التربية" (Parenting)
الرعاية هي تلبية الاحتياجات الجسدية للطفل: الطعام، الشراب، الملبس.
أما التربية، فهي #بناء طريقة تفكير الطفل، وتعليمه قيمًا ومهارات تجعله قادرًا على التعامل مع العالم بطريقة سوية .
وهنا هتلاقي ان اغلب التربية تتم من خلال الــ(Incidental Learning): او الــ التعلّم العرضي .. وهو تعلّم الأطفال للأفكار والعادات من البيئة المحيطة دون توجيه مباشر.
ايه بيقراه ، ايه يتفرج عليه ، مين حواليه ، بيسمع ايه ، و يشوف ايه !
عادات وأفكار تناسب ثقافتك أو قيم أسرتك ولا لا !!
التربية تتعلق بـ "التشكيل الفكري"، و كل اللى بيدخل دماغ طفلك هو اللى #بيشكل افكاره عن العالم و علاقته بالناس و الكون و ربنا
و يخرج لنا النموذج النهائي لعقليته
معلومة علي الماشي :
وفقًا لدراسة أجراها مركز Common Sense Media ، الأطفال يقضون ما يزيد عن 7 ساعات يوميًا على الأجهزة الإلكترونية. دا معناه ان ممكن #ميكونش انت اللي بتربي ابنك اساسا .. ويكون الموبايل هو اللى بيربيه .
و هنا هتلاقي :
• عنفًا مُبطّنًا تحت ستار الكوميديا.
• قيَمًا تتعارض مع تقاليدنا.
• مفاهيم مشوّهة عن الحب والنجاح.
• تعريف فاسد عن السعادة و العلاقات.
و اغلب الدراسات بصدد الموضوع دا بتقول ان حوالي 70% من الاطفال بتشوف محتوي #غير مناسب على الاقل مرة اسبوعيا . و اعتقد لو الدراسات دي حطت قيمنا و اخلاقنا هي المعيار ، الاحصائيات دي هتطلع ارقام مرعبة
اعتبر عقل ابنك إناء فارغ .. محتاج #تقلل ما يصب فيه من اذي :
🍄 حدود صارمة لوقت الشاشات
🍄 رقابة على ما يشاهد
و #تزود ما يصب فيه من الخير :
🍄 احنا نفسنا كآباء المفروض نتحري ما يصب فى عقولنا #احنا يوميا
🍄 ثم نخصص #وقت لصحبه اطفالنا و مشاركتهم لافكارنا و قيمنا
التربية فن بناء طريقة تفكير الطفل، #غرس القيم، وتعزيز مهاراته لفهم العالم بطريقة سويّة. احكي معاه عن يومك و يومه و رأيك فى المواقف اللى بتتعرضوا لها
وقتك و افكارك اهم ما يربي طفلك .. زكّي افكارك و اديله من وقتك.
اهم ما يربي طفلك .. زكّي افكارك و اديله من وقتك.


https://healthydevelop.bio.link/

15/06/2024

اللهم انصر عبادك و ألّف بين قلوبهم ..
و طهر أمتك ...

07/06/2024

بين "الحكايات" و "العلم" : إزاي تختاري أفضل طريقة لعلاج طفلك⁉️
علشان #منحرمش طفل من فرصة علاج لمجرد سماع تجربة سلبية عنه.
ولا #نجرب معاه علاج لمجرد سماع قصة نجاح عنه.

الحيرة وقت اتخاذ قرار في رحلة علاج طفلك طبيعية..🤓
انتي بتسمعي #حكايات عن علاجات "معجزة" ، وحكاوي بتحذرك من "مخاطر" علاجات أخرى.
و العجيب انتي مش وحدك فى الحيرة دي 🙃 ، دي ظاهرة عامة حتي الدراسات الطبية سلطت الضوء عليها:
- القرار بناء علي ال" Anecdotal Evidence " او #التجارب القولية : و دي قرارك بيعتمد على تجارب الاخرين و القيل و القال.
- القرار بناء علي ال" evidence based medicine " او #الطب المستند علي البراهين : و دي قرارك بيعتمد على سنين من البحوث العلمية و رصد الفوائد و الاثار الجانبية لاى علاج سواء ادوية او تقنيات طبية اوتأهيلية.
لان الطب دراسة يمتد تاريخها لآلاف السنين حتي تجربتك الشخصية لا تتعدي كونها تجربة شخصية ...
ودا فى تاريخ الطب حصل كتير; زي اصابة عدد كبير من الاطفال بأمراض و وفاة البعض بامراض فيروسية نتيجة نصائح بالبعد عن التطعيمات بناء علي تجارب شخصية.
يبقي ازاي اثق فى قراري كأم :
🍄 ابحثي عن المعلومات من مصادر #موثوقة:
• استعيني بالمواقع الطبية المُعتمدة و المجلات العلمية المُتخصصة.
• ابتعدي عن المعلومات المُنتشرة على مواقع التواصل الاجتماعي دون مصدر علمي.
🍄 استشيري طبيب #مختص:
• لتشخيص طفلك.
• ناقشيه في الاثار الجانبية المتوقعة و خيارات العلاج المُتاحة لحالة طفلك.
• افهمي من اهل الاختصاص سبب اختيار تلك الوسيلة العلاجية تحديدا والمتوقع منها .
🍄 تذكري أن كل طفل #فريد:
• ما ينجح مع طفل قد لا ينجح مع آخر.
• لا تُقارني تجربة طفلك بتجارب أطفال آخرين.
• الطفل يمر بمراحل تطور وكل مرحلة قد يلائمها نوع علاج معين.
🍄 #احذري من "العلاجات السحرية":
• لا تُصدّقي وعودًا مُبالغًا فيها بنتائج سريعة و مُذهلة.
• ابتعدي عن العلاجات غير المُعتمدة من قبل الجهات الطبية المُختصة.
🍄 خذي #قرارك بوعي و ثقة:
• ناقشي مع المختصين مخاطر و فوائد كل خيار علاجي.
• اختاري العلاج المُناسب لحالة طفلكِ و احتياجاته.
• تابعي تحسن طفلك خلال فترة العلاج و بلغي اهل الاختصاص بملاحظاتك .
اغلب قرارتنا لولادنا فيها تحديات ..
واختيار علاج مش زي اختيار ملابس او حتي مدرسة ..
حبنا ليهم و حرصنا عليهم بيشجعنا نكون حريصين على علاجهم فى ضوء العلم و المعرفة ..
دمتم بصحة و سعادة😊


https://healthydevelop.bio.link/

09/04/2024

ازاي السابلية و البيتيفور بيطيبوا خاطرك؟ 🎉🌙
عيد الفطر فرح وسعادة بعد شهر من صيام و قيام.
طقوس العيد والحلويات هي رمز للفرحة والتقدير بعد المجهود و الخير الكبير في رمضان
بيتيفور وكحك وسابلية مش مجرد أطباق، دي ذكريات و تقاليد جميلة بتجمع الأسرة
مش بس طعم لذيذ ... كمان أثر منعش و روح مبهجة. 🍰🍪
العيد بعد مجهود و خير الشهر الكريم بيفكرنا يكون عندنا لحظات استثنائية للاحتفال بمجهودنا و تفانينا مع اولادنا. 🌟
يبقي عندنا طقوس خاصة تفرحنا بعد كل انجاز حققناه .

اللحظات الثمينة بتكون فرصه للرضا عن نفسنا و الامتنان للي حوالينا .
العيد وقت الاحتفال بعد المجهود💕✨


https://healthydevelop.bio.link/

لطفولة مبتسمة و مستعدة للمستقبل

04/04/2024

الثقة بالنفس اساسها المهارات الاجتماعية
علشان الطفل يقدر يندمج و يدافع عن نفسه و يعبر عن نفسه بطلاقة ...
برنامج "TOM" منهج متكامل تم تطويره بعيادات الطب التطوري و اعتماده اكاديمياً لدعم للطفل
اتعرف عليه من خلال الفيديوهات علي قناة العيادة على اليوتيوب .

برنامج متخصص بالذكاء الاجتماعي للطفل

02/01/2024

دي دعوة عامة #للتحضُّر
دراسة بجامعة اكسفورد وضّحت ان تحضُّر المجتمعات مش بمدي تقدمها التكنولوجي او مواردها ، لكنه يقاس بمدي رقي التعامل بين الناس فيها
وخاصة تعامل الناس مع الاطفال #المختلفين و التحضر فى التعامل مع أُسرِهم
لما يكون فيه طفل غير تقليدي فى الاسرة بيحتاج مجهود اكبر
و اسرته بيكون عليها تحمل #ضغوط نفسية مضاعفة فى التربية و فى الشارع و فى المحلات و فى المدارس و غيرها
.
وفي دراسة مثيرة للاهتمام من جامعة كاليفورنيا
وجد العلماء ان من اكثر الامور اللى بتدعم الاسر و بتأثر فى حيويتهم هي "اللطف" فى تعاملنا معاهم و تقديرنا لمجهودهم .
لان من اهم اسباب الضغوط علينا هى : قلقنا علي ولادنا من مجتمع مش فاهمم او مش متقبلهم او مش قادر على احتوائهم
#رقي اخلاقنا فى تفهم الطفل و تقبله و احتواءه بيطمن اهله انه في مجتمع #آمن و بيكون دليل على مدي تحضرنا احنا
تصرفات بسيطة لكن هتفرق كتير :
محذورات:
🚫 لا تتعمد تجاهل الطفل
🚫 لا تنتقد اسلوبهم فى التربية لان التجربة كلها غير تقليدية عليهم
🚫 تجنب التعليقات الفظّة زي "ياحرام" او "شدي حيلك"
🚫 لا تقارن الطفل بأي شخص اخر
🚫 لا تفترض انك اول من يكتشف اختلاف الطفل
توصيات:
🍄 ابتسم و تعامل بلطف معاهم و مع الطفل وبلاش تلقي احكام
🍄 لو فيه ملاحظة علي ابنهم ، اكد على استعدادك لمساعدتهم
🍄 قول الايجابيات فى ابنهم قبل ما تقول ملاحظاتك
🍄 راعي اختيارك لكلمات لطيفة خاصة فى وجود الطفل لانه بيحس و بيفهم
🍄 اشكرهم و قدر مجهوداتهم
🍄 افتكر انهم محتاجين تفهمك مش محتاجين شفقة
🍄 سيب النصائح للمختصين و اهتم فقط انك توفر اجواء قبول و ألفة لابنهم
🍄 ثقف نفسك
دا بيعكس شخصيتنا #احنا
دا بيعكس مدي تحضرنا و رقي اخلاقنا احنا ...
دا بيعكس انسانيتنا ..
شير و وَعِّي المجتمع بدوره


https://healthydevelop.bio.link/

22/11/2023

من رحم النكبة يُولد #بطل
اكيد الحروب من أسوأ الكوارث اللي ممكن تأثر سلبياً علي الأطفال.
بيفقدوا أحبائهم ومنازلهم ومدارسهم ، وفي بعض الحالات يتم استغلالهم أو اختطافهم أو تجنيدهم كمان .
لكن فيه وجه تاني شوفناه للنكبات دي ...
وجة طفل قدر يكبر و يتكيف و ينضج
بقي صامد اكتر و أقوي .. 💪
دراسة الاطفال ما بعد الحروب وضحت ظاهرة اسمها "Post-Traumatic Growth" او #نمو ما بعد الصدمة .
أطفال مروا بتجارب حروب صعبة و بقي عندهم مستويات اعلي من المرونة والتكيف وبيقدروا يكونوا روابط اجتماعية #أقوى وأوسع .
الحرب هنا حفـّـزت الأطفال على مواجهة مخاوفهم و كبروا قادرين يتعاملوا مع الضغط والصدمات ، وإيجاد حلول غير تقليدية للمشكلات.
و فيه دراسات بتقول ان نسبة اللى بيخرجوا من الصدمات النفسية أقوي و انضج ممكن تتخطى ال 50% .. و بيكونوا اكثر ايمانا بقيَمهم و التزاماً بمبادئهم
طيب وولادنا اللي بيشوفوا اخبار الحروب
ازاي نقدر نخلي اثر الاخبار ايجابي عليهم:

🍄 اتكلم مع أطفالك عن الحروب بطريقة هادئة ومناسبة لعمرهم. اصغِ إليهم وطمئنهم وصحح أي معلومات خاطئة.
🍄 حدد الكمية والنوعية من الأخبار اللي بيشوفوها عن الحرب. احرص ان الأخبار تكون موضوعية وموثوقة . اشرح لهم السياق والأسباب والعواقب.
🍄 شجّعهم يعبروا عن مشاعرهم وآرائهم بشأن الحرب بطرق إبداعية ، مثل الرسم أو الكتابة أو خلال اللعب. هيساعدهم دا على التخلص من التوتر والقلق والحزن ، ويزيد ثقتهم بأنفسهم وقدراتهم.
🍄 ابحث عن طرق للتواصل مع الأطفال في مناطق الحرب ، وتبادل معهم الرسائل والصور والفيديوهات. هيساعد تواصلكم معاهم على فهم القضية والتضامن الايجابي معهم .
🍄 انضم إلى حملات أو مبادرات تهدف إلى دعم الأطفال الذين يتأثرون بالحرب ، مثل التبرع بالمال أو الملابس أو الألعاب أو الكتب ، أو التطوع في المنظمات الإنسانية أو الخيرية.
الأطفال #أمل المستقبل ، وومضة الامل وسط الظلم .


https://healthydevelop.bio.link/

لطفولة مبتسمة و مستعدة للمستقبل

14/09/2023

طفل عبقري
بيقابل تحديات اكتر
وهيحتاج مننا اضعاف المجهود
تصوّر ... #العبقرية .... سلاح ذو حدين.
طبقا لليونيسيف ، فيه ملايين الاطفال العباقرة لا تتوافر لهم الفرص ملائمة
و يكفي ان تعرف ان نسبة الاطفال ذوي الذكاء المتميز تقارب طفل كل 1000 طفل
و بيتولد كل لحظة طفل عبقري ..
و دي بعض الملاحظات لذكائهم ، ممكن نكتشفها فى وقت مبكر جدا فى طفولتهم :
🍄 ذاكرة قوية للتفاصيل
🍄 الفضول و الشغف بالتحديات الجديدة
🍄 الكلام الكتير
🍄 اهتمامات غير تقليدية بمواضيع او العاب معينة
🍄 خيال خصب
🍄 #حساس جدااا جدااا جداا ; و ممكن قدراته كلها تتدهور لأقل سبب يؤثر عليه .. ودا يعتبر اهم عامل بيخلي التعامل مع فترة طفولتهم صعب و مرهق
مش كل الاطفال الذكية هتظهر عليها جميع السمات دي بالكامل .
لكن هتلاقي بعضها ملحوظ بشكل واضح فى سن مبكر
تلميحات سريعة ازاي #تدعم تميزه دا :
🍄 وفّر لهم بيئة غنية بالمثيرات و الكتب و الالعاب و الناس .. الناس اهم مثير
🍄 اتحدي عقله وإلا هيزهق بسرعة جدااا
🍄 احترم تمـيـُّـزه ... لا تقارنه بأي أحد
🍄 شجعه و كافئه على المجهود مهما كانت النتائج
🍄 خليك قدوة قدامه ، خاصة في التعامل مع المواقف الحساسة
🍄 متسيبوش مع الشاشات ... هتستهلك اعصابه
🍄 ركز مع مميزاته و اصبر عليه
🍄 اتعلم انت منه ، ابنك هيعلمك افضل اسلوب تعامله بيه
🍄 اسمع من المتخصصين و اسعي تساعده يطور قدراته ، خاصة ذكائه العاطفي
🍄 اعمل له اختبارات توضح نقاط القوة و التحديات عنده
🍄 حــبـه ... بدون شروط
🍄 افتكر انك بتساعده يكون افضل نسخة منه ، مش علشان يحقق احلامك انت

الطفل الذكي لو متوفرش له الدعم الكافي ، بيكون معرض لملل شديد و تقلبات مزاجية و عزلة و ضعف ثقة بالنفس و توتر و غيرها .
بس بمجهودنا فى زيادة الوعي بيهم و باحتياجتهم ، #بينوروا و يزدهروا
شكرا لاهتمامك بالصحة النفسية للطفل
#شارك البوست علشان تستفيد منه كل اسرة ممكن يبقي فيها طفل موهوب لم يتم اكتشافه بعد.



https://healthydevelop.bio.link/

لطفولة مبتسمة و مستعدة للمستقبل